2 Samuel 8 - La Sainte Bible en Langue Yipunu

David ubelisa ebelisi malongu amamabambana nandi

¹ Adina dinovioga David amabelisa baPhilistin na amabalasa yisonyi na amabapatula mbura tsiogu.

² Amabelisa bisi Moab; amabasiliga mulonga mu tsi mbana amabagaba makabu marieru, amabokisa makabu mabeji na dikabu dimosi dimadila monyu. Kabogu bisi Moab bamaba o tsi durumu duDavid na bamamufutila lepu.

³ David amabelisa Hadadezer muana dibaala uRehob agumaba kaga jiSoba ava amayewarisila durumu duandi te no mujamba uEuphrate.

⁴ David amamupatula tosini na yisambuali yikama tsibabeyitsi babakabala na magumabeji matosini tsibagora; amatabula miansi mimakulu mibakabala abamadutanga makalu, amakelisa yika kama mosi buandi.

⁵ BaSyrie abamatsananga o Damas bamawenda uye wamusa Hadadezer; David amabelisa magumabeji matosini na tosini beji tsibaSyrie.

⁶ David amasunsa barumitsi o Syrie o Damas. BaSyrie bamaba o tsi durumu duDavid na bamamufutila lepu. Fumu amabambanga David mbura tsiotsu atsi amawendanga.

⁷ David amapatula bagora baHadadezer ngubu tsiogu tsilora na amayenatsibega o Jerusalem.

⁸ Va julu vana amabonga kunga tsipuela o Betah no Berotai, misiengi miHadadezer.

⁹ Toou kaga jiHamat amagulu yiri David amabelisa dibadi diotsu diHadadezer.

¹⁰ Amasindiga Yoram muana andi udibaala ombu kaga David uyemuvega mbolo noyemukakisa mu mbari amatumuna Hadadezer na amamubelisa. Diwendi rie: Toou na Hadadezer bamavinasana. Yoram amamubeyila bima bilora jivema na bilora na bikunga.

¹¹ Kaga David amabiwakisa ombu Fumu nana amalewakisila lora jivema na lora abi amabongila o malongu motsu ama amabelisa:

¹² nesi o Syrie nesi o Moab nombu baAmmon nombu baPhilistin nombu baAmalec na abimakindu ombu Hadadezer.

¹³ Ava amaruyila o ubelisa baSyrie David amamuedila diduma disusu. Amabelisa yigumi na yinana yitosini tsibaEdom o yibususu yimusayi.

¹⁴ Amasunsa barumitsi o Edom na baEdom bamaba o tsi durumu duandi. Fumu amabambanga David mbura tsiotsu atsi amawendanga.

Miina mabaneni baDavid

¹⁵ David amarumanga o Israel na dusungugu na asamaba na dupasu.

¹⁶ Joab muana dibaala uSerouia amarumanga bagora; Yochafat muana dibaala uAhiloud amaba musonitsi;

¹⁷ Sadoc muana dibaala uAhitoub na Ahimelek baana bababaala baAbiatar bamaba bavagulitsi bapagu; Seraya amaba musonitsi;

¹⁸ Benaya muana dibaala uYoyada amaba yivunda yiCrete na baPeletie; baana bababaala baDavid bamaba bavagulitsi bapagu.