2 Samuel 12 - La Sainte Bible en Langue Yipunu

Natan utubula etubulili David mukilu uNsambi

¹ Fumu amasindiga mubiyitsi diina diandi Natan ombu David. Natan amamurasuna nomutsingula rie: Vamaba babaala babeji va musiengi umosi; dimosi yisina na disusu yijaga.

² Yisina amaba na bindombu na bangombi bapuela bapuela.

³ Yijaga asamaba na yima yiotsu yisusu, yika muana yindombu yigeyi ayi amasumba; amayilisilanga na amabanguganga nandi va mosi na baana bandi; yimajanga biguji biandi na yimanuinanga mu kopa andi na yimasilamanga va tulu andi, amayikelisanga nderi muana andi umugetu.

⁴ Yilumbu yimosi muenyi amatola ombu yisina. Yisina asamaronda uboka bindombu biandi nesi bangombi bandi umulisila; amagaanga yindombu yiyijaga, amayilambila muenyi andi.

⁵ David amanyoyila yisina tindi kabu te na amatsingula Natan rie: Fumu ejabi! Agumavaga dionyi awelimina uboku.

⁶ Va julu vana ogabusa bindombu bina mu mbari amavaga diambu dieni na asamamulasa yingeba.

⁷ Natan amatsingula David rie: Ndeʼ la mutu eni! Fumu Nsambi Israel jandi rie: Nyimagubiatsa kaga o Israel na nyimaguwaka kalala ombu Saul.

⁸ Nyimaguvega nesi ndagu fumu agu; nyimaguvega bagatsi bafumu agu wandi, nesi ndagu jiIsrael na jiJuda. Abina bigaa biwelimina? Ngorungula ugubuesa bisusu?

⁹ Kabogu dibandu yi gumalensila maruma mami ava gumavayila amagaa mawelimina va gusu ami? Ndeʼ gumavuna Urie muisi Hitt; gumadaga mugatsi andi mujeba; gumamusingisa uboku na baAmmon.

¹⁰ Ubanda namunyi bisi ndagu agu bokilusungu mu mbari gumandensa na gumabonga mugatsi uUrie muisi Hitt yika mugatsi agu.

¹¹ Fumu jandi rie: Dibi diupalila o ndagu agu adiugubemba, va misu magu nyubonga tindi bagatsi bagu na nyubavega ombu dibaala disusu adiufubana yitsiga nogu ava wisi ebalili.

¹² Ndeʼ gumavayila dionyi o musuega; menu nyudivayila va misu mabaIsrael botsu ava wisi ebalili.

¹³ David amatsingula Natan rie: Nyimavayila Fumu dibi! Natan amatsingula David rie: Fumu etandi dibi diagu, gugomuefu.

¹⁴ Tumba mu diambu didibi diedidi gumarombisa bavinitsi baFumu umulensa. La dibandu muana dibaala agumaguburulu ofuila.

¹⁵ Natan amayenagabuga o ndagu andi. Mbana Fumu amadimba muana agu mukuili uUrie amaburila David, amabela diambu.

Dufu dumuana uBatcheba

¹⁶ David amatatila Nsambi mu diambu dimuana na amabusa uji; mbana amakota o ndagu andi na amasilimina va tsi mukolu uotsu.

¹⁷ Bivunda bindagu andi bamamutsotsa usimbuga tumba asamagaru na asamaji ne yima yiotsu nogu.

¹⁸ Mu yilumbu yimusambuali muana amafu. Basalitsi baDavid bamalaba keri umutsingula yiri muana amatabuga mu mbari bamavosanga rie: Lesa muana mbe aki monyu asamagaru utugulu tambusa na ava tuvosila rie: Amatabuga, ogaru? Agoketsungula?

¹⁹ David amalaba yiri basalitsi bandi uvosa bevosi mangunguri, adina dimamujabisa yiri muana amatabuga. Amawivula basalitsi bandi rie: Muana ami amatabuga? Jogu bamawaka rie: Nyiina.

²⁰ Mbana David amarelama. Amabuila, amagolila matsi novinsa biduaru; mbana amawenda o Ndagu Yibenguna uyeyitsa Fumu. Anogabuga o ndagu andi amavonda biguji na amaji.

²¹ Basalitsi bandi bamamuwivula rie: Adina guivayi divindugulu yi? Ava muana mbe aki monyu gumabusa uji na gumalilanga; tumba muana anofu gumarelama na uji guiji!

²² Amawaka rie: Ava muana mbe akivu monyu nyimabusa uji; nyimalilanga, nyimawivulanga rie: Anyi ejabi pa Fumu agondasa yingeba na pa muana agodila monyu?

²³ Muana amafu, dibandu yi nyumuebusila uji? Nyurungula umuemugabusa monyu? Nyumurasuna tumba jandi agomuegabuga.

Duburu duSalomon

²⁴ David amabembiga mugatsi andi Batcheba, amamuefubana yitsiga nandi. Amabura muana dibaala agu amaluga Salomon.

²⁵ Fumu amaronda Salomon; amasindiga Natan mubiyitsi agumamuluga Yedidia, diwendi rie: agu durondu duFumu.

David upatula epatuli musiengi uRabba

²⁶ Va temu eni Joab amakanda Rabba musiengi ubaAmmon na amabapatula musiengi ukaga.

²⁷ Amasindiga bilumbi ombu David uyemutsingula rie: Nyimatumuna Rabba na nyimabapatula musiengi umamba.

²⁸ Tsie gukiyi nsialutsu tsibagora; tumuna bisi musiengi nobapatula uonyi. Nyiyabapatula uonyi, diduma diyakengila.

²⁹ David amagukiga nsialutsu tsibagora na amawenda o Rabba; amagutumuna na amagupatula.

³⁰ Amavula kaga jibaAmmon dugaba adu amaduaranga: utsira uduonyi umaba magumana makilu tsilora na dumaba dunamugu mamanyi madufunu duneni, duonyi dumaduisu David. Bamabega bipuela bipuela abimakindu o musiengi.

³¹ David amaruma bagora upalisa bisi musiengi; amabakotisa mu buviga bubisalu biranga: bibiwasu nesi bibatsiengu nesi bimumbi nesi bibirika; amavayila misiengi miotsu mibaAmmon munongu mosi. David na bagora botsu bamagabuga o Jerusalem.