Banongu 10 - La Sainte Bible en Langue Yipunu

Banongu bansanunu jiyilumbu na yilumbu

¹ Banongu baSalomon. Muana dibaala aguvu na diela elasi taji andi na nguji ubueji, yiduka elasi taji andi na nguji munyongu.

² Busina abumadagu bugaa na tsongu, tumba businganyi buiwaki mutu kalala.

³ Fumu agesingi yiri mutu usungama otsoganga na nsala tumba etutsi nsala tsibatu babi.

⁴ Batsontsi bebangingi na bujaga tumba jandi aguisali na mangolu oba na busina.

⁵ Jandi oyigukiyi va mfula avu alubuga, jandi oyiwendi yilu va temu dutsonsugu awelimina ulasu yisonyi.

⁶ Batu basungama begabulu miula, bango dikasi bekesuega na mapopopu mogu.

⁷ Urangimina mutu usungama uvu miula tumba diina dimutu mubi divu mbunga.

⁸ Jandi aguvu na diela esingi malongi. Jandi aguvu yiduka bilila biandi biumurombisa ubungana.

⁹ Jandi aguvu na businganyi agaa na puela mambu; agugaa na businganyi ojabunu.

¹⁰ Jandi oyipieti misu ekerombisa munyongu, jandi aguvu na buduka buposulu obungana.

¹¹ Posulu tsimutu usungama tsivu nderi yileka yimonyu. Posulu tsibatu babi tsisueyi dikasi diogu.

¹² Divina dirombisi mitsundu tumba durondu duikubiyi mabi motsu.

¹³ Posulu tsimungo dujabu tsivu na diela tumba jandi agugaa na diela odimbungu.

¹⁴ Bango diela belundi dujabu tumba posulu tsiyiduka tsiumurombisa ubungana.

¹⁵ Maboti mayisina mavu nderi musiengi andi ukandu; purulu tsibijaga tsiubarombisa dubungu.

¹⁶ Yisalu yimusinganyi yiveyi monyu, agugaa na businganyi okilusu.

¹⁷ Jandi oyikipingi malubu odila monyu, oyibusi nsiembu etsiemuyi.

¹⁸ Jandi oyisueyi divina avu mufuritsi, oyifuengilili basusu avu yiduka.

¹⁹ Jandi oyivosi puela agegambu na masumu tumba jandi aguvu na yida-mamba ana malubu.

²⁰ Posulu tsimutu usungama tsivu nderi tindi lora jivema; posulu tsimutu mubi tsigaa na tsongu.

²¹ Posulu tsimutu usungama tsisungiyi batu bapuela tumba biduka befuangingi mu mbari begambu na diela.

²² Miula miFumu miveyi busina abugokaluga munyongu.

²³ Yiduka elabi ubueji uvaganga mabi tumba mungo diela ana dujabu.

²⁴ Ama batu belabi goma amana belabi; ama batu basungama bavu na nsala amana bedilingi.

²⁵ Nana yimbongila yivioyili anana mutu mubi etsiemuyili tumba mutu usungama ana yibuga ayivu sikiri.

²⁶ Adi nganyi jivayi mu minu na adi nsumbili jivayi mu misu amana mutsoritsi avu ombu jandi oyimusalisi.

²⁷ Uduma Fumu uibuesi bilumbu tumba bilima bibatu babi bimatabulu.

²⁸ Ditasa dibatu basungama dibarombisi nsangu; tumba batu babi bagaa na tsongu.

²⁹ Fumu avu yisuemunu yibatu basungama tumba ebungi bavayitsi bamabi.

³⁰ Mutu usungama agopupusu via, tumba batu babi bagotsananga mu bulongu.

³¹ Posulu tsimutu usungama tsiveyi diela tumba divu diwelimina utabula bafuritsi ndimi.

³² Posulu tsimutu usungama tsivu na maboti, tumba posulu tsimutu ubi tsivu na mbivulu.