2 Samuel 10 - La Sainte Bible en Langue Yipunu

Basalitsi baDavid bamalasu yisonyi

¹ Adina dinovioga kaga jibaAmmon amafu; Hannoun muana andi udibaala amamuvinga.

² David amavosa rie: Nyulasa maboti ombu Hammoun muana dibaala uNahach dedi mosi nana taji andi amapayila maboti. David amasindiga basalitsi bandi uyebembiga Hammoun mu diambu didufu dutaji andi. Ava basalitsi baDavid bamatolila o bulongu bubaAmmon,

³ baana babakaga baAmmon bamawivula fumu ogu Hannoun rie: Guitasi yiri divu duyitsu dutaji agu David egutindili bambembiyitsi? Basalitsi beni yi bevayi viri? Tsiri baleyitsi bavu uyenasieenga musiengi utupatula?

⁴ Mbana Hannoun amagaanga basalitsi baDavid na amabafuyisa yiasi yimosi yibiedu na amatabula biduaru biogu muna kodu tsimarangi, mbana amabagabusa ombu David.

⁵ David anogulu dionyi amasindiga batu uyebabengusana mu mbari batu beni bamagaangu na yisonyi; kaga amabatsingula rie: Letsananu o Jericho te na biedu bienu biumuenega mbana dukaruga.

BaIsrael utoga betoyi na baAmmon na baSyrie

⁶ BaAmmon bamajaba yiri bamakevaga nsoruru ombu David; bamafuta magumabeji matosim tsibagora baSyrie: baBet-Rehob na baSoba na tosini tsibagora bakaga jiMaaka na yigumi na tosini beji tsibagora baTob ubatoyila.

⁷ David anogulu misamu mieni amasunda utinda Joab na dibadi diotsu: bagora botsu bamangolu uyetoga nogu.

⁸ BaAmmon bamapala, bamakunsama utoga va dikotulu dimusiengi. BaSyrie baSoba na baBet-Rehob na bagora baTob na baMaaka bamaba va mbura ogu va mugula.

⁹ Joab amalaba yiri bamaba batu utoyisa o gusu nesi o nsima. Kabogu amasola dibuli dibagora baIsrael abamaba na mangolu uviolila basusu, amabasungasana na baSyrie.

¹⁰ Amavega durumu dubagora abamasiala ombu muana taji andi Abichai, jogu bamayetoga na baAmmon.

¹¹ Amavosa rie: Pa baSyrie bepiolili mangolu, gukaruga uyikwamusa; pa baAmmon beguviolili mangolu, nyiyiguwamusa.

¹² Guyadeda, tumaninianu mangolu metu uwamusa abetu nogaga misiengi miNsambi etu na Fumu jaʼ beni avayi adi elabi diwelimina.

¹³ Joab na bagora bandi bamayetumuna baSyrie na bamabarina.

¹⁴ Ava baAmmon bamalabila yiri baSyrie bamarina, jogu wogu bamarina Abichai, bamayesuema o musiengi. Joab amakakana na baAmmon na amagabuga o Jerusalem.

¹⁵ BaSyrie banolaba yiri baIsrael bamababetsa bamabengusana bagora bogu.

¹⁶ Hadadezer amasindiga bilumbi uyenengila baSyrie abamaba o disimu dina dimujamba. Bamatola o Helam; Chobak amaba yivunda yidibadi diHadadezer.

¹⁷ David anodigulu amagukiga bagora baIsrael botsu, bamasabuga Jourdain na bamawenda o Helam. BaSyrie bamakunsama uyebengusana David na bamatoga nandi, tumba baSyrie bamarina baIsrael.

¹⁸ David na bagora bandi bamabokisa mabadi mogu amamaba na yisambuali yikama tsimakalu na magumidunana matosini tsibabeyitsi bamakalu; bamaboka Chobak wandi agumaba yivunda yiogu yibagora, jandi amafu vana vana.

¹⁹ Bakaga botsu abamaba o tsi durumu duHadadezer banolaba yiri baIsrael bamababetsa bamavaga dinonga na Israel na bamakesunsa o tsi durumu duogu. BaSyrie basamamuerungula uwamusa baAmmon.