2 Misamu 32 - La Sainte Bible en Langue Yipunu

Sennakerib utumuna etumuni bufumu buJuda

¹ Ezekias anolasa usigama uandi ombu Nsambi, Sennakerib kaga jiAssyrie amakota o Juda na amakanda misiengi mikandu na ditasa umipatula.

² Ezekias anolaba Sennakerib uruga eruyi na ditasa utumuna Jerusalem,

³ amatunga fundu na basefu bandi na bagora bandi bamangolu udibiga bileka abimaba yiari na yiari bimusiengi; bamasinga ditasa diandi.

⁴ Yinombu yineni yibatu bamagukama, bamadibiga bileka biotsu na mujamba uyiari yitandu agumavindamanga. Bamawivulanga rie: Dibandu yi baAssyrie borasuna mamba mapuela ava betolili?

⁵ Ezekias amawarisa murima nn amamuerungulila bivaga bimandagu masakama amamapansiga, amarunga yivaga yisusu o gusu kana; amawarisa Millo o musiengi uDavid na amavayisa bitogulu bipuela na bangubu.

⁶ Amasola bivunda bibagora urumanga bisi musiengi. Mbana amabagukiga va dikotulu dimusiengi na amabatsingula rie:

⁷ Duyaregama na duyakambulu! Duyalaba keri na duyalaba goma va gusu kaga jiAssyrie na va gusu bagora bapuela bapuela abavu nandi; mu mbari aguvu netu eviolili abavu nandi.

⁸ Yika bagora bavu nandi tumba Fumu Nsambi etu avu netu, jandi otuwamusa na otutoyisa. Batu bamavayila mambu maEzekias kaga jiJuda yitu.

Bulumbi buSennakerib ombu bisi Jerusalem

⁹ Mua temu jinovioga Sennakerib kaga jiAssyrie amasindiga bagora bandi ukanda Lakich jogu na bagora bandi botsu; avana amasindiyila bivunda bibagora bamosi ombu Ezekias kaga jiJuda nombu bisi Juda botsu abamaba o Jerusalem uyebatsingula rie:

¹⁰ Sennakerib kaga jiAssyrie jandi rie: Anyi eduveyi mangolu uwarila ukandu uJerusalem?

¹¹ Dugelabi yiri Ezekias edudunsi ava edubokisili na nsala na puila ava evosili rie: Fumu Nsambi etu otuwaka kalala ombu kaga jiAssyrie?

¹² Tsiri Ezekias eni agumatsiemusa mbura tsiduyitsu na binyensulu bipagu biFumu? Tsiri jandi agumaruma baJuda na bisi Jerusalem rie: Dugudama va gusu yinyensulu yipagu yimosi na avana duvagulila bima bimbunga jiboti?

¹³ Dugejabi ama jetu na bataji bami tumavayila bisi malongu masusu? Bansambi bamalongu beni bamarungula uwaka bisi malongu mogu kalala ombu gami?

¹⁴ Ava bataji bami bamabungila malongu meni nsambi yi jimabawaka kalala? Je Nsambi enu oduwaka kalala ombu gami?

¹⁵ Kabogu duyamuesinga udunsu nesi udiongu na Ezekias eni na duyamuvayila yitu! Vagaa ne nsambi jimosi mu malongu meni motsu nesi mu bufumu buotsu ajiurungula uwaka batu bandi kalala ombu gami nesi ombu bataji bami. Duitasi yiri Nsambi enu orungula uduwaka kalala ombu gami?

¹⁶ Bilumbi biSennakerib bamamuedesa Fumu Nsambi na musalitsi andi Ezekias.

Sennakerib usienga esiengi Fumu

¹⁷ Mbana kaga jiAssyrie amatinda muganda ubisiengu usienga Fumu Nsambi Israel rie: Dedi mosi nana bansambi bamalongu masusu basamarungulila uwaka bisi malongu mogu kalala ombu gami Nsambi Ezekias agowaka batu bandi kalala ombu gami.

¹⁸ Bilumbi biSennakerib bamagamuga mu mbembu hebreu ulasa keri na goma ombu bisi Jerusalem abamaba va julu yivaga yiri bodeda mbana bobapatula musiengi.

¹⁹ Bamavosila Nsambi Jerusalem nderi avu dedi na bansambi babisi butamba abamavagu na batu.

BaAssyrie urina berini; dufu duSennakerib

²⁰ Kaga Ezekias na Easie mubiyitsi agumaba muana dibaala uAmots bamasambila Nsambi umuwivula ubawamusa.

²¹ Mbana Fumu amatinda yiansa yiandi o milaku mibaAssyrie ayimaboka bagora botsu bamangolu na bivunda bibagora. Kaga amagabuga na yisonyi o bulongu buandi. Yilumbu yimosi ava amakotila o ndagu nsambi andi, avana baana bandi bababaala bamamubokila.

²² Anana Fumu amagobulila Ezekias na bisi Jerusalem ombu Sennakerib kaga jiAssyrie nombu bavinitsi bogu basusu. Amabasingisa duvotsu yiari na yiari.

²³ Batu bapuela bamayevetsiyila Fumu miensili o Jerusalem na misangulu mipuela ombu Ezekias kaga jiJuda agumayitsu na bisi malongu motsu.

Disukusulu didurumu duEzekias

²⁴ Vana temu eni Ezekias amabela diambu. Amasambila Fumu; Fumu amamuwagula rie: Gubeluga.

²⁵ Tumba mu diambu didunangu duandi Ezekias asamakipa maboti ama amavagulu. Kabogu Fumu amamulasa kabu andi na amajilasa Juda na Jerusalem wandi.

²⁶ Mbana Ezekias anokesundusa va mosi na bisi Jerusalem, kabu jiFumu jimasaguga yitsingu yiotsu yiEzekias.

²⁷ Ezekias amabanganga na busina bupuela na bundumba. Amakevayila bilundulu bilora jivema na bilora na bimamanyi madufunu duneni na bima bimbunga jiboti na bangubu na bima biotsu abi mutu orungula uba na nsala.

²⁸ Amarungisa bisuegulu biusueyila ble na malamu na matsi na mandagu ukelisa biruitsi bimunongu na munongu.

²⁹ Amarungisa misiengi na amabanganga na mipuela mibiruitsi bigeyi nesi bineni; Nsambi amamuvaga tindi yisina.

³⁰ La Ezekias eni agumayingusa mamba mayileka yiGuihon umawendisa o banda o yiari ayi wisi ewendisini te no musiengi uDavid. Ezekias amalunga mu bisalu biandi biotsu.

³¹ Tumba basefu baBabylone bamatindila bilumbi ombu gandi uyejaba yimaga ayimalabana o bulongu, Nsambi amamuliyila nsima umuweliga ujaba ama amatasanga.

³² Misamu miusita miEzekias mimasonugu mu Dulasu duEasie mubiyitsi agumaba muana dibaala uAmots na mu dibuku dibakaga baJuda na dibaIsrael.

³³ Ezekias amafu na bamamutsiga mu ngila ajimaviolila mangila motsu mabategula baDavid ubueji; baJuda botsu na bisi Jerusalem bamamulilanga. Manasse muana andi udibaala amarumanga va yivinga yiandi.