2 Samuel 19 - La Sainte Bible en Langue Yipunu

¹ Bamayetsingula Joab rie: Guluati, kaga ulila elili na unyonga enyongi muana andi Absalom.

² Muna yilumbu yieni ndunga jimakaluyila bukuili mu mbari bagora bamagulu yiri kaga amaba na tindi munyongu mu diambu didufu dumuana andi.

³ Muna yilumbu yieni bagora bamagabuga na yisonyi o musuega nderi aberini o divita.

⁴ Kaga amadibiga yinsi na amagamuga rie: Muana ami, Absalom! Absalom, muana ami, muana ami!

⁵ Joab amakota o yibuku yindagu ayi kaga amaba na amavosa rie: Namunyi ukambisa guikambisi bagora bagu botsu abatsiduwaka kalala, jenu na baana bagu bababaala na bagetu na bagatsi bagu.

⁶ Ndeʼ guirondi jogu abeguvini na guivini jogu abegurondi. Guilasi yiri basefu bagu nesi basalitsi bagu bagaana tsongu. Mbe Absalom aki monyu na jetu botsu mbe tumafu, adina diwelimina mbe?

⁷ Tsie pali novosa na basalitsi bagu! Nyilevi na diina diFumu yiri pa gugopala na mukolu egugu gugosiala ne na gora mosi; adi gulaba guburulungu gusakadilaba!

⁸ Mbana kaga amaretsama, amatsana va dikotulu dimusiengi. Bamatsingula bagora botsu rie: Guluanu, kaga utsana etsani. Batu botsu bamagukama va gusu kaga. Tumba bagora baAbsalom bamarina mutu mutu o ndagu andi.

David unengulu enengulu o Jerusalem

⁹ O bifumba biotsu biIsrael yiari na yiari, batu botsu bamatumuna paga na bamavosa rie: Kaga amatuwaka kalala ombu bavinitsi betu sinsa viri baPhilistin; mbana amarina mu diambu diAbsalom.

¹⁰ Kabogu Absalom agu tumabiatsa yiri oturuma amafu o divita, dibandu yi tugogabusa David kaga?

¹¹ Kaga David wandi amasindiga batu uyetsingula bavagulitsi bapagu Sadoc na Abiatar rie: Wivulanu bivunda biJuda rie: Dibandu yi dusitila ugabusa kaga o ndagu andi? Adimavosungu na baIsrael basusu disamajabunu na kaga?

¹² Jenu duvu baana bataji bami na duvu malungu mamosi nami; dibandu yi jenu dusitila ukabusa kaga?

¹³ Dukawivula Amassa rie: Tugaa malungu mamosi? Nsambi akilisi na mangolu mandi motsu pa gugoruga mutubu ombu gami uba yivunda yidibadi va yivinga yiJoab.

¹⁴ Anana David amadilila bisi Juda, botsu bamaba kingu mosi nandi; mbana bamatinda mutu uyetsingula kaga rie: Ruga, ndeʼ na basalitsi bagu botsu.

¹⁵ Kaga amagabuga na amatola te no mujamba uJourdain. BaJuda bamawenda o Guilgal uyebengusana kaga nomusabusa Jourdain

David uwaka ewaki Chimei kalala

¹⁶ Chimei muana dibaala uGuera agumaba muisi Benjamin agumatsaninanga o Bahourim amalensa nowenda nogu o Juda uyelabana na kaga David.

¹⁷ Amaba na tosini jibaBenjamin na Siba agumaba musalitsi o ndagu Saul na yigumi na baana baranu bababaala na magumabeji mabasalitsi baSiba. Abana bamatotila o mujamba uyebengusana kaga.

¹⁸ Ava dikumbi dimasabusila mukuta ukaga bamaba vana uvaga ama kaga obaruma. Va temu aji kaga amasabuyila mujamba, Chimei muana dibaala uGuera amagudama va gusu andi.

¹⁹ Amavosa na kaga rie: Fumu guyakipa dibi diami, libana yiri nyimagusienga yilumbu ayi gumapalila o Jerusalem; kokolu tsiagu, guyakipa mambu memana!

²⁰ Nyijabi yiri nyimavaga disumu na laba nyireyili baIsrael botsu basusu uyegubengusana.

²¹ Mbana Abichai muana dibaala uSerouia amawivula kaga rie: Chimei agoboku mu mbari amasienga yibiatsi yiFumu?

