2 Misamu 6 - La Sainte Bible en Langue Yipunu

¹ Mbana Salomon amasambila rie: Fumu guirondi utsana o tsi dimungi.

² Tumba nyimagurungila Ndagu jineni, mbura aji gutsaninanga te na mutubu!

Amamavosu va temu aji Ndagu Nsambi jimawakusulu

³ Dibuli diotsu dimaba diteli; kaga Salomon amageluga ombu gogu ubagabila miula.

⁴ Mbana amavosa rie: Diboti ombu Fumu Nsambi Israel agumavosa jaʼ beni na taji ami David na jandi edugusu ama amatubula rie:

⁵ Ubandila va yilumbu ayi nyimapalisila batu bami baIsrael o Egypte, nyisamasola ne musiengi umosi ubifumba biIsrael utungila Ndagu muna aji nyutsaninanga, na nyisamasola mutu ususu uba sefu jibatu bami baIsrael.

⁶ Tumba nyimasola Jerusalem yiri nyutsananga muna, nyimasola David urumanga batu bami baIsrael!

⁷ Taji ami David amaba na murima urungilaFumu Nsambi Israel Ndagu.

⁸ Fumu amatsingula taji ami David rie: Diwelimina yiri guna murima utungila Ndagu,

⁹ tumba tsiri ndeʼ agurunga Ndagu; muana agu otungila Ndagu.

¹⁰ Salomon amabuesa rie: Fumu amadugusu mambu mandi. Nyimavinga va mbura taji ami David na nyivu va yitsiga yibufumu yiIsrael nana Fumu amavosila na nyimarungila Fumu Nsambi Israel Ndagu.

¹¹ Nyimakunsa mbura jiyigara yipangini yiNsambi, pangini aji amavangana na baIsrael.

Dusambu duSalomon

¹² Mbana Salomon amavioga va gusu yinyensulu yipagu yiFumu va nsungisini na dibuli diotsu dibaIsrael. Amasamba miogu o julu usambila.

¹³ Salomon amarunga mbura jibukaga jikunga o dulombili; usakama ujionyi umaba metera beji na yibuku na yirela yijionyi metera mosi na yibuku; amamata va julu jionyi, amakutama va gusu dibuli diotsu diIsrael na amasamba miogu o julu usambila.

¹⁴ Mbana amasambila rie: Aa Fumu Nsambi Israel! Vagaa Nsambi agubagunu nagu nesi o julu nesi va butamba: guikelisi pangini na guilasi yingeba ombu basalitsi bagu abewendingi sungingi va gusu agu!

¹⁵ Gumakelisa pangini aji gumavangana na musalitsi agu, taji ami David. Nyiina, adi gumavosa gumadidugusu namunyi.

¹⁶ Kokolu tsiagu Fumu Nsambi Israel, kelisa pangini aji gumavangana na taji ami David ava gumavosila nandi rie: Te na mutubu gugogambu na yivinga va gusu ami ayiutsananga va yitsiga yibufumu yiIsrael, dimosi buandi, baana bagu bakebini na bifu biogu, bawendingi va gusu ami nana ndeʼ beni gumawendilanga.

¹⁷ Aa Nsambi Israel pangim aji gumavangana na taji ami David, kokolu, jidugusu!

¹⁸ Yika tsie! Je Nsambi otsananga na batu va butamba? Gulu, julu na tindi julu jigaa mbura jiwelimina nagu; tambusa na Ndagu ejiji aji nsigurunguila!

¹⁹ Tumba Fumu Nsambi ami ba limba ugulu dusambu duami na dulembu duami; gulu migamu na tsambu atsi nyigusambili.

²⁰ Gengila Ndagu ejiji aji gumavosila rie: Avana nyutsaninanga! Gulu dusambu duami adu nyigusambili va mbura ejiji.

²¹ Gulu dulembu duami na dubatu bagu baIsrael ava tugusambililanga va mbura ejiji. Nyiina, gulu avaguvu o julu, gulu notutandila wandi!

²² Pa mutu ovayila mutu nandi dibi na bomutsotsa uleva pesi umutabulila bunsonsi na pa oyijiwarisa va yinyensulu yiagu yipagu o Ndagu ejiji,

²³ ndeʼ Fumu aguvu o julu, mugulu, muwamusi na tabulila basalitsi bagu bunsonsi; vega mungo mbela mbela; vega mungo ndunga ndunga.

