2 Samuel 17 - La Sainte Bible en Langue Yipunu

Houchai utumuna etumuni paga na dilongi diAhitofel

¹ Mua temu jinovioga Ahitofel amatsingula Absalom rie: Nsingisi usola yigumi na tosini beji tsibabaala, nyurelama noduka David na mukolu egugu.

² Nyumusutusu ava avu atogulu na abasa na munyongu, nyumulasa goma na batu botsu abavu nandi borina, nyuboka yika kaga.

³ Mbana nyugabusa batu botsu ombu gagu; mutu agu guivini anofu, batu botsu bagabuga na mirima misunda na voba duvotsu.

⁴ Diambu dieni dimalasa Absalom na bivunda biIsrael ubueji.

⁵ Tumba Absalom amavosa rie: muenengilanu Houchai muisi Ark yiri tuguluanu dilongi diandi.

⁶ Houchai amatola ombu Absalom na Absalom amamuwivula rie: Leguluati nana Ahitofel amavosila; turungula uvaga adi amavosa vo tugodivaga? Vosati ndeʼ wagu!

⁷ Houchai amawagula Absalom rie: Dilongi adi Ahitofel atsilonsa temu ejiji digaa diboti.

⁸ Ndeʼ guijabi taji agu na bagora bandi; jogu bavu batoyitsi bamavita, jogu bavu na tindi bukanyi nderi yibomfi yipasa. Va julu vana taji agu amaguku na mavita; agosilimina va mosi na bagora bandi.

⁹ Diurungula uba aji va mbura usuema esuemi nesi o mutsumba nesi va mbura jisusu. Pa va dibandu dimutsingu baDavid boboka bamosi va gari enu digotamba nogulunu na bovosa rie: Bamabetisa bagora baAbsalom.

¹⁰ Mbana ne bango mangolu bogaangu na goma; mu mbari baIsrael botsu bejabi yiri taji agu avu ngogaga na abavu nandi bavu na tindi mangotu.

¹¹ Kabogu nyidulonsi yiri bagora botsu babenguni ombu gagu, ubanda o Dan te no Bercheba, bamaba tindi bapuela nderi yisieyi ayivu va mugula mubu; ndeʼ beni wenda yetoga nogu.

¹² Tutola ombu David va mbura yika la mbura aji tumurasuna na tumuwitimina nderi banyosi; ne umosi va gari ogu agorina, nesi jaʼ beni, nesi bagora abavu nandi.

¹³ Pa borina o musiengi umosi baIsrael botsu boyetsiengila musiengi eni te na tugupansa tindi upansa na vagomuelabana ne dimanyi dimosi.

¹⁴ Mbana Absalom na baIsrael botsu bamavosa rie: Dilongi diHouchai divu diboti uviolila dilongi diAhitofel. Kabogu Fumu amatabula diambu utsiemusa dilongi diboti diAhitofel yiri Absalom obungu.

David usabuga esabuyi mujamba uJourdain

¹⁵ Houchai amatsingula bavagulitsi bapagu: Sadoc na Abiatar rie: Ahitofel amalonsa dilongi dimosi ombu Absalom na bivunda biIsrael, menu nyimalonsa disusu.

¹⁶ Lensanu nosindiga batu uyelubusa David nomutsingula rie: Duyasilimina o kumu tumba sabuga mujamba uJourdain yiri dugobungana.

¹⁷ Yonatan muana dibaala uAbiatar na Ahimaas muana dibaala uSadoc bamaviva va En-Roguel. Musalitsi mosi umugetu amarumu uyelubusa kaga David; mu mbari bamalaba goma ukota o musiengi.

¹⁸ Ne nana mufudu amabalabilila na amayetsingula Absalom, kabogu botsu babeji bamarina mbangu na bamatola o Bahourim o ndagu jidibaala adimaba na yiduna yimamba ayimaba va dulombili duandi, amuna bamasuemina.

¹⁹ Mugetu amabonga dimfunga adi amakubiga va julu yiduna na amawanyiga pinda va julu dionyi yiri batu bagotasa diambu.

²⁰ Bilumbi biAbsalom bamakota o ndagu mugetu eni na bamawivula rie: Ahimaas na Yonatan agu bavu? Mugetu eni amabawagula rie: Batsisabuga mua mujamba eni. Bamabaromba ne nana basamabalaba, kabogu bamayenagabuyila o Jerusalem.

²¹ Banosogama, Ahimaas na Yonatan bamapala o yiduna mbana bamawenda uyelubusa kaga David. Bamatsingula David rie: Ahitofel jandi rie: Lensa nosabuga mujamba.

²² David na batu botsu abamaba nandi bamasabuga Jourdain; wisi unotebuga vasamasiala ne umosi agusakasabuga Jourdain.

²³ Ahitofel anolaba yiri basamaduka dilongi diandi amayenagabuga o musiengi andi. Anomana ukunsa mambu mandi amakesuekiga na amafu. Anana amafuila na bamamutsiga o ngila taji andi.

David utola etoli o Mahanaim

²⁴ David amatola o Mahanaim. Absalom amasabuga Jourdain, jogu na bagora baIsrael abamaba nandi.

²⁵ Absalom amaviosa Amassa yivunda yidibadi va yivinga yiJoab; Amassa amaba muana dibaala umutu diina diandi Yeter muisi Israel agumalewenda ombu Abigal muana mugetu uNahach na yibusi yiSerouia agumaba nguji Joab.

²⁶ Absalom na baIsrael bamavaga milaku o bulongu buGalaad.

²⁷ Ava David amatolila o Mahanaim, Chobi muana dibaala uNahach agumaba muisi Rabba musiengi ubaAmmon na Makir muana dibaala uAmmiel muisi Lo-Dabar na Barzillai muisi Roguelim o Galaad amafubana nandi.

²⁸ Bamabega matangi na bansienga na bisanga na biguji biminongu na minongu

²⁹ na biguji na dile na bindombu na formasa; biotsu bina bamabibeyila David na batu botsu abamaba nandi yiri boji; mu mbari bamavosa rie: Batu beni utsoga betsoyi na nsala na puila o kumu.