2 Misamu 31 - La Sainte Bible en Langue Yipunu

Ezekias ugaba egabi bisalu biNdagu Nsambi

¹ Feta jinosuka baIsrael botsu bamayenawenda o misiengi miJuda na bamapansa bitumba na bamabula bakosi na bamarakula tindi urakula mbura tsiduyitsu na binyensulu bipagu bibansambi bangana o Juda jiotsu no biari biBenjamin no biEfraim no biManasse. Mbana baIsrael botsu bamayenagabuga o misiengi miogu.

² Ezekias amagaba makabu mabavagulitsi bapagu na mabisi Levi, dikabu dikabu yisalu yisalu o Mbura Nsambi: bavagulitsi bapagu na bisi Levi bamosi bamavagula pagu tsiunyensa tsimunongu na munongu na basusu pagu tsikabusulu tsimaboti na basusu bisalu na basusu uwimbila nyimbu noyenayitsanga Fumu.

³ Kaga amavega dikabu dibima biandi pagu tsiunyensa kedi na tsisiga na pagu tsiunyensa tsibatsona na tsibisusimgi na tsibafeta nana dimasonugulu mu migaga miFumu.

⁴ Mbana kaga amaruma bisi Jerusalem uvega biwelimina uwamusa bavagulitsi bapagu na bisi Levi yiri borungula ukevega o yisalu yiogu nodugusu migaga miFumu.

⁵ Diruma dieni dinonyava yiari na yiari baIsrael bamabega biumanga bipuela bipuela: bible na bimalamu na bimatsi na bibuji na bibiotsu abidilunu o manungi na yimosi mu digumi yidigumba diogu.

⁶ Munongu mosi na baIsrael na baJuda abamatsananga o misiengi miJuda; bamavega yimosi mu digumi dibiruitsi nesi bangombi nesi bindombu va mosi na pagu atsimavagululu Fumu Nsambi ogu. Bamabigukiga maguki maminongu.

⁷ Bamabanda ugukiga maguki mu tsungi jimurieru na basamamanisila te na tsungi jimusambuali.

⁸ Ezekias na basefu bamayelaba maguki na bamagabusila Fumu diboti na batu bandi baIsrael wandi.

⁹ Ezekias amawivula bavagulitsi bapagu na bisi Levi bivu mu diambu dimaguki meni.

¹⁰ Mbana Azaria yivunda yibavagulitsi bapagu agumba mu yifumba yiSadoc amamugabusila rie: Ubandila va temu aji tumabandila ubega miensili o Ndagu Nsambi jetu tumaji na tumagukuru na bipuela bipuela bimasialulu mu mbari Fumu amagabila batu bandi miula.

¹¹ Ezekias amaruma batu ukunsa bibuku bibilundulu o Ndagu Nsambi na bamadivaga.

¹² Bamakotisa biotsu muna nesi yimosi mudigumi yidigumba. Muisi Levi, diina diandi Konania amabikelisanga na muana taji andi Chimei amasala nandi.

¹³ Yehiel na Azazia na Nahat na Assael na Yerimot na Yozabad na Eliel na Ismakia na Mahat na Benaya diwendi rie: botsu bana bamasalanga na Konania na Chimei o Ndagu Nsambi nana kaga Ezekias na Azaria yivunda yibavagulitsi bapagu bamarumina.

¹⁴ Muisi Levi diina diandi Core agumaba muana dibaala ulmna amaba mukelisi udikotulu o yiari ayi wisi epalili; jandi amadilanga pagu tsitondini atsi bamavagulilanga Nsambi, amagabanga abimawakusungu ombu Fumu na abimaba tindi yingitsi.

¹⁵ Misiengi mibavagulitsi bapagu amimi: Eden na Miniamin na Yechoua na Chemaya na Amaria na Chekania; mimaba o tsi durumu duandi ugabilanga baana bataji bandi, nesi bivunda nesi bangebi biguji.

¹⁶ Amagabila tsiri yika bababaala abamasansumu ubanda na baana abakavu na bilima birieru tumba jogu wogu abamakotanga yilumbu na yilumbu o Ndagu Nsambi uyesala bisalu biogu nana bamarumunu.

¹⁷ Bavagulitsi bapagu bamagabulu nana bamasansumunu muna mikuta miogu, tumba bisi Levi abakavu na magumabeji mabilima bamagabulu nana bamasansumunu muna bisalu biogu nesi mabuli mogu.

¹⁸ Bisi dibuli abamasansumu na baana bogu na bagatsi bogu na baana bogu bababaala na babagetu jogu botsu bamarungula ujanganga biguji biyingitsi.

¹⁹ Mbe ka bavagulitsi bapagu bategula baAaron abamatsananga o musiru nesi o misiengi amimabambana na misiengi mibavagulitsi bapagu o kadi musiengi umaba babaala abamasolu ubagabila biogu va mosi na bisi Levi abamasansumu.

²⁰ Adi Ezekias amavaga o Juda jiotsu dimaba diwelimina na dimaba disungama va gusu Fumu Nsambi andi.

²¹ Yeri bisalu biotsu abi amasala ulonda Ndagu Nsambi vo ukipanga migaga na maruma biNsambi, amavaganga motsu na murima andi uotsu na amadugusu duganu duNsambi andi.