Amos 3 - La Sainte Bible en Langue Yipunu

Batu baNsambi vengu bokilusu

¹ BaIsrael, Fumu ana kueru nenu. Guluanu mambu ama evosi nenu, jenu bisi mukuta uotsu aba nyimapalisa o bulongu buEgypte.

² Jenu buandi nyimasola va gari mikuta miotsu va butamba; La dibandu nyudukilisila mu diambu dimabi menu motsu.

Nsambi uvosa evosi, mubiyitsi agorungula uba sui

³ Babaala babeji borungula ulinga va mosi pa bagolevananga?

⁴ Yimbungu egumbi kulini o dilima pa asakagaanga yima?

⁵ Tsoli ewakululu mu murambu aguvu va tsi pa tsiri divuga? Divuga dipisuyi mapipisuga.

⁶ Besiyi mumbanda masisiga o musiengi tsiri ulasa batu goma? Maguga mesundili ulabana o musiengi pa Fumu agemasingisi?

⁷ Fumu aguvu Fumu elasi basalitsi bandi babiyitsi yisuegu yiandi.

⁸ Pa yimbungu egumbi, anyi agelabi goma? Fumu aguvu Nsambi evosi, anyi obusa ubiga?

Bunsonsi buSamarie

⁹ Gamuganu o mandagu mabukaga maAsdod nesi o mandagu mabukaga o Egypte, dukavosa rie: Gukamanu o mikongu miSamarie yelabanu kulini tsipuela tsipuela atsivu guna na dikasi adi bevayingi!

¹⁰ Fumu amavosa rie: Bisi Samarie bagejabi businganyi; abi bedili na dikasi nesi abi bedayi bebigukiyi o mandagu mabukaga.

¹¹ La dibandu Fumu aguvu Fumu Nsambi evosili rie: Jenu bisi Samarie muvinitsi okanda bulongu buenu obonga mangolu menu nesi ukinda mandagu menu mabukaga.

Dugobutsu dugaa na nsangu

¹² Fumu amavosa rie: Nana mubungulitsi ubindombu epatulili yimbungu yika binama bibeji vo tanguji kodu dituji anana baIsrael abavu o Samarie bolabila.

Malubu

¹³ Fumu aguvu Fumu Nsambi Mabadi amavosa rie: Guluanu na tsingulanu malubu memama ombu bategula baJacob.

¹⁴ Yilumbu ayi nyukilisa baIsrael na nsimbulu tsiogu nyubivisa binyensulu bipagu biBethel; masiyi mayinyensulu yipagu mobogulu te na mobonduga va tsi.

¹⁵ Nyupansa mandagu mamunongu na munongu nesi mandagu mabukaga amamasalu na pungi mopansu nesi mandagu mabaneni motsiemuga. Fumu oyidivosi.