Amos 6 - La Sainte Bible en Langue Yipunu

Duvotsu dumfurulu

¹ Ka muna maguga ma ombu jogu abavu sui o Sion na abavu na mirima misunda o julu mukongu uSamarie nesi baneni batega babulongu! Tsiri ombu gogu baIsrael bamawendanga?

² Kabogu gabuganu o Kalne, yelabanu. Dukarambuyila vana te no Hamat aguneni, vindamanu o Gat ombu baPhilistin. Misiengi mieni mivu na digumba uviolila bufumu buenu buotsu ubueji? Biari biogu biviolili biari bienu uroga?

³ Duirondi ukakasana yilumbu yimaguga nombambasana durumu dudikasi.

⁴ Duisilimi mu matangi amamavagu na pungi na duisimbuli mikakala mu bitsiga biogu, duiji baana babindombu na baana babangombi bavonga.

⁵ Duiwimbili mawiwimbila na mufi mabangomfi, duitasi yiri duijabi uwimbila ne uviolila David na bisigulu biandi.

⁶ Dunuangingi malamu mu mamoyi maneni, duigolili matsi maboti tumba dugekipi dubungu aduitsoyisi yifumba yiJoseph.

⁷ La dibandu dubila batu batega mu mulongu ubakoli; migamu mienu minsangu miusundila utsiemuga.

Dubungu duSamarie

⁸ Fumu aguvu Fumu amaleva pesi na diina dijaʼ beni; Menu aguvu Nsambi Mabadi nyivosi rie: Nyivini tindi uvina dunangu duIsrael na nyivini mandagu mandi maboti nyuwakisa musiengi na biotsu abivu munu ombu bavinitsi bandi.

⁹ Na pa vesiali yigumi yibabaala o ndagu, bofu.

¹⁰ Ava tindi yiburu oruyila uyetsiga mfumbi owivula aguvu o gari ndagu rie: Guki na mutu guna? Ususu owaka rie: Vola nduku! Ajiji tsiri temu utubula diina diFumu!

¹¹ Fumu umma erumi yiri ndagu jineni jiubula na ndagu jigeyi jiugesumunu.

Ndungulu beji tsikuiini

¹² Je bakabala bewendi vajulu dugunga? Je befutsi na bangombi? Dibandu yi dumakalusila musuga yika ndombu? Na bisalu bidusungugu yika dugundu?

¹³ Je duisangili abigaa na tsongu mbana duivosi rie: Tsia na mangolu metu tumalunga?

¹⁴ Fumu Nsambi Mabadi amavosa rie: Jenu baIsrael, nyureliga dilongu adiutoga nenu adiudukambisa ubandila o dikotulu diHamat te nd mujamba o kumu.