2 Samuel 15 - La Sainte Bible en Langue Yipunu

Absalom uweliga eweliyi upatula David durumu

¹ Adina dinovioga, Absalom amakerombila dikalu na bakabala na magumaranu mabagora abamarelanga o gusu andi.

² Kedi jineni kadi yilumbu amatsananga va mugula nsila va dikotulu dimusiengi. Ava mutu uotsu amabilanga na musosi amawendanga ombu kaga uyetabula bunsonsi; Absalom amamunengilanga nomuwivula rie: Agu guiruyisini? Ava amawagulilanga rie: Nyiji mu yifumba yieyiyi yiIsrael,

³ Absalom amamutsingulanga rie: Guilabi, diambu diagu divu diboti na disungama; vagaa mutu ukaga ugulu diambu diagu.

⁴ Absalom amabuesa rie: Aa mbe nyiji nsonsi o bulongu buebubu! Mutu uotsu aguba na musosi nesi mutsundu mbe oruga ombu gami na mbe nyumutabulila bunsonsi busungama.

⁵ Ava mutu amakuekila uyegudama va gusu andi, amamusambanga dikaka amamugaanga nomubumbanga.

⁶ Anana Absalom amavayilanga batu botsu baIsrael ava bamawendilanga ombu kaga uyetabululu bunsonsi. Anana Absalom amadilila mirima mibaIsrael.

⁷ Bilima bina binovioga Absalom amatsingula kaga rie: Nsingisi uwenda o Hebron uyedugusu pangini aji nyimavangana na Fumu.

⁸ Nyimavangana pangini ava nyimatsanina o Guechour o Syrie; nyimavosa rie: Pa Fumu okabusa o Jerusalem, nyusalilanga Fumu.

⁹ Kaga amamutsingula rie: Wendanga na buranga. Absalom amaretsama mbana amayenawenda o Hebron.

¹⁰ Absalom amatinda badukitsi bandi o musuega o bifumba biotsu bIsrael uyenavosanga rie: Ava dugululu diufi dimumbanda, dukavosa rie: Absalom erumi o Hebron.

¹¹ Kama beji tsibabaala baJerusalem abamanengulu bamafubana nsila na Absalom; tsiri ujaba adi evayi.

¹² Ava Absalom amavagulila pagu tsiunyensa amasindiga mutu o musiengi uGuilo ombu Ahitofel agumaba mulongitsi uDavid. Fundu jimaroga na batu bamaviolilanga ufuna o yiari yiAbsalom.

David urina erini Jerusalem

¹³ Mutu amayetsingula David rie: Batu baIsrael bamafubana na Absalom.

¹⁴ Vana vana David amatsingula basalitsi bandi botsu abamaba nandi o Jemsalem rie: Relamanu turinianu, Absalom agotulasa yingeba. Lensanu; agotamba notudala, otukotisa mu diguga nobokisa bisi musiengi.

¹⁵ Basalitsi bakaga bamamutsingula rie: Tuji nagu tuvaga motsu ama guturuma.

¹⁶ Kabogu kaga amapala na bisi ndagu andi botsu bamayenamudukanga, amasila yigumi yibagatsi bandi ukelisanga ndagu.

¹⁷ Kaga anopala batu botsu bamayenamudukanga, bamayesikama o ndagu ajisuka.

¹⁸ Basalitsi bandi botsu na baCrete na baPeletie botsu bamavioga va mugula andi; baGat botsu, dutalu duogu: kama yisiamunu tsibagora abamayenamudukanga ubandila o Gat, jogu bamavioga va gusu kaga.

¹⁹ Kaga amawivula-Ittai, yivunda yibagora baGat rie: Dibandu yi ndeʼ wagu guwendila netu? Gabuga, yetsana na kaga jigona mu mbari guvu muenyi agumaruyila o bulongu bususu.

²⁰ Yika namapapa gutsitola na namunyi nyuyenagulinsanga yiari na yiari, meʼ beni agugejabi agu nyiwendisini? Gabuga, yenabeganga baana bataji bagu. Fumu agugabili maboti nogulasa usigama uandi.

²¹ Ittai amawaka rie: Fumu ejabi na ndeʼ beni guijabi wandi! Mbura aji guba avana meʼ wami nyuba; nesi dufu, nesi monyu bigotukakasana.

²² Mbana David amaruma Ittai rie: Kabogu tʼwendi, vioga va gusu! Ittai amavioga na bagora bandi na mikuta miogu.

²³ Batu botsu bamalilanga na bamagamuganga tindi ugamuga ava yinombu yieni yiotsu yimavioyilanga. Kaga amasabuga mujamba Cedron na batu botsu bamasabuyila va nsungisini na nsila ajivioyi o kumu.

²⁴ Sadoc muvagulitsi upagu na bisi Levi botsu abamabeganga yigara yipangini yiNsambi bamaba nogu. Bamasunsa yigara yipangini na Abiatar muvagulitsi upagu amavagula pagu tsiunyensa te na batu botsu bamasuka upala.

²⁵ Kaga amaruma Sadoc rie: Gabusa yigara yipangini o musiengi. Pa divu diwelinuna ombu Fumu, jandi omuekabusa nomuendasa yigara yipangini na Mbura andi.

²⁶ Tumba pa ovosa rie: Ngelabi ubueji nagu! Meʼ janduʼgu, apayili adi elabi diwelimina.

²⁷ Kaga amamuewivula Sadoc muvagulitsi upagu rie: Gugulu? Gabuga na buranga o musiengi; jenu na Ahimaas muana agu udibaala na Yonatan muana dibaala uAbiatar.

²⁸ Guluanu, mbe ka menu nyuvivanga o kumu te na nyugulu misamu mienu.

²⁹ Kabogu Sadoc na Abiatar bamagabusila yigara yipangini o Jerusalem na bamayetsana guna.

David usindiga esindiyi Houchai uyenaleganga Absalom

³⁰ David amamata mukongu umiOlive noyenalila na muru ukubama na amavula nesi bapondu bandi; batu abamaba nandi bamakubiga miuru miogu wandi; jogu botsu bamayenalilanga.

³¹ Bamayetsingula David rie: Ahitofel avu na Absalom na jogu abamagutungila fundu. Mbana David amasambila rie: Aa Fumu, tsiemusa malongi maAhitofel!

³² Ava David amatolila o julu mukongu amagudama va gusu Nsambi; amalaba Houchai muisi Ark, amayenamubengusana na amaduara yijungi yipapasiga na muru ubasa de na butamba.

³³ David amavosa rie: Pa guwenda nami nyulaba uvura.

³⁴ Tumba pa gugabuga o musiengi notsingula Absalom rie: Aa kaga menu nyivu musalitsi agu! Kala kala nyimalesalila taji agu, temu ejiji nyirondi ugusalila, anana gurungulila utsiemusa malongi maAhitofel.

³⁵ Bavagulitsi bapagu, Sadoc na Abiatar bagoba nagu vana? Motsu ama gugulu o ndagu kaga gubatsingula.

³⁶ Avana baana babeji bababaala, Ahimaas muana dibaala uSadoc na Yonatan muana dibaala uAbiatar bavu, gurungula ubasindiga yiri boyinsingula motsu ama gugulu.

³⁷ Houchai mulongitsi uDavid, amagabuga o musiengi. Mbana Absalom amakota o musiengi.