2 Samuel 4 - La Sainte Bible en Langue Yipunu

Baana na Rekab uboka beboki Ichebaal

¹ Ava Ichebaal amagululu yiri Abner amafuila o Hebron, mangolu mamamusuka na baIsrael botsu bamagamuga na keri.

² Ichebaal amaba na basefu babeji bamabuli mandi: umosi Baana, ususu Rekab; jogu bamaba baana bababaala baRimmon muisi Beerot mu dibuli dibaBenjamin. (Beerot umaba musiengi umosi va gari misiengi mibaBenjamin

³ na baBeerot bamarina Guittaim, aguna betsanini te na namunyi.)

⁴ Jonatan muana dibaala uSaul amaba ria muana dibaala agumaba yibomfi yimakulu agumaba na bilima biranu ava misamu mdidufu duSaul na duJonatan mimaruyila o Jizreel. Ndetsi andi amamunangula na bamayenarina; amarina mbangu na amabondusa muana agumasiala yibomfi; diina diandi Mefibaal.

⁵ Kabogu baana bababaala baRimmon muisi Beerot, Rekab na Baana bamawenda o ndagu Ichebaal va muangulu ava amabila asiiama yilu yimuangulu.

⁶ Bamakota te no gari ndagu Ichebaal nderi bebeyi tsangu tsible na bamamunonga mu moji; mbana Rekab na muana taji andi Baana bamayenarina.

⁷ Diwendi rie: bamakota o ndagu ava amavumina va tangi andi o yibuku yiandi yindagu, bamamuboka mbana bamamutabula muru. Bamabonga muru andi na bamayenawenda mukolu uotsu o yibususu.

⁸ Bamabega muru uIchebaal ombu David o Hebron na bamatsingula kaga rie: Labati muru uIchebaal muana dibaala uSaul aguvu muvinitsi agu agumarondanga uguboka; namunyi Fumu amagabusilila kaga pila ombu Saul na baana bandi.

⁹ David amawaka rie: Fumu agumakwaka kalala mu bilumbu biotsu ejabi!

¹⁰ Lesa jandi agumaruga uyinsingula rie: Guluati, Saul amafu, amatasa yiri ensinguli musamu uboti, nyimamugaangisa na nyimamubokisa o Siclag, nyimamusaka mu bulumbi buandi,

¹¹ tambusa na batu babi abamayevuna mutu va tangi andi agugaa na diambu nesi o ndagu andi? Ngodugabusila pila jimalungu mandi?

¹² David amaruma bagora bandi ubaboka; bamabatabula makaka na makulu mbana bamabaviunsa va mugula udianga diHebron. Va julu vana bamabonga muru uIchebaal, bamagutsiga o ngila jiAbner o Hebron.