2 Misamu 7 - La Sainte Bible en Langue Yipunu

Pagu atsimavagululu Fumu

¹ Salomon anomana usambila, muji umabonduyila o julu na umasielasana pagu tsiunyensa tsimunongu na munongu; bundumba buFumu bumabasa Ndagu Nsambi.

² Bavagulitsi bapagu basamarungula ukota o Mbura Nsambi mu mbari bundumba buFumu bumajibasa.

³ BaIsrael botsu bamalaba disundugulu dimuji na bundumba buFumu o Ndagu; bamasundila ugudama va tsi va dulombili uyenayitsa Fumu mu diambu dimaboti mandi na durondu duandi.

⁴ Kaga na batu botsu bamavagulila Fumu pagu tsiunyensa.

⁵ Bamabokisa magumabeji na tosini beji tsibangombi na kama na magumabeji matosini tsibindombu na binsabi. Anana kaga na baIsrael bamawakisila Ndagu Nsambi.

⁶ Bavagulitsi bapagu bamaba va mbura tsiogu. Bisi Levi bamasiga bisigu abi kaga David amavayisa uyitsa Fumu nowimbila nyimbu tsiuyitsila Fumu; bamayitsa Fumu mu diambu didurondu duandi duneni na nyimbu tsiDavid. Bavagulitsi bapagu bamasiganga mimbanda va nsungisini nogu. BaIsrael botsu bamaba diteli vana.

⁷ Salomon amawakisa dulombili aduvu va gusu Ndagu Nsambi; avana amavagulila pagu tsiunyensa na pagu tsitsangu na matsi mapagu tsikabusulu tsimaboti mu mbari yinyensulu yipagu yikunga ayimaba va gusu Ndagu Nsambi yimaba yiviolili ugeyi uvagulila Fumu pagu tsieni na miensili na matsi mapagu tsikabusulutsimaboti.

⁸ Va temu eni amakunsila feta jimasamba va mosi na baIsrael botsu wandi. Yinombu yineni yimaruyila o yiari yiLebo-Hamat o banda nesi o mujamba uEgypte o tandu.

⁹ Yilumbu yimunana bamavaga yibenguna yineni; bamawakisa yinyensulu yipagu te na yisambuali yibilumbu na bamavaga feta yisambuali yibilumbu bisusu.

¹⁰ Yilumbu yimagumabeji na birieru bitsungi jimusambuali Salomon amaganina baIsrael, bamagabuga na nsangu nobueji; mirima miogu mibasa de na maboti ama Fumu amavayila David na Salomon na batu bandi baIsrael.

Fumu amamuelabana ombu Salomon

¹¹ Salomon anomana urunga Ndagu Nsambi na ndagu andi na biotsu abi amaronda urunga o Ndagu Nsambi no ndagu andi,

¹² temu ajimubeji Fumu amamuelabana nandi mukolu. Fumu amamutsingula rie: Nyimagulu dusambu duagu na nyimasola mbura ejiji nderi Ndagu aji dupagulilanga pagu tsiunyensa.

¹³ Diurungula uba yilumbu yimosi nyudibiga julu na mfula jigomuenoga vo nyuruma makokoku ubunga bulongu vo nyutindila batu bami yivunga;

¹⁴ pa batu bami abenengulungu na diina diami bokesundusa nosambila nokengila na pa boliyila mabi mogu nsima, nyubagulu ava nyivu o julu na nyubatanda masumu mogu nobavega digumba.

¹⁵ Ubanda namunyi nyubagengilanga na nyuba limba ugulu tsambu atsiusambulungu va mbura ejiji.

¹⁶ Nyimasola na nyimasinga Ndagu ejiji; nyuyitsaninanga te na mutubu, nyujigengilanga yisuisu na nyudurangiminanga.

¹⁷ Mbe ka ndeʼ pa gudugusu duganu duami nana taji agu David amadudugusulungu na murima uotsu, novanganga motsu ama nyimaguruma, pa guikelisi migaga miami na maruma mami,

¹⁸ jaba yiri nyuwarisa yitsiga yibufumu buagu mutubu nana nyimatsingulila taji agu David rie: Gugogambu na yivinga va yitsiga yibufumu buIsrael.

¹⁹ Tumba pa duindiyili nsima jenu na baana bagu nobusa migaga miami na maruma mami abi nyimaduruma, pa dusalila bansambi bangana nobakutimina,

²⁰ nyudutsiemusa o bulongu abu nyimaduvega na nyuliyila Ndagu aji nyimaletsaninanga nsima. Va gari malongu motsu, baIsrael bodesungu nopejungu.

²¹ Ava batu bovioyila va mugula Ndagu ejiji bokambulu novosa rie: Agu! Bowivula rie: Dibandu yi Fumu amavayila bulongu buebubu na Ndagu ejiji nana?

²² Mbana batu bobawagula rie: Bamabusa Fumu Nsambi ogu agumapalisila bataji bogu o Egypte na bamakevega ombu bansambi bangana, nesi ubakutimina nesi ubasalila; la dibandu Fumu ebalasili maguga meni motsu.