2 Misamu 5 - La Sainte Bible en Langue Yipunu

¹ Salomon anomana usala yisalu yiotsu yiNdagu Nsambi, amabeyisa lora na bisalulu biotsu abi taji andi David amawakisa na amabikotisa mu bilundulu biNdagu Nsambi.

Yigara yipangini yiNsambi yimasunsu o Ndagu Nsambi

² Va temu eni kaga Salomori amanengila bivunda biotsu biIsrael na basefu botsu babifumba na bamikuta mibaIsrael o Jerusalem, uyebonga yigara yipangini yiNsambio Sion agumaba musiengi uDavid uyikotisa o Ndagu Nsambi.

³ Kabogu baIsrael bamagukama ombu kaga uvaga feta jitsungi jimusambuali.

⁴ Bivunda biIsrael va mosi na bavagulitsi bapagu bamabega yigara yipangjni yiNsambi.

⁵ Bavagulitsi bapagu na bisi Levi bamanangula yigara yipangini yiNsambi na Ndagu Yibenguna jitsanda na bisalulu biotsu biyingitsi abimasalulu muna.

⁶ Kaga Salomon na dibuli diotsu dibaIsrael bamagukama ombu gandi va gusu yigara yipangini yiNsambi bamabega puela bindombu na bangombi abasamarungulu nesi utala nesi uranga uvagulu pagu tsiunyensa.

⁷ Bavagulitsi bapagu bamakotisa yigara yipangini yiNsambi o Mbura Ajivu Tindi Yingitsi o tsi mapapi mabibagunu bibiansa.

⁸ Bibagunu bibiansa bimasamba mapapi va julu yigara yipangini yiNsambi na mamakubiga yigara yipangini na manguangu mayionyi.

⁹ Manguangu meni mamaba masakama te na basamalabililanga makodu mamonyi va gusu kana Mbura Nsambi tumba masamalabananga va gusu kana yigara yipangini, mavu vana te na namunyi.

¹⁰ O gari yigara yipangini yiNsambi umaba yika mamanyi mabeji mamigaga ama Moise amapodula munao Horeb ava Fumu amavanginina pangini na baIsrael ava bamapalila o Egypte.

¹¹ Ava bavagulitsi bapagu bamapalila o Mbura Nsambi bavagulitsi bapagu botsu abamaba vana bamakeliomisa, basamakipa makabu mogu.

¹² Bisi Levi abamasiganga bisigu bamaba vana: Assaf na Heman na Yedoutoun va mosi na baana bogu bababaala na bisi Levi basusu, botsu bamaduara bikutu bilina; bamasiganga bambumbu na bangomfi na basambi va mugula yinyensulu yipagu o yiari ayi wisi epalili. Va mugula ogu vamaba kama na magumabeji mabavagulitsi bapagu abamasiganga mimbanda.

¹³ Abamasiganga mimbanda na abamawimbilanga bamagukama va mosi uyitsanga nododisanga Fumu, bamasiyilanga mimbanda na mambumbu na bisigu bisusu, bamayitsa Fumu na mambu memama rie: Yitsanu Fumu mu mbari aji muboti, durondu duandi duitsingingi te na mutubu! Vana temu eni dimungi dimabasa Ndagu Nsambi.

¹⁴ Bavagulitsi bapagu basamarungula usala yisalu mu diambu didimungi mu mbari bundumba buFumu bumabasa Ndagu Nsambi.