2 Misamu 34 - La Sainte Bible en Langue Yipunu

Durumu duJosias

¹ Josias amaba na yinana yibilima ava amabandila uruma na amarumanga magumarieru na yilima yimosi o Jerusalem.

² Amavaganga amamalasa Fumu ubueji na amadukanga bifu bitaji andi David; asamagungisa ne yimosi ne yisusu.

³ Yilima ayimunana yidurumu duandi ava mbe akivu mufudu amaromba Fumu Nsambi taji andi David na mu yilima yiyigumi na bibeji bidurumu duandi amabanda urakula mbura tsiduyitsu na bakosi na bitumba na bibagunu bimunongu na munongu abimaba o Juda no Jerusalem.

⁴ Va misu mandi bamapansila binyensulu bipagu bibaBaal na bitumba abimabumbulu wisi abimaba va julu bionyi. Amabula bakosi na bitumba abimapaku na abimasulumusu na amabikalusa difufundu na amakuka difufundu dieni va bangila bajogu abamabivagula pagu.

⁵ Mbana amanyensa bivisi bibavagulitsi bapagu va binyensulu bipagu. Anana amaliomisila Juda na Jerusalem.

⁶ Mbana amavioga misiengi miManasse nesi miEfraim na miSimeon na miNaftali mu mbura tsiotsu atsimabambana na mionyi:

⁷ amapansa biny ensulu bipagu na amabuia ba-kosi na bitumba abi amakalusa difufundu na amapansa bitumba abimabumbulu wisi o bulongu buotsu buIsrael. Mbana amayenagabuga o Jerusalem.

Yivunda yibavagulitsi bapagu amalaba dibuku dimigaga

⁸ Yilima yiyigumi na yinana bidurumu duandi anomana uliomisa bulongu na Ndagu Nsambi amasindiga Chafan muana dibaala uAssalia na Maasseya agumaba yivunda yimusiengi na Yoa muana dibaala uJoachaz agumaba musonitsi uyelonda Ndagu Nsambi jiNsambi andi.

⁹ Bamawenda ombu Hilquia yivunda yibavagulitsi bapagu na bamamuwakisa lora tsivema atsimategu o Ndagu Nsambi atsi bisi Levi abamaba bakelisi bamakotulu bamagunga ombu baManasse nombu baEfraim nombu baIsrael basusu nombu baJuda nombu baBenjamin nombu bisi Jerusalem.

¹⁰ Bamatsiwakisa ombu jogu abamawendisanga bisalu o Ndagu Nsambi. Bamatsisalisa ulonda Ndagu Nsambi

¹¹ ufuta basarpati na bamason nosumba mamanyi amamapaku na mikambu nomuerungulila mandagu ama bakaga baJuda bamapansa.

¹² Basalitsi beni bamasala bisalu biogu na murima uotsu o tsi durumu dubisi Levi: Yahat na Obadia mu mukuta uMerari; Zacharie na Mechoullam mu mukuta uQuehat. Bisi Levi basusu abamaba basiyitsi babisigu

¹³ bamawendisanga basalitsi abamasuvanga bima na abamasalanga bisalu bimunongu na munongu. Bisi Levi basusu bamaba basonitsi na barumitsi na bakelisi bamakotulu.

¹⁴ Ava batu bamapalisila lora jivema ajimabegu o Ndagu Nsambi, Hilquia muvagulitsi upagu amalaba dibuku dimigaga o gari Ndagu Nsambi.

¹⁵ Mbana Hilquia amatsingula Chafan agumaba musonitsi rie: Nyimalaba dibuku dimigaga o gari Ndagu Nsambi; mbana amadivega ombu gandi.

¹⁶ Chafan amabega dibuku ombu kaga na amamutsingula misamu rie: Basalitsi bagu bamasala biotsu abi bamarumu.

¹⁷ Bavagulitsi bapagu bamagukiga lora tsivema atsibetsi o Ndagu Nsambi na bamatsivega fumu tsibisalu nombu basalitsi.

