2 Samuel 2 - La Sainte Bible en Langue Yipunu

O Hebron David amabiatsu kaga jiJuda

¹ Va julu vana David amawivula Fumu rie: Je nyuwenda o musiengi umosi va gari misiengi miJuda? Fumu amamuwaka rie: Wenda. David amawivula rie: Agunyi nyuwendasana? Fumu amawaka rie: O Hebron.

² David amawenda guna na bagatsi bandi babeji: Ahinoam muisi Jizreel na Abigail muisi Karmel agumaleba mugatsi uNabal.

³ David amabega badukitsi bandi; mutu mutu na bisi ndagu andi; bamayetsana o misiengi o yiari yiHebron.

⁴ BaJuda bamaruga o Hebron na avana bamabiatsila David kaga jiJuda. Bamatsingula David yiri bisi Yabech o Galaad bamatsiga mfumbi jiSaul.

⁵ David amatinda bilumbi ombu bisi Jabes o Galaad uyebatsingula rie: Fumu adugabili miula mu mbari dumalasa duyitsu ombu fumu enu Saul na dumamutsiga.

⁶ Fumu adulasi maboti na usigama! Meʼ wami nyuduvayila maboti mu mbari dumavaga adivu diwelimina.

⁷ Waranu! Kelasanu bangogaga! Diuleba fumu enu Saul amafu baJuda bamambiatsa kaga ogu.

Ichebaal amasola kaga jiIsrael

⁸ Tumba Abner muana dibaala uNer, yivunda yibagora baSaul amabonga Ichebaal muana dibaala uSaul, amamuviosa o Mahanaim.

⁹ Amamuvaga kaga jibiari biebibi: Galaad na Asser na Jizreel na Efraim na Benjamin diwendi rie: Israel jiotsu.

¹⁰ Ichebaal muana dibaala uSaul amaba na magumana mabilima ava amabiatsu kaga jiIsrael, amarumanga bilima bibeji. Yika baJuda abamasinga urumu na David.

¹¹ Temu aji David amaruminanga baJuda o Hebron jimaba yisambuali yibilima na tsungi yisiamunu.

Divita va gari baJuda na baIsrael o Gabaon

¹² Abner muana dibaala uNer na bagora baIchebaal, muana dibaala uSaul bamapalila o Mahanaim uwenda o Gabaon.

¹³ Joab muana dibaala uSerouia na bagora baDavid bamayenawenda; bamabenguna va mugula udianga diGabaon, bamasikama, bamosi o disimu digunu didianga basusu o disimu dina.

¹⁴ Abner amatsingula Joab rie: Bafudu barelimi utoga netu. Joab amawaka rie: Batoyingi!

¹⁵ Bamarelama na bamakweka na dutalu dedi, diwendi rie: yigumi na babeji baBenjamin abamaba baIchebaal muana dibaala uSaul na yigumi na batu babeji abamaba baDavid.

¹⁶ Mutu mutu amagaanga muvinitsi andi mu muru nomunonga dijenga diandi va dubansi, botsu bamaberuga va mosi. Bamaluga mbura eni jiGabaon Nungi jiMamanyi.

¹⁷ Muna yilumbu yieni divita dimaba tindi diranga, amuna Abner na batu baIsrael bamabetsulu na bagora baDavid.

¹⁸ Avana vamaba baana bababaala barieru baSerouia: Joab na Abichai na Assael. Assael amaba na makulu malenga nderi tsiesi;

¹⁹ amaduka Abner suelili tsiri upembuga.

²⁰ Abner anogengila o nsima amawivula rie: Aguna ndeʼ Assael? Amawaka rie: Nyiina.

²¹ Abner amavosa rie: Pembuga; tumuna mufudu mosi va gari bagora beni na mupatuli abivu nandi. Tumba Assael asamaronda umudunda.

²² Abner amamuetsingula Assael fe: Ndundi; dibandu yi nyugudimbila na dibandu yi nyugubokila? Va julu vana nyurungula ugengila muana taji agu Joab?

²³ Assael amabusa umudunda; kabogu Abner amamunonga dikongu diandi mu moji na dimapalila o nsima. Amaberuga na amafu vana vana. Botsu abamatola va mbura aji Assael amafuila bamasikama vana.

²⁴ Joab na Bichai bamabingisa Abner; wisi yika utsima etsimi ava bamatolila o mukongu uAmma agumaba va nsungisini na Guia mu nsila jikumu jiGabaon.

²⁵ Bagora baBenjamin bamafubana na baAbner; bamaba dibuli dimosi dibagora na bamayesikama va julu mukongu.

²⁶ Abner amanengila Joab na amamuwivula rie: Dijenga diagu diki na mangolu ubunga? Gugejabi yiri disukusulu didiambu diedidi diuba yika munyongu na munyongu? Te na temu yi gugandisila bagora rie: Duyamuebingisa baana bataji benu?

²⁷ Joab amawagula rie: Nsambi ejabi! Mbe gugaadivosa batu mbe bagodunda ubingisa baana bataji bogu te na wisi mbe otebuga.

²⁸ Mbana Joab amasiyisa mumbanda na bagora botsu bamasikama; basamamuebingisa baIsrael na basamamuetoga.

²⁹ Abner na batu bandi bamawenda mukolu na mukolu o yibususu; bamasabuga Jourdain na bamavioga Bitron te na bamatola o Mahanaim.

³⁰ Joab amaruyila o ubingisa Abner na amabengusana bagora botsu; vamagambu yigumi na yifu yibagora baDavid, tsiri utala Assael.

³¹ Tumba bagora baDavid bamaboka kama yirieru na magumasiamunu mabagora baBenjamin na baAbner.

³² Bamayenabega mfumbi jiAssael na bamajitsiga o ngila jitaji andi o Bethleem. Joab na batu bandi bamawendanga mukolu uotsu na wisi umabatebuyila o Hebron.