2 Samuel 3 - La Sainte Bible en Langue Yipunu

¹ Divita dimatsinga va gari baSaul na baDavid. Mangolu maDavid mamaviolila mangolu maSaul; amandi mamasuka.

Baana bababaala baDavid abamaburulu o Hebron

² David amabura baana bababaala o Hebron. Amnon amaba tsomi andi agu Ahinoam muisi Jizreel amamuburila;

³ agumabeji Kilab agu Abigail muisi Karmel agumaleba mugatsi Nabal amamuburila; agumurieru Absalom muana dibaala uMaaka muana mugetu uTalmai kaga jiGuechour;

⁴ agumuina Adonia muana dibaala uHaguie; agumaranu Chefatia muana dibaala uAbital;

⁵ agumasiamunu Itream muana dibaala uEgla. Abana baana bababaala aba David amaburila o Hebron.

Abner unyoga enoyili Ichebaal

⁶ Yitsingu yiotsu yidivita adimaba va gari baSaul na baDavid, Abner amamanina mangolu mandi uwamusa baSaul.

⁷ Kabogu Saul amaba na dironda, diina diandi Rispa muana mugetu uAya. Ichebaal amawivula Abner rie: Dibandu yi gutsifubana yitsiga na mugatsi utaji ami?

⁸ Abner amanyoga tindi unyoga mu diambu diposulu tsiIchebaal na amawaka rie: Meʼ mondi nyivu ajiudusumbisa ombu bisi Juda? Te na namunyi nyimamanina mangolu mami ombu bisi ndagu taji agu Saul nombu baana bataji bandi nombu bambatsi bandi na nyisamaduwakisa ombu David; va julu vana ufuengilila guimfuengilili yiri nyina diambu na mugetu egugu!

⁹ Abner amavosa rie: Nsambi andasi maguga pa ngodugusulu David motsu ama Fumu amavangana nandi.

¹⁰ Fumu amavosa rie: Nyupatula Saul bufumu no buvega David; Israel jiotsu: nesi Juda nesi Dan te no Bercheba.

¹¹ Ichebaal asamamuerungula ukalila Abner ne diambu dimosi mu mbari amamudumanga.

Abner amakevega ombu David

¹² Abner amatindi bilumbi ombu David uyemuwivula rie: Bulongu bunyi? Vangana pangini nami na nyuguwamusa uyingusa baIsrael botsu ombu gagu.

¹³ David amawaka rie: Diwelimina, nyuvangana pangini nagu. Ne nana gugondaba pa gugombeyila Mikal muana umugetu uSaul umuetsana nami.

¹⁴ David amatinda yilumbi ombu Ichebaal muana dibaala uSaul uyemutsingula rie: Peyi mugatsi ami Mikal agu nyimawelila na kama misosu mibaPhilistin.

¹⁵ Ichebaal amatinda mutu uyemulanda ombu mulumi andi Paltiel muana dibaala uLaich.

¹⁶ Mulumi andi amayenamudukanga nolila te no Bahourim. Mbana Abner amamuruma rie: Gabuga! Amayenagabuga.

¹⁷ Abner amamoga na bivunda biIsrael na amabatsingula rie: Dumaba na tindi nsala yiri David oba kaga enu.

¹⁸ Tsie muvayianu kaga mu mbari Fumu amamuvosila rie: La mu musalitsi ami David nyuwakila batu bami baIsrael kalala ombu baPhilistin nombu bavinitsi bogu botsu.

¹⁹ Abner amavosa na baBenjamin wandi na amayetsingula David o Hebron ama baIsrael na baBenjamin bamatabula.

²⁰ Abner amatola ombu David o Hebron, jogu na magumabeji mababaala, kabogu David amabalambila mulambu.

²¹ Abner amatsingula David rie: Fumu ami nyuwenda uyegukiga baIsrael ombu gagu, jogu bovangana pangini nagu na ndeʼ gubarumanga nana guirondili. David amaganina Abner agumayena-wenda na buranga.

Joab uboka eboki Abner

²² Joab na bagora baDavid bamaruyila o divita na bipuela abimakindu. Abner asamamueba na David o Hebron mu mbari David amuganina na amayenawenda na buranga.

²³ Ava Joab na bagora bandi bamatolila bamamutsingula rie: Abner muana dibaala uNer atsiruga ombu kaga, kaga atsimugabusa na amayenawenda na buranga.

²⁴ Joab amawenda ombu kaga na amuwivula rie: Yi guivayi? Abner atsiruga ombu gagu; dibandu yi gutsimugabusila nana?

²⁵ Ndeʼ guijabi Abner muana dibaala uNer! Atsiruga uyigudionga nogulega noyijaba motsu ama guivayi.

²⁶ Joab amaganina David amasindiga batu udukilila Abner, bamamurasuna o dianga diSira kabogu bamamugabusa; David asamadijaba.

²⁷ Abner anogabuga o Hebron Joab amamubega o dikotulu dimusiengi nderi amaronda uvosa fundu nandi, avana amamunongila mu moji na amamuboka; amagabusila pila jidufu dumuana taji andi Assael.

²⁸ David anodigulu amagamuga rie: Malungu maAbner magaa va julu muru ami na magebembi bufumu buami.

²⁹ Malungu meni mavu va julu muru uJoab na bisi ndagu taji andi botsu! Te na mutubu voba mutu o ndagu Joab aguba na muvuva umalungu vo nyambi vo aguwendanga na nguangu vo aguboku na dijenga vo aguvondanga biguji biandi!

³⁰ Joab na muana taji andi Abischai bamaboka Abner mu mbari amaboka muana taji ogu Assael o divita diGabaon.

³¹ David amatsingula Joab na batu botsu abamaba nandi rie: Pasanu biduaru bienu, duaranu basiela, lilanu Abner! Kaga David amavioga o nsima yigara yimfumbi.

³² Bamatsiyila Abner o Hebron; kaga amalila va julu ngila jiAbner na batu botsu bamalila wandi.

³³ Kaga amatuba duimbu dumanyonyi mu Abner, amawimbila rie: Abner, dibandu yi gumafuila nana yiduka efuilingi?

³⁴ Makaka magu masamatungu, nesi makulu magu masamabindugu bapanga! Ne nana gumafu nana mutu ebokulu na batu babi. BaIsrael bamamuelilanga Abner.

³⁵ Batu botsu bamatsotsa David uji mua biguji ava wisi mbe usakatsimina; tumba David amaleva rie: Nsambi andasi maguga pa nyusundila uji yima yiotsu ne wisi akatsima!

³⁶ Dionyi dimajabunu na dimasingusulu na batu botsu; bamalaba ama kaga amavaganga mamaba mawelimina.

³⁷ BaJuda botsu na baIsrael basusu bamajaba yiri tsiri na musuga ukaga Abner muana dibaala uNer amabokulu.

³⁸ Kaga amawivula baneni bandi rie: Dugejabi yiri yivunda ayivu mutu muneni amafu namunyi o Israel?

³⁹ Nyikivu udeda diuleba nyimabiatsu kaga; batu beni, diwendi rie: baana bababaala baSerouia bekambisi na dikasi diogu. Fumu agabusili mutu mutu pila mu dibi diandi.