2 Samuel 9 - La Sainte Bible en Langue Yipunu

¹ Yilumbu yimosi David amakewivula rie: Vakisiala mutu mu mukuta uSaul yiri nyumuvaga maboti mu dimabu diJonatan?

² Vamaba musalitsi umukuta uSaul diina diandi Siba agu bamabega ombu David. Kaga amamuwivula rie: Ndeʼ la Siba? Amawagula rie: Nyiina, menua.

³ Kaga amamuwivula rie: Vesaa mutu aguvu mu mukuta uSaul yiri nyumuvayila maboti maNsambi? Siba amawagula kaga rie: Vakivu muana dibaala uJonatan aguvu yibomfi yimakulu.

⁴ Kaga amamuwivula rie: Agunyi avu? Siba amawagula kaga rie: Avu o ndagu Makir muana dibaala uAmmiel o Lo-Dabar.

⁵ Kaga David amamusindiga uyemubonga o ndagu Makir muana dibaala uAmmiel o Lo-Dabar.

⁶ Mefibaal muana dibaala uJonatan agumaba muana dibaala uSaul amawagula David, amagudama va tsi va gusu andi. David amawivula rie: Ndeʼ la Mefibaal? Amawagula rie: Nyiina kaga!

⁷ David amamutsingula rie: Guyalaba keri, nyiiundi uguvaga maboti mu diambu ditaji agu Jonatan. Nyuguvega misiru miotsu mikaga agu Saul na gujanganga nami temu tsiotsu.

⁸ Amagudama na amawivula rie: Yi yivu na musalitsi agu yiri gukipa mondi ajimafu kala nana menu?

⁹ Kaga amanengila Siba musalitsi uSaul na amamutsingula rie: Nyiveyi biotsu abimaleba bifumu agu Saul ombu mutegula ufumu agu nombu mukuta andi uotsu.

¹⁰ Gubisalanga, jenu na baana bagu bababaala na basalitsi bagu bababaala mbana gutsonsiga digumba yiri mutegula ufumu agu odilanga biguji. Mbe ka Mefibaal ojanganga nami temu tsiotsu. Siba amaba na yigumi na baana baranu bababaala na magumabeji mabasalitsi.

¹¹ Amatsingula kaga rie: Nyuvaga motsu ama guitumi. Mefibaal amajanganga na David nderi muana kaga avu.

¹² Mefibaal amaba na muana dibaala diina diandi Mika. Botsu abamatsananga o ndagu Siba bamaba basalitsi baMefibaal.

¹³ Mefibaal amaba yibomfi yimakulu la dibandu amatsaninanga o Jerusalem yiri orungula uwendanga bilumbu biotsu uyeji ombu kaga.