2 Samuel 23 - La Sainte Bible en Langue Yipunu

Mambu mosita maDavid

¹ Amama la mambu mosita maDavid: Guluanp mambu maDavid muana dibaala uJesse, mambu mamutu agumavegu durumu, agu Nsambi Jacob amasola kaga agu baIsrael bamaronda ugulu uwimbila.

² Yinyunyi yiFumu amaposisa mambu mandi mavu mu munu ami.

³ Nsambi Israel amavosa, dimanyi diIsrael dimansingula rie: Jandi oyirumi batu na dusungugu la jandi oyirumi na goma Nsambi,

⁴ avu dedi nayijalala yikedi ava wisi uibalili na kedi jigaa na mamungi; misasi miandi, mfula jinokamuga, mibendisi biriri.

⁵ Anana Nsambi evayili bisi mukuta ami; mu mbari amavangana pangini jimutubu nami, pangini ajivu jidugu ajikelusu na usigama. Nyiina, omfunisila maboti mami, Agokwamusa yiri ngobunsa pangini tsiami tsiotsu?

⁶ Tumba batu abelensi Nsambi botsu bavu nderi matsiendi ama bebuayi na magenangulu na makaka;

⁷ oyimabembi vengu na budilu vo pandi dikongu, bemanyensi vana mbura eni.

Batoyitsi badivita baDavid

⁸ Amama la miina mabatoyitsi bamangolu baDavid: Ichebaal muisi Hakamonie; jandi amaba yivunda yimosi yibagora. Amanonga yinana yikama tsibabaala dikongu diandi aba amaboka va temu mosi.

⁹ Va julu vana Elazar muana dibaala uDodo agumaba mutegula uAhoa. Jandi amaba mutoyitsi mavita umosi va gari barieru abamatoyisa baPhilistin va mosi na David abamagukama utoga, tumba bagora baIsrael bamayenarinanga o julu tsimikongu.

¹⁰ Elazar amarelama na amadimba baPhilistin te na dikaka diandi dimaguva na dimanama na dijenga diandi. Fumu amabalungisa tindi ulungisa muna yilumbu yieni. Bagora bamayenadukanga Elazar yika uyebonga abi bamakindanga.

¹¹ Va julu vana Chamma muana dibaala uAgue muisi Harar. BaPhilistin bamababagukama o Lehi. Avana vamaba nungi ajimaba yika mapuitingi na mapuitingi; bagora baIsrael bamarinanga baPhilistin.

¹² Tumba Chamma amaretsama va gari nungi eni ujikelisanga na amabelisa baPhilistin. Kabogu Fumu amalungisa tindi ulungisa baIsrael.

¹³ Yilumbu yimosi bivunda birieru va gari magumarieru mabivunda bamawenda va temu dutsonsugu ombu David agumaba o dilima diAdoullam ava bagora babaPhilistin bamavayila milaku o yibususu yibaRefaim.

¹⁴ David amaba o gari yivaga na bagora babaPhilistin bamaba o Bethleem.

¹⁵ David amagulu puila na amawivula rie: Anyi opega mamba mayiduna ayivu va dikotulu dimusiengi Bethleem?

¹⁶ Mbana bivunda bieni birieru na bukidi buogu buotsu bamavioyila va milaku mibaPhilistin na bamayetega mamba o yiduna ayimaba va dikotulu dimusiengi Bethleem. Bamabega mamba meni ama bamayewakisa David; tumba amabusa unu; amamavagulila Fumu ava amamapuyila vajsi.

¹⁷ Amavosa rie: Aa Fumu, viaga, ngaa na musuga unu mamba memama. Nyunu malungu mababaala beni abatsibutsiemusa mionyi miogu? Kabogu amabusa umanu. Anana batoyitsi beni barieru bamavayila.

¹⁸ Abichai muana taji Joab muana dibaala uSerouia amaba yivunda yimagumarieru meni. Yilumbu yimosi amanonga kama yirieru tsibabaala na dikongu diandi na amababoka; amadumusu va mosi na magumarieru meni.

¹⁹ Jandi amayitsu uviolila basusu na mu dionyi amaba yivunda yiogu; tumba asamaba dedi na barieru batega.

²⁰ Benaya muana dibaala uYoyada mutegula umuisi Cabseel amajabunu na bisalu biandi bineni. Amadimba babaala babeji baMoab abamaba na mangolu maneni nderi bimbungu. Yilumbu yimosi amasunduga o gari yiduna, aguna amadimbila yimbungu yilumbu ayi mfula jivema jimanoyila.

²¹ La jandi agumamuedimba muisi Egypte agumaba na yinsi yiboti. Muisi Egypte eni amaba na dikongu va dikaka diandi, Benaya amayetoga nandi na nguangu. Amapatula muisi Egypte eni dikongu: na dikongu dijaʼ beni amamubokila.

²² Anana Benaya amavayila; amakakusu va mosi na magumarieru.

²³ Amagobusu uviolila magumarieru meni; tumba asamaba dedi na barieru beni batega. David amamusikiga uba mukelisi andi.

²⁴ Abamaba mu dutalu dueni dumagumarieru ababa: Assael muana nguji uJoab na Elanan muana dibaala uDodo muisi Bethleem.

²⁵ Na Chamma muisi Harod na Elica muisi Harod,

²⁶ Heles muisi Pelet na Ira muana dibaala ulquech muisi Tecoa,

²⁷ Abiezer muisi Anatot na Mebounnai muisi Houcha,

²⁸ Salmon muisi Ahoa na Marai muisi Netofa,

²⁹ Heleb muana dibaala uBaana muisi Netofa na Ittai muana dibaala uRibai muisi Guibea ubaBenjamin,

³⁰ Benaya muisi Piraton na Hiddai bisi mujamba uGaach,

³¹ Abialbon muisi Bet-Araba na Azmavet muisi Bahourim,

³² Eliaba muisi Chaalbon muana dibaala uYachen na Yonatan,

³³ Chamma muisi Harar na Ahiam muana dibaala uCharar muisi Harar,

³⁴ Elifelet muana dibaala uAhasbai mutegula umuisi Maaka na Eliam muana dibaala uAhitofel muisi Guilo,

³⁵ Hesrai muisi Karmel na Paarai muisi Arab

³⁶ Igal muana dibaala uNatan muisi Soba na Bani muisi Gad,

³⁷ Selec muisi Ammon na Narai muisi Beerot agumabeganga bitogulu biJoab muana dibaala uSerouia,

³⁸ Ira muisi Yeter na Gareb muisi Yeter,

³⁹ Urie muisi Hitt. Adudu dutalu duotsu dumagumarieru na yisambuali.