2 Samuel 21 - La Sainte Bible en Langue Yipunu

BaGabaon na bategula baSaul

¹ Va temu David, vamaba dungosu dunsala adumatsinga bilima birieru. David amawivula Fumu agumamuwaka rie: Mambu memama melabini mu diambu diSaul na mukuta andi agumabokanga batu; diwendi rie: bamabokisa baGabaon.

² Mbana kaga amaruma mutu unengila baGabaon na amamoga nogu. BaGabaon basamaba mu dibuli dibaIsrael tumba bamaba bansialutsu baAmor; na baIsrael bamavangana na pesi yiri bagobaboka. Tumba Saul na durondu dubaIsrael na baJuda amaweliga ubatsiemusa botsu.

³ David amawivula baGabaon rie: Yi nyurungula uduvayila? Yi nyurungula uvaga utsiemusa dibi yiri dugabila batu baFumu miula?

⁴ BaGabaon bamamuwakaʼrie: Tugaa na nsala jilora jivema nesi jilora nesi ubokisa muisi uIsrael ukunsa ametu na Saul. Kaga amawivula rie: Yi duirondi yiri nyuduvayila? Nyuduvayila dionyi.

⁵ Bamawaka kaga rie: Saul amaba na ditasa ututsiemusa mu bulongu buotsu buIsrael.

⁶ Batuwakisi yisambuali yibategula baSaul; tubasuekiga va gusu Fumu o Guibea uSaul agumaba yisolu yiFumu. Kaga amawaka rie: Nyubawaidsa ombu genu.

⁷ Kaga amawamusa Mefibaal muana dibaala uJonatan agumaba mutegula uSaul mu diambu dipangini aji David na Jonatan muana Saul bamavangana va gusu Fumu.

⁸ Tumba kaga amabonga baana bababaala babeji aba Rispa muana mugetu uAya amaburila Saul, miina mogu: Armoni na Befibaal na baana baranu bababaala aba Mikal muana mugetu uSaul amaburila Adriel muana dibaala uBarzillai o Abel-Mehola.

⁹ Amabawakisa ombu baGabaon abamabasuekiga va julu mukongu va gusu Fumu. Yisambuali yiotsu bamafu va mosi; bamabokulu mu bilumbu bitega bidutsonsugu duorsa.

¹⁰ Rispa mukuili uSaul amabonga siela amajiwala va julu dimanyi agu amasiliminanga ubanda va dibandu didutsonsugu te na mfula jimabanogulu; jandi amagubitsa batsoli ubambana na tsionyi ava nyangu na amagubitsa bibulu ava mukolu.

¹¹ Bamayetsingula David adi Rispa amavaga.

¹² David amayebonga bivisi biSaul na bimuana andi Jonatan ombu bisi Yabech o Galaad abi bamagusula o Bet-Chean va mbura aji baPhilistin bamabaleliga ava bamabelisila Saul o Guilboa.

¹³ O Yabech amayebongila bivisi biSaul na bimuana andi Jonatan; bamabonga bivisi bijogu abamalelugu wandi.

¹⁴ Bamayetsiga bivisi biSaul na bimuana andi Jonatan o bulongu bubaBenjamin, diwendi rie: o Sela o ngila jiQuich taji Saul. Bamavaga motsu ama kaga amaruma. Adina dinovioga Nsambi amamuebalasa maboti mandi.

Divita na baPhilistin

¹⁵ BaPhilistin bamamuetoga na baIsrael. David amawenda na bagora bandi uyetoyisa baPhihstin. David amadeda.

¹⁶ Ichebi-Benob muana umosi uHarafa amadila ditasa uboka David. Amaba na dikongu, utsira udionyi kilu yirieru na amaduara dijenga digona.

¹⁷ Abichai muana dibaala uSerouia amayewamusa David, jandi amadimba muPhilistin na amamuboka. Mbana bagora baDavid bamamulenda rie: Guyamuewenda netu o utoga, gukeetsimisa lambi jiIsrael.

¹⁸ Adina dinovioga bamamueba divita disusu na baPhilistin o Gob. Mbana Sibkai muisi Houcha amaboka Saf agumaba muana umosi uHarafa.

¹⁹ Vamamueba divita disusu na baPhilistin o Gob. Elanan muana dibaala uYari muisi Bethleem amaboka Goliath muisi Gat agumaba na dikongu adi pandi jimaba nderi munongu umubuangitsi.

²⁰ Vamamueba divita disusu o Gat aguna gumaba gora ajimaba na yirela yisakama ajimaba na milembu misiamisiamunu mu makaka na mu makulu, diwendi rie: magumabeji na milembu mina na jaʼ wandi amaba muana uHarafa.

²¹ Jandi amasienganga baIsrael; Yonatan muana katsi uChamma agumaba muana katsi uDavid amamuboka.

²² Bagora beni bana bamaba baana baHarafa o Gat. Bamaboku na David na bagora bandi.