2 Misamu 9 - La Sainte Bible en Langue Yipunu

Kaga jimugetu uSaba uwenda ewendi ombu Salomon

¹ Kaga jimugetu uSaba amagulu diduma diSalomon. Kabogu amawenda o Jerusalem uyenamuweliga na bivu biranga. Amaba na yinombu yineni yibasalitsi na basamo abamabeganga bima bimbunga jiboti na lora tsipuela tsipuela na mamanyi madufunu duneni. Amawenda ombu Salomon na amamuwivula bivu abimaba nandi.

² Salomon amawagula bivu biandi biotsu, vasamaba ne yimosi ayi asamarungula umuwagula.

³ Kaga jimugetu uSaba amalaba diela diotsu diSalomon na ndagu aji amarungisa;

⁴ na biguji bitavula andi na mandagu mabasalitsi bandi na bisalu na biduaru bijogu abamamusalilanga na baboyi bandi na biduaru biogu na pagu tsiandi tsiunyensa atsi amavagulanga ombu Fumu.

⁵ Amakambulu tindi ukambulu na amatsingula kaga rie: Kabogu adi nyimagulu o bulongu buami mu diambu dibuneni buagu na diela diagu divu dingensa!

⁶ Ngaalevaganga yitu ne ngaruga nolaba na misu mami. Kabogu adi nyimagulu yika pesu. Ka muna diela di! Ka muna digumba di!

⁷ Ka muna ubueji gu uvu na batu bagu! Ka muna ubueji gu uvu na basalitsi bagu abavu va gusu agu temu tsiotsu ugulungu diela diagu!

⁸ Diboti ombu Fumu Nsambi agu oyilabingi ubueji nagu, agumaguviosa va yitsiga yibufumu yiIsrael! Nsambi erondingi baIsrael kabogu amagubiatsa kaga ogu yiri gubalasanga dusungugu.

⁹ Va julu vana kaga jimugetu uSaba amavega kaga Salomon tona yirieru na yibuku tsilora na dutalu duneni dubima bimbunga jiboti na mamanyi madufunu duneni. Na kala vasakalabana dutalu dibima bimbunga jiboti dumunongu eni adu kaga jimugetu uSaba amabega kaga Salomon.

¹⁰ Makumbi mamamba makaga Hiram mamabeganga lora jiOfir, mamabega na tsimbi tsisantala na mamanyi madufunu duneni.

¹¹ Kaga Salomon amavaga bisiku biyikadi yiNdagu Nsambi na bindagu andi na basambi na bangomfi na tsionyi. Tsimbi tsimunongu eni tsisantala tsisakalabana na kala o bulongu buJuda.

¹² Kaga Salomon wandi amavega kaga jimugetu uSaba biotsu abi amaronda va julu vana amamuvega bima abi jaʼ beni amaronda umuvega. Mbana amayenagabuga o bulongu buandi, jogu na basalitsi bandi.

Busina buSalomon

¹³ Salomon amadila magumabeji matona tsilora mu yilima yimosi.

¹⁴ Va julu vana amadila atsi batiyitsi bamuteti na bakaga baArab na bivunda bibulongu bamamufutila.

¹⁵ Kaga Salomon amavaga kama beji tsingubu tsilora atsimabaku, ngubu ngubu kilu yisiamunu,

¹⁶ kama yirieru tsisusu tsingubu tsilora atsimabaku, ngubu ngubu kilu mosi na yibuku; kaga amatsisunsa o ndagu jimusiru o Liban.

¹⁷ Kaga amavaga yitsiga yibufumu yipungi na amayikubiga tindi lora.

¹⁸ Yitsiga yiandi yibufumu yimaba na yikadi yitaka yisiamunu na yisunsulu yimakulu yilora ayimanamusunu na yitsiga yibufumu; yiari na yiari biyitsiga bimaba na bisunsulu bimiogu; bibagunu bibeji bibimbungu bimaba yiari na yiari na yigumi na bibagunu bibeji bibimbungu bimaba yiari na yiari biyikadi yieni.

¹⁹ Vasakavagu yitsiga yimunongu eni nesi mu bufumu bususu.

²⁰ Mamoyi motsu makaga Salomon mamaba malora na lora na bipela biotsu bindagu jimusiru jiLiban bimaba bitindi lora. Ne yimosi yisamba yilora jivema mu mbari jionyi jisamaba na tsongu va temu jiSalomon.

²¹ Kaga amaba na makumbi mamamba amamabegu na basalitsi baHiram; kumbu mosi mu bilima birieru makumbi mamabeganga lora na lora jivema na bapungi na bakari na bambulu.

²² Kaga Salomon amaba muneni uviolila bakaga botsu basusu nesi mu busina nesi diela.

²³ Bakaga botsu bamarondanga ulabana na Salomon uyegulungu diela adi nsambi amamuvega.

²⁴ Yilima na yilima batu bamamubeyilanga milendu amimaba bima bilora jivema nesi bilora na biduaru na bitogulu na bima bimbunga jiboti na bakabala na baburu.

²⁵ Salomon amaba na mbura tsiwelimina ukelisa tosini jina tsibakabala atsimadutanga makalu mandi; na yigumi na tosini beji tsibabeyitsi babakabala; amaviosa bamosi o misiengi ami amakelisilanga makalu mandi na basusu o Jerusalem.

²⁶ Ainaviolilanga bakaga botsu buneni ubandila o mujamba te no bulongu bubaPhilistin nesi te no mandilu maEgypte.

²⁷ Kaga amafunisa lora jivema o Jerusalem nderi ubuayila mondi, dedi mosi na tsimbi tsimisedera wandi.

²⁸ Salomon amadililanga bakabala bandi o Egypte.

Dufu duSalomon

²⁹ Misamu misusu miSalomon mimasonugu mu Dibuku diMubiyitsi Natan na mu Mbigulu tsiAhia muisi Silo na mu Ndasulu tsiMubiyitsi Yedo, dibuku adilasi bisalu biJeroboam muana dibaala uNebat agumaba kaga jiIsrael.

³⁰ Salomon amaruma baIsrael magumana mabilima o Jerusalem.

³¹ Mbana Salomon amafu na amatsigu o musiengi utaji andi David. Roboam muana andi udibaala amaruma va yivinga yiandi.