2 Samuel 6 - La Sainte Bible en Langue Yipunu

David amatabula diambu ubega yigara yipangini yiNsambi o Jerusalem

¹ David amamubengusana bagora baIsrael abamasolu: dutalu duogu dumaba magumarieru matosini.

² David na bagora bandi bamarambuyila o Baala o Juda uyebonga yigara yipangini yiNsambi ayimanengulungu na diina diFumu Mabadi aguitsani va gari bibagunu bibiansa abimaba va julu yigara yipangini.

³ Bamanangiga yigara yipangini yiNsambi mu dikalu digona; yimaleba o ndagu Abinadab o julu mukongu. Ouza na Ahio, baana bababaala baAbinadab bamabega dikalu.

⁴ Bamayipalisa o ndagu Abinadab o julu mukongu; Ouza amayenawendanga va mugula uyigara yipangini yiNsambi, Ahio amawendanga va gusu yigara yipangini.

⁵ David na baIsrael botsu bamayenasiganga bisigu bimisipara bimunongu na munongu va gusu Fumu diwendi rie: basambi na bangomfi na bandungu na miguaga na bambumbu.

⁶ Ava bamatolila va yisagulu yiNakon, Ouza amasamba dikaka o yigara yipangini yiNsambi, amayigaanga mu mbari bangombi bamayirekiga.

⁷ Fumu amanyoyila Ouza tindi kabu, Nsambi amamuboka vana vana mu diambu diutsimbu uandi. Ouza amafuila vana mugula uyigarayipangini.

⁸ David amanyoyila Fumu mu mbari amakilisa Ouza mukilu udufu. Te na namunyi mbura eni jinengulungu Peres-Ouza.

⁹ Mu yilumbu yieni David amalaba Fumu goma na amuwivula rie: Tsie yigara yipangini yiFumu yiukotila ombu gami?

¹⁰ Kabogu David asamaba na murima umuekotisa yigara yipangini yiFumu o musiengi andi; amaruma batu uyibega o ndagu Obed-Edom agumaba muisi Gat.

¹¹ Yigara yipangini yiFumu yimatsana tsungi yirieru o ndagu Obed-Edom; Fumu amagabila Obed-Edom miula va mosi na abandi botsu.

Yigara yipangini yiFumu yimatola o Jerusalem

¹² Bamayetsingula kaga David rie: Fumu amagabila bisi ndagu Obed-Edom na biandi biotsu miula mu diambu diyigara yipangini yiFumu. Kabogu David amaweoda uyebonga yigara yipangini ombu Obed-Edom, amayenayibega o musiengi andi na nsangu jineni.

¹³ Jogu abamabeganga yigara yipangini yiFumu banonangula taka yisiamunu, David amavagula ngombi mosi na muvogulu ngombi uvonga pagu.

¹⁴ David amayina tindi uyina va gusu Fumu na amaduara yilinga yiyijungi yibuvagulitsi bupagu yitsanda jilina.

¹⁵ David na baIsrael botsu bamayenabega yigara yipangini yiFumu ava bamayenasangililanga na nsangu na bamayenasiyisanga mimbanda.

¹⁶ Ava yigara yipangini yiFumu yimakotila o musiengi uDavid, Mikal muana mugetu uSaul amadokimina va fenetera, amalabilila kaga David uyina ayenayina va gusu Fumu, Mikal amamulensa o tsi murima.

¹⁷ Banobega yigara yipangini yiFumu, bamayisunsa va mbura o gari ndagu jitsanda aji David amayirungila; David amavagulila Fumu pagu tsiunyensa na pagu tsikabusulu tsimaboti.

¹⁸ Anomana utsivagulila amagabila batu miula mu diina diFumu Israel.

¹⁹ Mbana amagabila baIsrael botsu: nesi babaala nesi bagetu, mutu mutu dipa na dipula dinyama na dipa digeyi adimavagu na mirayisan. Mbana mutu mutu amayenagabuga o ndagu andi.

²⁰ David amayenagabuga uyegabila bisi ndagu andi miula. Mikal muana mugetu uSaul amayemubengusana na amavosa rie: Ka muna duyitsu du duvu na kaga jiIsrael namunyi! Labatianu amakevula va gusu basalitsi bandi babagetu nesi bababaala nderi yifufu yimutu!

²¹ David amawaka Mikal rie: Va gusu Fumu agumapega musuga ne uviolila utaji agu ne na bisi ndagu andi botsu ava amansolila sefu jibatu bandi baIsrael; o gusu nyumueyinina va gusu Fumu.

²² Nyumuekesundusa ne nana ngolensu na basalitsi beni babagetu aba guivosi.

²³ Kabogu Mikal muana mugetu uSaul asamabura baana te na dufu duandi.