2 Samuel 5 - La Sainte Bible en Langue YipunuDavid amabiatsu kaga jiIsrael ( 1 Mis 11.1-3 ) 1 Bifumba biotsu biIsrael bamawenda ombu David o Hebron na bamavosa rie: Guluati, jetu nenu tuvu mbembu jimosi na mukuta umosi. 2 Kala kala, ava Saul amabila kaga etu, gumawendisanga bagora baIsrael o mavita; na gumabagabusanga. Fumu amaguruma rie: Gukabungulanga batu bami baIsrael na gubanganga sefu jiIsrael. 3 Bivunda biotsu biIsrael bamawenda ombu kaga o Hebron. David amavangana pangini nogu va gusu Fumu o Hebron. Bamabiatsa David kaga jiIsrael. 4 David amaba na magumarieru mabilima ava amabiatsulu kaga na amarumanga magumana mabilima. 5 Ava amabila o Hebron amarumanga baJuda yisambuali yibilima na yibuku; o Jerusalem amarumanga baIsrael botsu va mosi na baJuda magumarieru na bilima birieru. David ubonga ebongi Jerusalem ( 1 Mis 11.4-9 ; 14.1-2 ) 6 Kaga David na badukitsi bandi bamaweliga ubonga Jerusalem. BaJebusie abamaba bisi bulongu bamaisingula David rie: Gugoruga gunu, nesi bidunga nesi bitsondu bogubinga! Diwendi rie: Bamatasa David agorungula ukanda musiengi. 7 Tumba David amabonga musiengi uSion agumaba na bivaga; amaguluga musiengi uDavid. 8 Muna yilumbu yieni David amavosa rie: Pa mutu erondi ubelisa baJebusie amati o mudungutu ubadala. Nyivini tindi uvina bitsondu bieni na bidunga bieni! La dibandu bevosili rie: Bidunga na bitsondu bayakotusu o Ndagu Fumu. 9 David anotsana o musiengi ukandu amaguluga musiengi uDavid. Amarungila bivaga yiari na yiari te no gusu kana Millo. 10 Buneni buDavid bumaviolila uroga mu mbari Fumu Nsambi Israel amabanganga nandi. 11 Hiram kaga jiTyr amatinda bilumbi ombu David na tsimbi tsisedera na barungitsi bamandagu na bapakitsi bamamanyi abamayerungila David ndagu. 12 David amatsiyisa yiri Fumu amamuwarisa mu bukaga buIsrael na amaroyisa bufumu buandi mu diambu dibatu bandi baIsrael. Baana bababaala baDavid abamaburulu o Jerusalem ( 1 Mis 3.5-9 ; 14.3-7 ) 13 Anoruyila o Hebron David amamuebonga maronda na bagatsi baJerusalem, bamamuburila baana bababaala na babagetu. 14 Miina mabaana bandi bababaala abamaburulu o Jerusalem amama: Chammoua na Chobab na Natan na Salomon 15 na Ibar na Elichoua na Nefeg na Yafia 16 na Elichama na Eliada na Elifelet. David ubetsa ebetsi baPhilistin ( 1 Mis 14.8-16 ) 17 BaPhilistin bamagulu yiri David amabiatsu kaga; baPhilistin botsu bamawenda uyenamuromba. David anolubusu amawenda o musiengi ukandu. 18 BaPhilistin banotola bamabasa o yibususu yibaRefaim. 19 David amawivula Fumu rie: Nyuyetoga na baPhilistin? Gubawakisa ombu gami? Fumu amatsingula David rie: Wendanga, nyuwakisa baPhilistin ombu gagu. 20 David amatola o Baal-Perassim agu amababelisila mbana amavosa rie: Dedi mosi nana nyidu jipumuyili anana Fumu amapansila bavinitsi bami. La dibandu amaluyila mbura eni Baal-Perassim. 21 BaPhilistin bamasila bakosi bogu vana, David na batu bandi bamayenababega. 22 BaPhilistin bamamuewenda na bamayebasa o yibususu yibaRefaim. 23 David amamuewivula Fumu; Fumu amamugandisa rie: Guyawenda; gukavioga o nsima ogu, gutolila ombu gogu va nsungisini na musiru umikokolia. 24 Ava gugululu mikindu o mandeka mamikokolia, vola muendu mu mbari Fumu amarela o gusu agu ugubelisila bagora babaPhilistin. 25 David amavaga adi Fumu amamuruma na amabelisa baPhilistin ubandila o Gueba te no Guezer. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon