2 Samuel 1 - La Sainte Bible en Langue Yipunu

David amagulu mfuanga tsiSaul

¹ Saul anofu, David agumabelisa baAmalec amaletsana bilumbi bibeji o Siclag.

² Mu yilumbu yimurieru mufudu amaruyila o milaku miSaul na bitsatsu bibikutu na muru uotsu ubasa de na butamba. Anotola va gusu David amkebuaga va tsi.

³ David amamuwivula rie: Agunyi guiruyisini? Amawaka rie: Bagora baIsrael bamarina na bapuela bamafu; nesi Saul na muana andi Jonatan bamafu.

⁴ David amamuwivula rie: Diambu yi dimalabana? Dinsinguli! Amawaka rie: Bagora baIsrael bamarina na bapuela bamafu; nesi Saul na muana andi Jonatan bamafu.

⁵ David amamuwivula rie: Tsie gumajabila yiri Saul na muana andi Jonatan bamafu?

⁶ Mufudu eni amavosa rie: Nyibetsi va julu mukongu uGuilboa; nsilabilila Saul ekebuaga va julu dikongu diandi na nsilabilila makalu na babeyitsi babakabala bibavinitsi ababetsi bebeli nandi.

⁷ Anogeluga atsindabilila na atsindengila. Nsiwagula rie: Meʼ janduʼgu!

⁸ Atsikwivula rie: Ndeʼ la nyi? Nsimuwagula rie: Nyiji muisi Amalec.

⁹ Atsituma rie: Kweka gunu, gukandukula; misu mami yika utsiengila metsiengili, murima yika uleluga!

¹⁰ Nsikweka ombu gandi na nsimulukula, nsijaba na buranga yiri agomuedila monyu. Nsigusula dugaba na mulunga abibetsi nandi; abibi nyigubeyili fumu ami.

¹¹ David amapansa biduaru biandi na botsu abamaba vana bamavaga munongu mosi.

¹² Bamakota bukuili, bamalilanga na bamabusa uji te na tsisiga mu diambu dimfuanga tsiSaul na tsimuana andi Jonatan na tsibatu baFumu na tsibisi ndagu Israel; botsu abamaboku.

¹³ David amawivula mufudu eni rie: Ndeʼ muisi yi? Amawaka rie: Nyivu muana umuenyi, muisi Amalec.

¹⁴ David amagamuga rie: Tsie gugaalabila goma uboka kaga aguvu yibiatsi yiFumu?

¹⁵ David amanengila musalitsi andi rie: Ruga, muboki! Musalitsi eni amaboka muisi Amalec.

¹⁶ David amalemutsingula rie: Malungu magu mabi va julu muru agu! Ndeʼ beni gumakesingisila bumbeji ava gutsivosila rie: Meʼ beni nsiboka yibiatsi yiFumu.

Duimbu dumanyonyi duDavid mu diambu didufu duSaul na duJonatan

¹⁷ Adudu la duimbu dumanyonyi adu David amatuba mu diambu didufu duSaul na dumuana andi Jonatan

¹⁸ adu amaruma ulonsa baJuda. Duonyi la duimbu dupita: dumasonugu mu Dibuku Di-Agusungama.

¹⁹ Baneni baIsrael bamafu va julu tsimikongu miagu. Tsie bangogaga bamaberuyila?

²⁰ Duyadisamuna o Gat, duyanyavisa misamu mu mansila maAscalon, banumba babaPhilistin bakesangila, banumba ba-abasarebu bakelunga.

²¹ Mikongu miGuilboa nesi disala nesi mfula biyanogulu va julu mionyi, nesi manungi ameburi biumanga abi bevaguli pagu! Avana ngubu tsibangogaga tsimabuagulu, na ngubu jiSaul ajisamamuetsatsu matsi.

²² Pita jiJonatan jimabanganga na mangolu uyenabokanga bavinitsi. Dijenga diSaul dimayenaviunsungu uyenabokanga bangogaga.

²³ Saul na Jonatan bamarondasana tindi urondasana te na dufu duogu, basamakakana nesi mu dufu duogu. Bamaba na mansunsa uviolila bambira na bamaba na mangolu uviolila bimbungu.

²⁴ Banumba baIsrael, lilanu mu diambu diSaul, amaduduisanga tindu ududuisa biduaru bibenga, amaduduisa kembu tsilora.

²⁵ Dibandu yi bangogaga bamaberuyila o divita? Dibandu yi Jonatan amafuila va julu mikongu miagu?

²⁶ Ka muna munyongu gu uvu nami mu diambu diagu Jonatan, muana taji ami, mbatsi ami, gumandasanga ubueji. Gumatonda na durondu adumaviolila nesi durondu adu mugetu erondi dibaala.

²⁷ Dibandu yi bangogaga bamaberuyila? Dibandu yi bitogulu biogu bimatsiemuyila?