¹⁸ Chafan amabuesa rie: Hilquia muvagulitsi upagu amapega dibuku diedidi. Mbana Chafan amadiranga va gusu kaga.

Josias na Houlda mubiyitsi umugetu

¹⁹ Ava kaga Josias amagululu mambu madibuku dimigaga amapasa biduaru biandi.

²⁰ Kaga amaruma Hilquia na Ahicam muana dibaala uChafan na Abdon muana dibaala uMika musonitsi uChafan na Assaya musonitsi ususu ukaga rie:

²¹ Yewivulanu Fumu mu diambu diami na baJuda botsu mu diambu dimambu ama tumagulu mu dibuku adimabolu. Bataji betu basamadedila mambu madibuku diedidi na basamaduka motsu amamatutsingulu muna la dibandu Fumu amanyoyila tindi kabu; jionyi jitugengili.

²² Hilquia yivunda yibavaguhtsi bapagu na botsu aba kaga amasola bamawenda ombu mubiyitsi umugetu diina diandi Houlda agumaba mugatsi Challoum muana dibaala uToquehat na mutegula uHasra agumakelisanga biduaru. Amatsaninanga o Jerusalem o yiari yisusu yimusiengi. Banomana uvosa nandi

²³ amabagabusila rie: Fumu Nsambi Israel jandi rie: Yetsingulanu dibaala aditsidusindiga ombu gami rie:

²⁴ Fumu jandi rie: Guluanu, nyulasa mbura ejiji nesi batu abetsani vana maguga dedi mosi nana dutsingululu mambu na dibuku adi kaga jiJuda amarangisa.

²⁵ Bisi Jerusalem bamambusa na bamavagulila bansambi bangana bima bimbunga jiboti, bamanyoyisa na bisalu biogu biotsu na nyimanyoyila bisi mbura eni tindi kabu, jionyi jigosaguga.

²⁶ Tumba dukatsingula kaga jiJuda agumadusindiga uyekwivula uwivula Fumu, Fumu Nsambi Israel jandi rie: Gumagulu bulumbi budibuku.

²⁷ Gumagulu na buranga adi nyimavosa mu diambu diJerusalem na batu abetsani muna: mukilu ogu uba uneni te na diina diogu diusalusu uwarisa mulogu. Gumakalula diela, gumasinga mbela agu te na gumapasa biduaru biagu na gumalila. Meʼ wami nyimagugulu, nyisingi amagu.

²⁸ La dibandu dufu duagu dugobila na mambu na gugolaba maguga motsu ama nyulasa bisi Jerusalem. Yivunda yibavagulitsi bapagu na bambatsi bandi bamayetsingula kaga kabusulu eni.

Josias uwarisa emuewarisa pangini na Nsambi

²⁹ Kaga amanengila bivunda biotsu biJuda na biJerusalem.

³⁰ Mbana bamawenda o Ndagu Nsambi jogu na babaala botsu baJuda na bisi Jerusalem botsu na bavagulitsi bapagu na bisi Levi na batu botsu ubandila na bageyi botsu te na bivunda. Kaga amabarangila mambu motsu madibuku dipangini adi bamarasuna o Ndagu Nsambi.

³¹ Kaga amaba diteli bebeli na dikutu na amamuewarisa pangini va gusu Fumu; avana amatabulila diambu yiri mutu mutu adukingi Fumu nokelisanga maruma mandi na migaga miandi miotsu na murima andi uotsu na matasa mandi motsu novaganga motsu amamasonugu mu dibuku dipangini. Batu botsu bamaba na kingu mosi.

³² Kaga amakotisa botsu abamaba o Jerusalem nesi baBenjamin muna pangini eni. Kabogu bisi Jerusalem bamasinga pangini jiNsambi jibataji bogu.

³³ Josias amatsiemusa nsoruru tsiotsu tsimalongu motsu mabaIsrael na amatsotsa botsu abamatsananga o Israel uyitsa Fumu Nsambi ogu. Yitsingu yiandi yiotsu basamaliyila Fumu Nsambi bataji bogu nsima.