Aggee 1 - La Sainte Bible en Langue Yipunu

Temu umuerunga Ndagu Nsambi

¹ Yilima yimubeji bidurumu dukaga Darius mu yilumbu yitega mu tsungi yimusiamunu, Fumu amavosa na Aggee. Amamuruma utsingula Zorobabel muana dibaala uChealtiel agumaba yivunda yibulongu buJuda na Yechoua muana dibaala uYossadac agumaba yivunda yibavagulitsi bapagu mambu maFumu rie:

² Fumu Mabadi jandi rie: Batu bebaba bevosi rie: Temu jisakatola umuerungulila Ndagu ami.

³ Kabogu mambu maFumu mamatsingulu Aggee rie:

⁴ Je divu diwelimina yiri jenu duitsani mu mandagu maboti na Ndagu Nsambi yika uvongumuga jivongumuyi?

⁵ Fumu Mabadi evosi rie: Letasatianu adi duivayi!

⁶ Duivaringi puela ne nana duidokuli pesu; duijangingi ne nana dugegukuru; duinuangingi ne nana dugevotsi puila; duiduaringi ne nana dugegulu yiusila; oyifutu epoduli futa andi mu komi jitobiga!

⁷ Fumu Mabadi amamuevosa rie: Letasatianu adi duivayingi!

⁸ Matanu o julu mukongu, beganu tsimbi, runganu Nsambi ami. Nyulaba nsangu uyitsu nana divu diwelimina. Menu Fumu oyidivosi.

⁹ Duitasingi udila puela ne nana duidili pesu; duirondi ukotisa digumba dienu tumba nyimadivembula. Fumu Mabadi amawivula rie: Dibandu yi? Mutu mutu emanini mangolu mandi urunga ndagu andi diuleba Ndagu ami jimapansiga.

¹⁰ La dibandu mfulajigemuenoyila na butamba bumaduwimina digumba.

¹¹ Nyimagumusa bulongu: nesi mikongu nesi nungi tsible nesi mfuga tsirayisan nesi mioliva nesi biotsu abi butamba burungula ubendisa. Batu na bibulu utsoga betsoyi na bisalu biotsu bigaa na tsongu.

¹² Zorobabel muana dibaala uChealtiel na Yechoua muana dibaala uYossadac agumaba yivunda yibavagulitsi bapagu na bakoli botsu bamagulu diufi diFumu Nsambi ogu na mambu maAggee mubiyitsi nana Fumu Nsambi amamurumina. Batu bamagaangu na goma va gusu Fumu.

¹³ Aggee, yilumbi yiFumu amatsingula batu ama Fumu amamuruma rie: Fumu amavosa rie: Nyiji nenu nana nyimavanginina,

¹⁴ Fumu amasibisa Zorobabel agumaba murumitsi uJuda na Yechoua agumaba yivunda yibavagulitsi bapagu na batu botsu na bamawenda uyebanda yisalu yiNdagu Nsambi aguvu Fumu Mabadi,

¹⁵ mu yilumbu yimagumabeji na bina bitsungi jimusiamunu mu yilima yieni.