Banongu 1 - La Sainte Bible en Langue Yipunu

¹ Banongu baSalomon muana dibaala uDavid, agumaba kaga jiIsrael.

Dibandu didibuku

² Banongu bebaba bamasonugu uwijisa batu ujaba diela na malongi yiri botsiyisa dujabu duotsu.

³ Bebalonsi nsanunu jidiela: yiri bobanganga na dusungugu na businganyi na usigama.

⁴ Belonsi batu abagaa na diela ukelula mambu na bafudu uba rambilini mu mambu ama bolabanga.

⁵ Beroyisi diela dibango diela nesi dujabu dubango dujabu,

⁶ yiri botsiyisa divindugulu dibanongu nesi mambu amamasuegu nesi mambu mabasavitsi batsavu.

⁷ Uduma Fumu uvu dibandu didujabu. Biduka belensi diela na malongi.

Malubu mabafudu

⁸ Muana ami udibaala, gulu malongi mataji agu na guyabusa malongi manguji agu.

⁹ Moba nderi dugaba va muru agu nesi panga va kingu agu.

¹⁰ Muana ami udibaala, guyagulu mambu mabafudu babi aboba na nsala ugudunsa. Guyasinga mambu mogu

¹¹ pa bevosi rie: Tʼwendi tukayenarambanga mirambu miubokila nogaanganga abagaa na diambu.

¹² Tubamina mbisu dedi mosi na jogu abewendi o mbura jiabafu tubabuaga dibuayila o yiduna.

¹³ Tudila minongu miotsu mibima bidufunu duneni ubasa mandagu metu.

¹⁴ Ruga, gudila dikabu diagu, jetu botsu tuba mubundini.

¹⁵ Muana ami udibaala, guyafubana nsila nogu, kakana nogu.

¹⁶ Bewendi mambangu uyenavaganga mabi na bagetamba uyenabokanga.

¹⁷ Tsia kulini berambili mavuga pa batsoli belabi murambitsi mavuga.

¹⁸ Tumba jogu bekerambila mirambu, mirambu amiubawakusulu.

¹⁹ Adina diuba disukusulu dibakinditsi; abimakindu bimabarombisa dufu.

Malubu madiela

²⁰ Diela digamuyi mu mansila nesi mu makasa,

²¹ digamuyi mu mabaga maneni nesi o masogumunu nesi o makotulu mamisiengi.

²² Diwivuli rie: Biduka, te na temu yi durombilanga buduka buenu? Te na temu yi jenu badesitsi dundensilanga? Te na temu yi jenu bifufu duvinanga dujabu?

²³ Guluatianu nsiembu tsiami! Nyudupalisila matasa mami na nyudujabisa malongi mami.

²⁴ Nyimanengila, dumabusp uwagula; nyimasamba dikaka uduwamusa; dusamagaru.

²⁵ Jenu botsu duibusi malongi mami, dugerondi nsiembu tsiami.

²⁶ Kabogu meʼ wami nyureka ava dulabilanga maguga, nyududesa ava dugaangulu na goma.

²⁷ Yilumbu yimosi goma jiudugaanga nderi mungudi na maguga modupieta nderi yimbongila, vana temu em munyongu na goma biudukambisa,

²⁸ mbana dundengila, ngowagula via; dutomba na dugondaba.

²⁹ Anana diubila mu mbari dumavina dujabu na dusamaduma Fumu,

³⁰ dusamaronda malongi mami na dumalensa nsiembu tsiami tsiotsu.

³¹ La dibandu dusaku dedi na bifu bienu, dutopulu buduka bujenu beni.

³² Ubusa diela uirombisi biduka ufu; ubusa ukipa uibirombisi ubungana.

³³ Tumba jandi aguikululu otsananga sui na agoba na goma jimabi motsu.