2 Misamu 5 - La Sainte Bible en Langue Yipunu1 Salomon anomana usala yisalu yiotsu yiNdagu Nsambi, amabeyisa lora na bisalulu biotsu abi taji andi David amawakisa na amabikotisa mu bilundulu biNdagu Nsambi. Yigara yipangini yiNsambi yimasunsu o Ndagu Nsambi ( 1 Baka 8.1-13 ) 2 Va temu eni kaga Salomori amanengila bivunda biotsu biIsrael na basefu botsu babifumba na bamikuta mibaIsrael o Jerusalem, uyebonga yigara yipangini yiNsambio Sion agumaba musiengi uDavid uyikotisa o Ndagu Nsambi. 3 Kabogu baIsrael bamagukama ombu kaga uvaga feta jitsungi jimusambuali. 4 Bivunda biIsrael va mosi na bavagulitsi bapagu bamabega yigara yipangjni yiNsambi. 5 Bavagulitsi bapagu na bisi Levi bamanangula yigara yipangini yiNsambi na Ndagu Yibenguna jitsanda na bisalulu biotsu biyingitsi abimasalulu muna. 6 Kaga Salomon na dibuli diotsu dibaIsrael bamagukama ombu gandi va gusu yigara yipangini yiNsambi bamabega puela bindombu na bangombi abasamarungulu nesi utala nesi uranga uvagulu pagu tsiunyensa. 7 Bavagulitsi bapagu bamakotisa yigara yipangini yiNsambi o Mbura Ajivu Tindi Yingitsi o tsi mapapi mabibagunu bibiansa. 8 Bibagunu bibiansa bimasamba mapapi va julu yigara yipangini yiNsambi na mamakubiga yigara yipangini na manguangu mayionyi. 9 Manguangu meni mamaba masakama te na basamalabililanga makodu mamonyi va gusu kana Mbura Nsambi tumba masamalabananga va gusu kana yigara yipangini, mavu vana te na namunyi. 10 O gari yigara yipangini yiNsambi umaba yika mamanyi mabeji mamigaga ama Moise amapodula munao Horeb ava Fumu amavanginina pangini na baIsrael ava bamapalila o Egypte. 11 Ava bavagulitsi bapagu bamapalila o Mbura Nsambi bavagulitsi bapagu botsu abamaba vana bamakeliomisa, basamakipa makabu mogu. 12 Bisi Levi abamasiganga bisigu bamaba vana: Assaf na Heman na Yedoutoun va mosi na baana bogu bababaala na bisi Levi basusu, botsu bamaduara bikutu bilina; bamasiganga bambumbu na bangomfi na basambi va mugula yinyensulu yipagu o yiari ayi wisi epalili. Va mugula ogu vamaba kama na magumabeji mabavagulitsi bapagu abamasiganga mimbanda. 13 Abamasiganga mimbanda na abamawimbilanga bamagukama va mosi uyitsanga nododisanga Fumu, bamasiyilanga mimbanda na mambumbu na bisigu bisusu, bamayitsa Fumu na mambu memama rie: Yitsanu Fumu mu mbari aji muboti, durondu duandi duitsingingi te na mutubu! Vana temu eni dimungi dimabasa Ndagu Nsambi. 14 Bavagulitsi bapagu basamarungula usala yisalu mu diambu didimungi mu mbari bundumba buFumu bumabasa Ndagu Nsambi. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon