Abdias 1 - La Sainte Bible en Langue Yipunu

¹ Amama la mambu ama Fumu Nsambi amalasa Abdias; mambu ama amamurumisa uvosa mu diambu diEdom. Tumagulu musamu agumaruyila ombu Fumu na yilumbi ayimatindu ombu bisi malongu rie: Retsama, tʼwendianu uyetoga divita na Edom!

Fumu utubula etubuli dubungu duEdom

² Fumu amavosa rie: Edom, nyugugeyisa vaʼgari malongu, gulensungu tindi ulensu!

³ Dunangu duagu dumagutsiemusa, ndeʼ agutsana o gari tsimamanyi nesi o mbura tsijulu; guikewivula rie: Anyi onsundusa?

⁴ Ne pa gurunga diuva diagu o julu uviolila mbira ne pa gudirunga va gari bambuelili nyugusundusa. Menu Fumu oyidivosi.

⁵ Pa badayitsi nesi bakinditsi boruga mukolu ka muna dubungu du! Bobonga abi bagorungula unangula! Gukindu tindi ukindu. Pa batsonsiyitsi bokota o nungi agu, bogusila yika mua bisaga.

⁶ Ka yia! Bategula baEsau bamafugu! Bilundulu biandi bivu jalala.

⁷ Botsu abamafubana nogu bamagubingisa te no mandilu, bambatsi bagu bamagudunsa na bamagubetsa, jogu abamajanganga biguji biagu bamagurambila mirambu. Bevosi rie: Malengu mandi maka?

⁸ Menu Fumu nyiwarisi rie: Mu yilumbu yikabu ami nyutsiemusa bango diela baEdom, ngosila nesi mungo dujabu umosi o mikongu mieni.

⁹ Aa Teman, bangogaga bagu bobakama mirima mu mbari bagora botsu babulongu boboku.

Bisi Edom bamasangila purulu tsibaIsrael

¹⁰ Mu diambu didikasi adi dumalasa baana bataji benu abavu bategula baJacob dulasu tindi yisonyi na dubungu duagu duba mutubu.

¹¹ Yilumbu ayi dumabagengila yika ugengila, benyi bamakotisa bagora o misiengi miogu. Ava benyi beni bamabuayila busina buJerusalem mbanda jenu wenu dumaba va gari ogu.

¹² Ndeʼ Edom guyalaba ubueji muna yilumbu ayi muana agu elabili maguga, guyasangila ava baJuda bebungulu na guyabasienga ava belabili maguga!

¹³ Guyakota o misiengi mibatu bami mu yilumbu yidubungu. Guyasangila maguga mogu mu yilumbu ayi bogudusulu, guyakinda bima muna yilumbu yieni!

¹⁴ Guyaretsama va mabaga; uyenabokangaabandi aberini na guyawakisa bansialutsu bandi ombu abebarombi.

¹⁵ Mu mbari yilumbu yiFumu yika bebeli ayi otabulila malongu motsu bunsonsi. Guvagulu nana gumavayila, gusaku dedi mosi nabisalu biagu.

BaIsrael bogabusila Edom pila

¹⁶ Nana dumanuinanga kopa ami jikabu va julu mukongu ami anana bisi malongu motsu bojinuinanga; bonuanganga na bolanganga mbana botsiemuga nderi basamaleba.

¹⁷ Tumba voba bansialutsu bamosi o julu mukongu uSion. Avana voba mbura Fumu na bategula baJacob bomuedila yiari yiogu.

¹⁸ Bategula baJacob boba nderi muji; bategula baJoseph boba nderi milutsu mimuji na bategula baEsau boba nderi diguki dibilonga adiunyensu nosielusunu. Vagosiala ne yimosi. Menu Fumu oyidiwarisi.

BaIsrael bomuedila malongu mogu

¹⁹ BaJuda bobialila bulongu buEdom o tandu te no kumu o yiari yibaPhilistin te no Samarie o yiari yibaEfraim. BaBenjamin bobialila Galaad.

²⁰ Bakoli abavu dibadi dineni dibaIsrael babanda bobialila bulongu buPhenicie te no Sarepta. Bakoli baJerusalem abavu o Sefarad bobialila misiengi mitandu.

²¹ Na ndungulu bomata o mukongu uSion, avana boruminanga Edom. Fumu obanganga kaga!