²² Tumba David amawivula rie: Baana baSerouia diambu yi? Dibandu yi duikelasila bavinitsi bami namunyi?

²³ Namunyi bobokisa mutu o Israel? Ngaa kaga jiIsrael? Mbana kaga amatsingula Chimei rie: Gugofu!

David utanda etandi Mefibaal

²⁴ Mefibaal mutegula uSaul, jaʼ wandi amayebengusana kaga. Yitsingu yiotsu ayi kaga amawendila te na yilumbu ayi amagabuga na polu, asamamueduaranga bapondu nesi ufuga yedu na asamamuesusanga biduaru biandi.

²⁵ Ava amavioyila va gusu kaga o Jerusalem, kaga amamuwivula rie: Mefibaal, dibandu yi gusamaruyila nami?

²⁶ Amawaka rie: Aa fumu ami kaga, musalitsi ami amandunsa, menu oyitsonduyi, nyimavosa rie: Nyutunga buru ami nyunangama va julu jionyi na nyuwenda na kaga.

²⁷ Amamfurila ombu gagu. Tumba guvu nderi yiansa yiNsambi ombu gami. Gukapega adivu diwelimina.

²⁸ Mu mbari bisi ndagu ami botsu bavu yika bamfumbi na bamfumbi va gusu agu; ne nana gumakotisa mu dutalu dujogu abejangingi va tavula agu. Musuga yi guvu nami? Nyumuevosa disusu na kaga?

²⁹ Kaga amawivula rie: Motsu mana divindugulu yi? Nyimavosa kala rie: Jenu na Siba dugabana disiala diSaul.

³⁰ Mefibaal amatsingula kaga rie: Abongi ne diotsu mu mbari gumagabuga na polu o ndagu agu.

David ubungula ebungili Barzillai

³¹ Barzillai muisi Roguelim o Galaad amasabuga Jourdain na kaga uyemuvetsiga te no disimu dina diJourdain.

³² Barzillai amaba tindi yinunu, amaba na magumidunana mabitima, jandi agumarombilanga kaga biguji yitsingu yiandi yiotsu o Mahanaim, jandi amaba tindi yisina.

³³ Kaga amanengila Barzillai rie: Tʼwendi nyuyegubungulanga o yiari yiami o Jemsalem.

³⁴ Tumba Barzillai amawivula kaga rie: Bitima kweʼ bikivu nami? Nyuwenda o Jerusalem?

³⁵ Namunyi nyina magumidunana mabilima. Nyurungula umuejaba diboti na dibi? Nyurungula ubimba abi nyiji nesi abi nyinu? Nyurungula umuegulu mufi mabawimbititsi? Dibandu yi nyumuetsana o ndagu agu?

³⁶ Nyuyeguvetsiga o disimu diJourdain. Je dibandu yi guipayili maboti motsu mana?

³⁷ Nyuyenagabuga, nyufuila o musiengi ami va mugula ngila tsitaji na nguji ami! Tumba Kimham muana ami owenda nagu; gukamuvayila nana guirondili.

³⁸ Kaga amavosa rie: Kimham owenda nami, nyumuvayila amogulasa ubueji; biotsu abi guba na nsala ombu gami nyuguvega bionyi.

³⁹ Batu botsu banosabuga Jourdain na kaga wandi amasabuga Jourdain, kaga amafifa Barzillai na amamugabila miula. Barzillai amayenagabuga.

⁴⁰ Kaga amawenda o yiari yiGuilgal na Kimham amawenda nandi. BaJuda botsu na dikabu dimosi dibaIsrael bamasabusa kaga Jourdain.

Musosi va gari baJuda na baIsrael basusu

⁴¹ BaIsrael beni bamawenda ombu kaga na bamamuwivula rie: Kaga dibandu yi gumabingisila baana bataji betu baJuda ugusabusa Jourdain, jenu na bisi ndagu agu?

⁴² BaJuda bamawagula baIsrael basusu rie: Pa tuvu tindi biburu bikaga diambu yi duinyoyili?

⁴³ Tumabungulu na kaga? Amatusaka? BaIsrael beni bamawaka baJuda rie: Jetu tugaa yigumi yimikuta o yiari yietu? Kaga ebambini netu uviolila jenu; dibandu yi duitulensili? Tsiri jetu atumareyila uvosa yiri kaga agabuyi? BaJuda bamavosa na bukanyi uviolila baIsrael beni.