2 Misamu 4 - La Sainte Bible en Langue Yipunu

¹ Bamavaga yinyensulu yipagu yikunga, usakama uyionyi yigumi yimetera na uroga uyionyi yigumi yimetera na muranga uyionyi metera yiranu.

Nsienga jineni na bansienga bakunga

² Bamavaga nsienga jikunga, uroga ujionyi metera yiranu na jimaba tindi dugongula; udonga ujionyi metera beji na yibuku na mukudu uyigumi na metera yiranu umawetsugulu utsiengila mungongu unsienga.

³ Bima abimaba na bibagunu bibangombi bimatsieingusu o tsi mungongu ujionyi. Kadi yibuku yimetera yimanamugu yigumi yibionyi, utsiengila nsienga jiotsu bima abimabagunu na bangombi bimaba milonga mibeji, diwendi rie: bimasulumusu yibuku yimosi na jionyi.

⁴ Jimasunsu va julu yigumi na bibagunu bibeji bibangombi bikunga, birieru o yiari yibanda, birieru o yiari ayi wisi ewendisini, birieru o yiari yitandu na birieru o yiari ayi wisi epalili; nsienga jimaba va julu bionyi bamalasanga yika miuru.

⁵ Mugobu ujionyi umaba yinana yisantimetera; na mungongu ujionyi umabagunu na mungongu udimoyi na jimabaku balisa. Jimaba na yietsu yikama na magumabeji matosini tsimbuta.

⁶ Bamavaga yigumi yinsienga tsisusu wandi na bamasunsa yiranu o yiari yimabaala maNdagu Nsambi na yiranu o yiari yimagetu, atsimasalusu mu duliomusu; amuna bamasusilanga abivu biwelimina ususa mu bima bipagu tsiunyensa. Bavagulitsi bapagu bamasalisa nsienga ajineni ugolilanga.

Bisalulu bimunongu na munongu biNdagu Nsambi

⁷ Bamavaga yigumi yimangasa malora nana bamarumunu na bamamakotisa o yibuku yineni yiNdagu Nsambi, maranu o yiari yimabaala na maranu o yiari yimagetu.

⁸ Bamavaga yigumi yitavula na bamatsikotisa o yibuku yineni yiNdagu Nsambi, yiranu o yiari yimabaala na yiranu o yiari yimagetu. Mbana bamavaga kama jimamoyi malora.

⁹ Bamavaga dulombili dubavagulitsi bapagu na dulombili aduneni na maguyi amanamugu kunga.

¹⁰ Nsiengi jikunga ajimaba tindi dugongula yimasunsu o yiari yimabaala yiyitunga ayimaba o yiari yitandu yiyiari ayi wisi ewendisini.

¹¹ Hiram amavaga bisunsulu bimabufu na bipela na mamoyi. Anana Houram amamanina usala yisalu yiNdagu Nsambi ayi kaga Salomon amamuruma:

¹² Makutu mabeji na biviovi bibeji bidugongula abimasunsu o julu tsimakutu na bima bibeji abimaba nderi mbusa abimakubiga kodu tsimakutu

¹³ kama jina tsibibagunu bimigeranada abimanamugu milonga mibeji mimbusa tsiotsu o kodu tsimakutu;

¹⁴ na yigumi yimabandu na yigumi yibansienga abimasunsu va juiu tsimabandu

¹⁵ na nsienga jineni na yigumi na ngombi beji abamasunsu o tsi jionyi

¹⁶ bisunsulu bimabufu na bipelu na misomu. Bisalulu bieni botsu abi kaga Salomon amaruma Houram-Abi uvaga mu Ndagu Nsambi bimavagu na kunga ajimaliomusu tindi uliomusu.

¹⁷ Kaga amaruma batu ubisulumusa o kumu Jourdain va gari Soukot na Seredata.

¹⁸ Salomon amavayisa bisalulu bipuela bipuela te na basamamuejaba dutalu dubakilu bakunga.

¹⁹ Salomon amavayisa bisalulu biotsu bisusu biNdagu Nsambi: yinyensulu yipagu yilora na batavula abamasunsulungu mapa mapagu

²⁰ na marigasa na lambi tsiogu tsitindi lora atsimabangusungu nana diruma dimasonugulu atsimalulanga va gusu Mbura Nsambi,

²¹ na bafelera na balambi na batsimusulu bilora tindi lora;

²² na bambaga na mamoyi na bisunsulu bimuji bitindi lora; maguyi malora maNdagu Nsambi, maguyi mayibuku ayineni; motsu mamaba matindi lora.