²⁴ Ava BaIsrael bobetsulu na bavinitsi mu mbari bamaguvayila mabi; pa begabuyi ombu gagu uguyitsa na pa begusambili nogulembiyila o Ndagu ejiji,

²⁵ ndeʼ Fumu aguvu o julu, bagulu na tandi dibi diogu na bagabusili malongu ama gumalevaga bataji bogu!

²⁶ Ava julu jiudibimina na mfula jigomuenoga mu diambu dimabi ama baIsrael bamaguvayila, pa boyisambila va mbura ejiji noyitsa diina diagu nokesunsa va gusu agu na pa boliyila mabi mogu nsima mu mbari gumabakilisa,

²⁷ ndeʼ Fumu aguvu o julu bagulu na batandi dibi diogu mu mbari bavu basalitsi bagu; balonsi udugusu duganu duagu mbana banoyisili mfula mu butamba abu gumabavega disiala.

²⁸ Ava dungosu dunsala nesi yivunga nesi bivaru biunyenga nesi ubumba nesi makoko-ku mamunongu na munongu biubila mu bulo-ngu; ava bavinitsi bokandila batu bagu o bu-longu buogu nesi o mandagu ava bidungu biulabinina nesi mali

²⁹ pa batu bagu baIsrael bogusambila nogulembiyila pa bogengila Ndagu ejiji na munyongu, mutu mutu na mu-rima nosamba makaka ugusambilila;

³⁰ ndeʼ Fumu aguvu o julu bagulu, batandi na bawa-musi na vayila mutu mutu dedi mosi na bifu biandi; ndeʼ aguijabi murima umutu mutu; bundeʼ aguijabi mirima mibatu.

³¹ Vaganga yiri bogudumanga temu tsiotsu atsi botsana-nga o bulongu abu gumavega bataji betu!

³² Ava benyi abagaa mu dibuli dibaIsrael borambuyila o bulongu buvala mu mbari bo-gulu diduma diagu na nana mangolu magu mamalasulu yiari na yiari,

³³ ndeʼ Fumu aguvu o julu bagulu na bavayili ama bogusambilila o Ndagu ejiji. Mbana bisi malongu motsu bojaba diina diagu na boguyitsanga nana batu bagu baIsrael beguyitsilingi na bojaba yiri diina diagu diusambulungu o Ndagu aji nyimagurungila!

³⁴ Ava batu bagu boyebengusinina bavinitsi bogu o divita mu mbari gumabaruma udivaga; pa bogusambilila na pa bogengila o yiari yimusiengi agu gumasola no Ndagu aji nyimagurungila,

³⁵ gukagulu tsambu tsiogu, ndeʼ Fumu aguvu o julu, bawamusi!

³⁶ Ava baIsrael boguvayila mabi, mu mbari vagaa mutu ne umosi agugevayi mabi, avu gubanyoyila kabu na gubawakisa ombu bavinitsi abobabega baviga o bulongu buogu abavu vala vo bebeli;

³⁷ pa bokalula diela o bulongu abu bobila baviga, pa boruga ombu gagu nogulembiyila o bulongu bungana abu bavu baviga novosa rie: Tumavaga masumu, tumaviosulila uvaga mabi!

³⁸ Pa bogabuga ombu gagu na mirima miogu miotsu o bulongu bubavinitsi bogu abamabavaga baviga, pa bogusambila tsambu na borangimina bulongu abu gumavega bataji bogu pa bogengila o yiari yimusiengi agu nde gumasola no Ndagu aji nyimagurungila,

³⁹ kokolu tsiagu gukagulu tsambu tsiogu ndeʼ Fumu aguvu o julu bawamusi. Batandi mabi mogu na nsimbulu tsiogu tsiotsu atsibamagutsimbulu.

⁴⁰ Kokolu tsiagu Nsambi ami tugengili! Gulu dulembu adu nyigusambili va mbura ejiji.

⁴¹ Fumu Nsambi, kokolu tsiagu lerelamati ruga o mbura agu jiyivumu ndeʼ na yigara yiagu yipangini. Fumu Nsambi bavagulitsi bagu bapagu balasi dugobutsu, abagu badurondu balabingi maboti magu!

⁴² Fumu Nsambi, gumabiatsa kaga ogu, rangimina maboti magu motsu ama gumasingisa musalitsi agu David.