2 Pierre 2 - La Sainte Bible en Langue Yipunu

Milonsi mimfurulu

¹ Va kala vamaba babiyitsi bamfurulu, munongu mosi va gari enu voba milonsi mimfurulu. Jogu bolonsa malongi amorombisa batu ubungana na bogala Fumu omabagobula, adina diubarombisa usundila ubungana.

² Ne nana bapuela bobaduka nesi ugukulila bifu biogu te na batu bodesa ngensa.

³ Na ngusu ogu jogu bodudionga na mambu mandunsulu tumba bunsonsi bumabatabululu kala kabogu bobungana.

⁴ Nsambi asamawamusa biansa abimavaga masumu tumba amabibuaga o bulungi bumuji abuvu pisama na ebikelisi bitungu te na yilumbu yibunsonsi.

⁵ Va temu Noe Nsambi asamawamusa batu beni tumba amabasa butamba buotsu na nyidu; yika Noe agumasamuna mambu mangensa na yisambuali yiandi bamagobulu.

⁶ Nsambi amabunga na amasielasana Sodome na Gomorrhe ulubusa balensitsi amoba o gusu.

⁷ Tumba amagobula Lot agumaba asungama, agumalaba munyongu mu diambu dibifu bibatu bandi abimaviolila ubiva.

⁸ Jandi amalabanga munyongu mu mbari bilumbu biotsu amatsananga va gari jogu abamaba na bifu abimaviolila ubiva.

⁹ Kabogu Fumu ewamusi batu abemuduki na mbangulu tsiogu; batu babi ekelisingi te na yilumbu yibunsonsi

¹⁰ sinsa viri jogu abavu na dunyungi na abelensi durumu duandi. Jogu bana muanganga na dunangu na bepeji bisi julu.

¹¹ Ne biansa abebaviolili mangolu bigebafuengilili ombu Fumu ava bevioyili va gusu andi.

¹² Baji nderi bibulu abigaa na diela abimaburu yika ugaangu noboku; bagejabi dibandu yi besiengi. Munongu mosi jogu wogu bobungu nana bibulu; bolaba maguga nana bamalasila basusu maguga.

¹³ Belabi nsangu jineni udugusu nsala tsiogu va misu mabatu; ne nana berondi utsana nenu ava duilili va mosi nderi bagevayi mabi vo bagaa na bifu bibi.

¹⁴ Jogu bana nsala bagetu na bagetoyi uvaga kulini nogu. Bedunsi abadeda na bana ngusu. Baji o tsi mulogu uNsambi.

¹⁵ Baji nderi mutu agumapembuga nsila kabogu bamatsiemuga. Baji dedi na Balaam muana Bosor omaronda ufutu uvayila mutu dibi.

¹⁶ Balaam amasiembu na yibulu ayimamubeganga ava yimavosila nandi na diufi dimutu umugubitsa uvaga buduka buandi.

¹⁷ Batu beni bavu nderi bileka abimakamuga, baji nderi yimbongila ayimatisi difufundu; Nsambi amabakunsila mbura ajivu yika pisama na pisama.

¹⁸ Malongi mogu melasi yiri bavu na dunangu na bavu biduka nesi bifu biogu bivu nderi mirambu amiuwakusulu ababanogobulu va gari jogu abagejabi Fumu.

¹⁹ Bevangini na batu yiri bobajeyisa tumba jogu beni baji baviga babifu bibi: yiotsu ayi mutu orumu na dibi, dibi dieni divu nderi fumu andi, diwendi rie: aji muviga udionyi.

²⁰ Batu bamarina nsoruru tsibulongu ava bamajabila Fumu na Mugobutsi etu Jesus Christ. Tumba pa batu beni bomuefuama mu mabi amamalebusu bobiva uviolila.

²¹ Ubueji uka? Bamalelonsu ngensa mbana jogu beni bamabusa diruma diNsambi na kanda. Tsiri uviolila ubueji mbe basamalejaba ngensa?

²² Banongu betulonsi rie: Mondi omueji bilusi abi amaluga va julu vana ngulu ajimabuitsu jiumuegolana diobu. Tsiri nana tuilabili?