Aggee 2 - La Sainte Bible en Langue Yipunu

Bundumba buNdagu Nsambi ajimubeji

¹ Mu yilumbu yimagumabeji na yimosi bitsungi ji mu sambu al i mambu maFumu mamamuevosu na Aggee mubiyitsi rie:

² Tsingula Zorobabel muana dibaala uChealtiel murumitsi uJuda na Yechoua muana dibaala uYossadac yivunda yibavagulitsi bapagu na bakoli botsu rie:

³ Anyi va gari enu amalelaba bundumba buNdagu Nsambi ejiji va dibandu? Tsie duijilabili namunyi? Namunyi dugelabi yiri jivu yika yitsatsu?

⁴ Fumu amavosa rie: Zorobabel na jenu batu botsu warisanu mirima! Yechoua muana dibaala uYossadac yivunda yibavagulitsi bapagu warisamurima agu!

⁵ Ngokubula pangini aji nyimavangana nenu ava dumapalila o Egypte, duyalaba keri nyubanganga nenu.

⁶ Nyiina, menu Fumu Mabadi nyibueli rie: Mua pesu temu nyukungisa julu na butamba na mubu na butamba bugumuga.

⁷ Nyukungisa mirima mibisi malongu motsu na jogu beni boruga na busina buogu. Nyubasa Ndagu ami na bundumba.

⁸ Lora jivema ajiami na lora wandi.

⁹ Bundumba buNdagu ajimubeji buba tindi buneni ne uviolila buNdagu jitega. Va mbura ejiji nyudulasa duvotsu duami. Menu Fumu Mabadi oyidivosi.

Batu abagaa balioma

¹⁰ Mu yilumbu yimagumabeji na bina bitsungi jimufu mu yilima yimubeji yidurumu duDarius Fumu Mabadi amamuevosa na Aggee mubiyitsi rie:

¹¹ Wivulabavagulitsi bapagu uwagula yivu yieyiyi rie:

¹² Pa mutu obega nyama ajimawakusu mu mulemba uyijungi yiandi nobemba mapa nesi biguji nesi malamu nesi matsi nesi yiguji yiotsu na yijungi yiandi, bima bieni biuliomusu? Bavagulitsi bapagu bamawaka rie: Nesi!

¹³ Aggee amamuewivula rie: Pa mutu agumanamu muinsi umfumbi ebembi bima bieni biotsu, bionyi biuba muinsi? Bavagulitsi bapagu bamawaka rie: Nyiina, biuba muinsi.

¹⁴ Mbana Aggee amamuevosa rie: Fumu amavosa rie: Anana batu bebaba bavu, anana dilongu diedidi divu va gusu ami, anana bisalu biogu biotsu bivu; abi bepagulili bivu muinsi.

Banu limba ubanda namunyi

¹⁵ Fumu amamuevosa rie: Letasatianu adi duivayingi ne adi duvaganga ubongila namunyi ne dusakabanda ugukiga mamanyi umuerunga Ndagu ami!

¹⁶ Diambu yi divu nenu? Ava mutu ewendili uyebonga magumabeji mabietsu bible vamaba yika yigumi buandi; ava ewendili o nsienga uyebonga magumaranu mabietsu mamalamu vamaba yika magumabeji buandi.

¹⁷ Nyimadulasa bimaga: bivaru bimanyenga na bimabumba; mfula jimamanyi jimanoga; nyimabivisa bisalu bienu biotsu. Fumu amavosa rie: Ne nana dusamagabuga ombu garni.

¹⁸ Letasatianu adi duivayingi na duvaganga ubongila namunyi. Mu yilumbu yimagumabeji na bina bitsungi jimufu yibuga yiNdagu Nsambi yimasundu. Letasatianu adiulabana!

¹⁹ Tsia ble tsimasuka o bilundulu, mbe? Mfuga tsirayisan na mifiga na migeranada na mioliva misamaburanga. Tumba ubanda namunyi nyudugabila miula miami.

Pangini na Zorobabel agu Fumu amasola

²⁰ Muna yilumbu yieni yimagumabeji na bina Fumu amamuevosa na Aggee temu ajimubeji.

²¹ Tsingula Zorobabel murumitsi uJuda rie: Menu Fumu Mabadi nyukungisa julu na butamba.

²² Nyugudisa bakaga; nyubunga mangolu mabufumu buogu; nyuberusa makalu na jogu abemanangimi nesi bakabala boboku na babeyitsi babakabala bobokasana.

²³ Muna yilumbu yieni Zorobabel muana dibaala uChealtiel, ndeʼ aguvu musalitsi ami, nyugukelisa nderi yilimba, nyimagusola uba musalitsi ami. Adina menu Fumu Mabadi nyivosi.