2 Timothee 3 - La Sainte Bible en Langue Yipunu

Bilumbu abiusita

¹ Jaba yiri bilumbu biusita biuba bivura.

² Mu mbari batu bokeronda na boba na jiba mbongu na boba na durutsu na dunangu; boba basabulitsi na boba mimbini ombu bataji na banguji bogu na bagoba na kabusulu tsimaboti na bagoba na miyitsa

³ na boba na mirima migala na mulengudunguga na balensitsi na bukanyi na boba bango dikasi

⁴ na boba batu abevini bavayitsi bamaboti na boba na penda na dimbunga na boba bango dunangu na borondanga nsala tsiogu na bagoronda Nsambi.

⁵ Bolasa nderi baji abebagunu na Nsambi tumba bobusa mangolu mandi. Kakana na batu beni.

⁶ Va gari ogu vavu bamosi abeduki bagetu abavu na mirima mideda na abagaa na diela diwelimina. Diwendi rie: bakivu bavayitsi bamasumu na bakivu na nsala tsimunongu na munongu.

⁷ Temu tsiotsu bagetu beni bewijingi tumba bagorungula utsiyisa ujaba ngensa.

⁸ Nana Jannes na Jambres bamagayinina na Moise munongu mosi batu beni begayini na ngensa, bagejabi utsiyisa mambu na bagaa na yitu.

⁹ Tumba bagoduta bapuela mu mbari buduka buogu builabini ombu botsu nana buduka buJannes na Jambres bumalabinina.

Malongi amosita

¹⁰ Ndeʼ gumagulu malongi mami na gumalaba yitu yiami na pugu ami na durondu duami na usigama uami

¹¹ nanananyimalabila makuana na maguga. Ka muna maguga ma nyimalaba o Antioche na Iconhim na Lystre! Ka muna maguga ma nyimawarila! Fumu amakobula mu motsu.

¹² Kabogu botsu abamafubana mirima na Jesus Christ na aberondi ubagunu na Nsambi bokuanu.

¹³ Balensitsi na bafuritsi bobuesa dibi va julu dibi na bodunsa basusu na bokedunsa wandi.

¹⁴ Ndeʼ ba usigama na guyalibana ngensa aji gumagulu na aji gumavayila yitu. Guijabi milonsi miagu

¹⁵ na ubanda va bungeba buagu gumawiji Bisonu abimagulonsa dugobutsu aduiruyili ava mutu evayili Jesus Christ yitu.

¹⁶ Bisonu biotsu biruyili ombu Nsambi na bivu biwelimina ulonsa ngensa, novega mbela nosiemba nolonsa dusungugu

¹⁷ yiri mutu Nsambi abi adugu na awelimina usala bisalu biotsu biboti.