2 Samuel 24 - La Sainte Bible en Langue Yipunu

David usansama esansimi baIsrael

¹ Fumu amamuenyoyila baIsrael tindi kabu na amasibisa David rie: Wenda yesansama baIsrael na baJuda.

² Kaga amaruma Joab yivunda yibagora agumaba bebeli nandi rie: Wenda ombu bifumba biotsu biIsrael ubandila o banda te no tandu; bisansimi batu yiri nyujaba dutalu duogu.

³ Joab amatsingula kaga rie: Fumu Nsambi agu afunisi batu kama tsikumbu ne uviolila va misu magu! Tumba dibandu yi guirondili udivaga?

⁴ Kaga amawarisa diruma diandi ombu Joab nombu bivunda bibagora; mbana Joab na bivunda bibagora banosila kaga bamayesansama baIsrael.

⁵ Banosabuga Jourdain bamayetsana o Aroer o mabaala mamusiengi aguvu va gari yibususu yiGad na bamaba bebeli na Yazer.

⁶ Bamawenda o Galaad na bamagabuga o bulongu bubaHitt o Cades no Dan-Yaan te no mbanda tsi jiSidon.

⁷ Bamawenda te no yivaga yiTyr no misiengi miotsu mibaHivie na mibisi Canaan. Bamasitisa o tandu Juda o Bercheba.

⁸ Anana bamalingila o bulongu buotsu mbana bamagabuga o Jerusalem; bamamana yifu yimiweli na magumabeji mabilumbu.

⁹ Joab amawakisa muganda udutalu dubatu abamasansumu ombu kaga; o Israel umaba yinana yikama tsitosini tsibagora abamatoganga mavita; o Juda umaba kama yiranu tsitosini.

Nsambi ukilisa ekilisi David

¹⁰ David anomana usansama batu amabasa na munyongu la dibandu amatsingulila Fumu rie: Nyimavaga dibi ava nyimadivayila! Kokolu tsiagu Fumu, singa utandila musalitsi agu dibi adi nyimavaga. Nyimadivaga na buduka.

¹¹ Kedi David anorambuga Fumu amatsingula Gad mubiyitsi uDavid rie: Wenda ombu David nomutsingula rie: Fumu jandi rie:

¹² Nyimatasa mikilu mirieni ugukilisa; sola umosi mbana nyudivaga.

¹³ Gad amarasuna David na amamujabisa diambu ava amamuwivulila rie: Guirondi yisambuali yibilima bidungosu dunsala o biilongu buagu? Je guirondi miweli miriem ami guyenarininanga bavinitsi bagu abogubingisanga? Je guirondi bilumbu birieru biyivunga o bulongu buagu? Tsie tabuli diambu; gukawagula adi nyuyetsingula agumansindiga.

¹⁴ David amawagula Gad rie: Goma jineni nyilabi! Mbe ka menu nyukewakisa ombu Fumu mu mbari ana yingeba yineni; tumba nyiyawakusu ombu batu.

¹⁵ Kabogu Fumu amatinda yivunga o Israel, ubandila kedi te na diweru adimavosu; na ubandila o yiari yimosi te no yiari yisusu yidilongu: vamafu magumidusambuali matosini tsibabaala.

¹⁶ Ava yiansa yiFumu amasambila dikaka o Jerusalem ugubunga Fumu amakalula diela mu diambu didibi dieni na amatsingula yiansa ayimabokisanga batu rie: Vana dedi! Sundusa gogu agu. Yiansa yiFumu yimaba bebeli na yisagulu yiAravna muisi Jebusie.

¹⁷ David amalabilila yiansa uboka yiyenaboka batu; amatsingula Fumu rie: Labati, nyimavaga dibi! Motsu mana mavu va julu muru ami. Batu bebaba dibi yi bamavaga? Kilisa jetu na mukuta ami!

David urunga erungili Fumu yinyensulu yipagu

¹⁸ Muna yilumbu yieni Gad amarasuna David na amamuruma rie: Tʼwendi uyerungila Fumu yinyensulu yipagu va yisagulu yiAravna.

¹⁹ David amadedila diufi diGad nana Fumu amamurumina.

²⁰ Aravna anobuaga misu amalaba kaga na basalitsi bandi uruga beruyi ombu gandi; Aravna amapala; amakebuaga va gusu kaga na amagudama va tsi.

²¹ Aravna amawivula rie: Kaga dibandu yi guiniyili ombu gami? David amawaka rie: Uyisumba yisagulu noyirungila Fumu yinyensulu yipagu yiri yivimga yieyiyi yiugusulu.

²² Aravna amawaka David rie: Kaga abongi yisagulu na avaguli pagu tsiandi nana erondili. Bonga bangombi uvagula pagu jiunyensa na tsimbi tsimakalu tsiuba mikansu.

²³ Aravna amavega biotsu ombu kaga mbana Aravna amatsingula kaga rie: Fumu Nsambi agu asingi pagu agu!

²⁴ Tumba kaga amawaka Aravna rie: Nesi! Nyugufutila biotsu bina; ngovagulila Fumu Nsambi ami pagu tsiunyensa atsi ngaafuta. Kabogu David amasumba yisagulu na bangombi abi amafuta magumaranu mambongu.

²⁵ David amarungila Fumu yinyensulu yipagu vana na amavagula pagu tsiunyensa tsiminongu na minongu na pagu tsikabusulu tsimaboti. Mbana Fumu amamuebalasa maboti mandi na yivunga yimatsiemuga o Israel.