Amos 9 - La Sainte Bible en Langue Yipunu

Yiriariamu yimuranu

¹ Nyimalaba Fumu agumaba diteli va yinyensulu yipagu. Amaruma rie: Dimba biviovi bimakutu yiri bilemondi biurakuga. Nyubokisa bansialutsu; ne umosi va gari ogu agorungula urina, ne umosi va gari ogu agorungula ukewaka kalala.

² Pa bowenda o mbura jiabafu, nyubarasuna.

³ Pa boyesuema o julu mukongu uCarmel nyuyebaromba na nyubagaanga; pa bosundila utsiemuga va misu mami va gari mubu, avana wandi nyuruma nyoga ubagaka.

⁴ Pa bavinitsi bogu bobabega bakoli avana wandi nyuruma yiri bobokusu nyubagengilanga ubavaga dibi tsiri ubavaga diboti.

⁵ Fumu aguvu Fumu Mabadi ebembi butamba na buireyimi. Abandi botsu bavu o bukuili. Buimati tindi umata, buidiami tindi udiama nderi nyidu jiNil.

⁶ Nsambi amarungisa bibuku biandi o julu amasunsa yima yigala ayibagunu na yisusungi o julu butamba, enengili mamba mamubu mbana emapuyi va tsi. Diina diandi: Fumu.

Bunsonsi bubango mbela

⁷ Fumu amawivula rie: Jenu baIsrael dugaa abami dedi mosi na bisi Ethiopie? Nyisamapalisa baIsrael o bulongu buEgypte dedi mosi na baPhilistin o Kaftor na baSyrie o Quir?

⁸ Fumu Nsambi egengili bufumu abuvu na mbela yisuisu. Amavosa rie: Nyububunga tindi ubunga; ne nana ngobungabategula botsu baJacob.

⁹ Namapapa nyurumisa batu ukungisa baIsrael va gari malongu motsu dedi mosi nana bekungisili yisagulu ayigebondusi ne dimanyi dimosi.

¹⁰ Bavayitsi botsu bamasumu babatu bami boboku o divita jogu botsu abevosi na babiyitsi rie: Tsatsabi gugoturombisa maguga ama guitubiyili.

Adiulabana ava dubungu dusukila

¹¹ Vana temu eni nyumuereliga musiengi uDavid agumaberuga; nyulonda maluta nesi ureliga bivongu; nyugurungulila na uba nana umaleba.

¹² Mbana baIsrael bomuedila biari bikala biEdom na malongu motsu amamayitsulungu diina diami. Menu Fumu oyidivosi na nyudidugusu.

¹³ Fumu amamuevosa rie: Yilumbu uruga yiruyi ayi mufutsitsi oyenadukilanga mutsonsiyitsi umuefutsanga. Jandi oyinyiyi mirayisan obenguna na jandi oyivari ble. Mikongu na bikundubuga biotsu biufunisanga malamu.

¹⁴ Nyugabusa bakoli babatu bami baIsrael; bomuerungulila misiengi amimapansu na bomitsaninanga. Bovara manungi mamfuga tsirayisan na bonuanganga malamu; bovarisanga manungi na bojanganga digumba.

¹⁵ Nyubawarisa mu bulongu buogu na bagomuepatulu bulongu abu nyimabavega.