2 Samuel 13 - La Sainte Bible en Langue Yipunu

Ammon na Tamar

¹ Adina dinovioga, adimalabana adidi rie: Absalom muana dibaala uDavid amaba na yibusi ayimaba tindi muboti, diina diandi Tamar: Amnon muana dibaala ususu uDavid amamuronda.

² Amnon amaketsoyisa na durondu duyibusi yiandi Tamar te na amabela. Amaba tsiemi, adina dimalasa Amnon uvura umubonga.

³ Amnon amaba na mbatsi diina diandi Yonadab muana dibaala uChamma agumaba muana katsi uDavid, Yonadab eni amaba na tindi malengu.

⁴ Amamuwivula rie: Dibandu yi kedi na kedi guigasingi tindi ugasa nderi ugaa muana kaga? Gugonsingula? Amnoo amamuwaka rie: Nyirondi Tamar yibusi yimuana taji ami Absalom.

⁵ Yonadab amamulonsa rie: Gukasilama va tangi, gufura ubela. Ava taji agu oruyila uyigulaba gukamutsingula rie: Singisa yibusi yiami Tamar uruga uyipega biguji; biguji abi opega obilambila va misu mami yiri nyubilaba nobiwaka meʼ beni va dikaka diandi.

⁶ Amnon amasilama na amafura ubela. Kaga amayemulaba mbana Amnon amatsingula kaga rie: Singisa yibusi yiami Tamar ayindambila mapa mabeji bageyi va misu mami; jaʼ beni akuakisa monyi.

⁷ David amasindiga mutu o yibuku yiTamar uyemutsingula rie: Wenda ombu muana taji agu Amnon uyemulambila mua biguji.

⁸ Tamar amawenda ombu muana taji andi agumaba asilama. Amamuvayila mapa mageyi va misu mandi ama amagaanga na matsi;

⁹ mbana amawenda na duengu na amamakabula va misu mandi, tumba Amnon amabusa uji. Amavosa rie: Palisa batu botsu, kabogu bamapala.

¹⁰ Mbana Amnon amatsingula Tamar rie: Bega biguji o tangi ami; Tamar amabonga mapa mageyi ama amavaga, amamabeyila muana taji andi Amnon o tangi andi.

¹¹ Ava amamuwakisila bionyi amamugaanga nomutsingula rie: Tamar, ruga yifubana yitsiga nami.

¹² Amamuwaka rie: Kokolu Amnon, guyandasa yisonyi, digevagu nana o Israel; guyavaga nsoruru tsimunongu eni.

¹³ Agu nyuwendasana na yisonyi yiami? Gugengulu muinsi na baIsrael botsu. Kokolu tsiagu yekunsa diambu na kaga, agobusa ukwetsa nagu.

¹⁴ Tumba asamaronda umugululu; amamugaanga; amamulasa yisonyi na amafubana yitsiga nandi.

¹⁵ Mbana Amnon amamuvina tindi uvina, divina dieni dimaviolila ne durondu adu amalemurondanga. Mbana amamutsingula rie: Gusuga!

¹⁶ Amamuwaka rie: Nesi, guyambinga, gumakepayila dibi.

¹⁷ Asamaronda umugululu, kabogu Amnon amanengila muana dibaala agumamusalilanga na amamutsingula rie: Kakasana mugetu egugu nami, mupalisi o gusu kana nodibiga diguyi.

¹⁸ Musalitsi uAmnon amapalisa Tamar o kana mbana amadibiga diguyi. Tamar amaduara yilinga ayimaba na puela bisonu; mu mbari yimaba yiduaru ayi baana babagetu bakaga bamaduaranga mbe bakivu batsiemi.

¹⁹ Tamar amagolila dibufu o julu muru na amapasa yiduaru yiandi; mbana amasakiga miogu va julu muru na amayenawendanga nolila.

²⁰ Muana nguji andi Absalom amamuwivula rie: Muana taji agu Amnon abetsi nagu? Ka ya, yibusi yiami! Guyaledivosa! Aguna muana taji agu, guyaviolila ukipa diambu diedidi! Tamar amayetsana na munyongu o ndagu muana nguji andi Absalom.

²¹ Kaga David amagulu mambu meni motsu, kabogu amanyoga tindi kabu.

²² Absalom asamavosa nesi diboti nesi dibi na Amnon; tumba amamuvina mu mbari amalasa yibusi yiandi Tamar yisonyi.

Absalom amabokisa Amnon, urina erini

²³ Bilima bibeji binovioga Absalom amaba na bafuyitsi bandi babindombu o Baal-Hassor o yiari yiEfraim, amanengila baana botsu bababaala bakaga.

²⁴ Absalom amawenda ombu kaga uvosa rie: Labati, bafuyitsi babindombu bavu nami; jenu na basalitsi bagu, rugatianu o feta.

²⁵ Kaga amawaka Absalom rie: Nesi muana ami, tugoruga jetu botsu mu mbari tukeba mufuna ombu gagu. Absalom amamutsotsa; tumba kaga asamagaru uwenda. Ne nana amamugabila miula.

²⁶ Absalom amavosa rie: Kabogu singisa muana taji ami Amnon uwenda netu. Kaga amamuwivula rie: Dibandu yi owendila nagu?

²⁷ Mu diambu diyisuebiri yiAbsalom kaga amasingisa baana bandi botsu bababaala na Amnon uwenda nandi.

²⁸ Absalom amavega diruma diedidi ombu basalitsi bandi rie: Ketanu Amnon pa yika ulanga elangi mbana nyuduruma rie: Dimbanu Amnon! Vana temu eni mubokianu; duyalaba goma, dibi dieni digaa va julu muru ami? Warisanu mirima na maninanu mangolu!

²⁹ Basalitsi baAbsalom bamadedila diruma diandi na bamaboka Amnon. Baana botsu bakaga bamaretsama, mutu mutu amanangama mu bum andi amayenarina.

³⁰ Ava bamabila muna nsila, David amagulu rie: Absalom amaboka baana bagu bababaala botsu, ne umosi agaadila monyu.

³¹ Kaga amapasa biduaru biandi na amasilama va tsi: basalitsi bandi botsu bamaba vana na biduaru bipasiga.

³² Yonadab muana dibaala uChamma muana katsi uDavid amavosa rie: Fumu guyatasa yiri baana bagu botsu bamaboku, yika Amnon buandi amafu. Dimatabulu kala na Absalom vana yilumbu ayi Amnon amalasila yibusi yiandi Tamar yisonyi.

³³ Kaga tsiemusa ditasa dieni; baana botsu bababaala basamafu, Amnon buandi amafu.

³⁴ Absalom amarina. Gora ajimakelisa diguyi amabuaga misu amalaba batu bapuela beruyi muna nsila ajimaba o nsima andi o yiari yimukongu.

³⁵ Yonadab amatsingula kaga rie: Labati baana bagu uruga beruyi! Tsiri nana nsilegutsingula?

³⁶ Yika emani uvosa, baana bababaala bakaga bamatola. Bamagamuga na bamalila; kaga wandi na basalitsi bandi botsu bamalila tindi ulila.

³⁷ Absalom amarina, amawenda ombu Talmai, muana dibaala uAmmiboud agumaba kaga jiGuechour. Bilumbu biotsu David amalilanga muana andi.

³⁸ Absalom amatsana bilima birieru o Guechour agu amayetsanina anorina.

³⁹ Kaga David amadunda ubingisa Absalom mu mbari amabembugu mu diambu didufu duAmnon.