2 Misamu 30 - La Sainte Bible en Langue Yipunu

Ezekias unengila enengili baIsrael botsu uyeji Paque

¹ Ezekias amatinda bilumbi ombu baIsrael nombu baJuda na amasonina yifumba yiEfraim na yiManasse miganda, amabanengila o Jerusalem o Ndagu Nsambi uyeji Paque uyitsa Fumu Nsambi Israel.

² Kaga na basefu bandi na dibuli diotsu bamatabula diambu o Jerusalem yiri Paque jiuligulu mu tsungi jimubeji.

³ Basamarungula ujiji va temu jiwelimina mu mbari bavagulitsi bapagu botsu mbe basakadugunu ukeliomisa na batu botsu mbe basakagukama o Jerusalem.

⁴ Dionyi dimalasa kaga na batu botsu ubueji;

⁵ bamatabula diambu uyenadisamunanga o bulongu buotsu buIsrael ubandila o banda te no tandu yiri boruga o Jerusalem uyeji Paque uyitsa Fumu Nsambi Israel mu mbari pesu batu bamajikipanga nana dimasonugulu.

⁶ Bilumbi bamawenda na miganda mikaga mibasefu bandi ombu baIsrael nombu baJuda na musuga ukaga bamavosa rie: BaIsrael, jenu adumarina bakaga baAssyrie ruganu ombu Fumu Nsambi Abraham na Isaac na Jacob, jandi ogabuga ombu genu.

⁷ Duyagukulila bataji benu nesi baana bataji benu abamaba mimbini miFumu Nsambi bataji bogu; Nsambi amababunga nana duilabili.

⁸ Duyaba mimbini dedi mosi nana bataji benu bamabila; keveganu ombu Fumu, gabuganu o Mbura Nsambi Ajivu Tindi Yingitsi, salilanu Fumu Nsambi enu. Mbana kabu andi jineni jiusaguga.

⁹ Pa dugabuga ombu Fumu baana bataji benu na baana benu bolasu yingeba na jogu abamababega baviga te na abenu bogabuga o bulongu buebubu. Pa dugabuga ombu Fumu Nsambi enu agoduliiyila nsima mu mbari avu na maboti na avu na yingeba.

¹⁰ Anana bilumbi bamawendilanga o misiengi miotsu o bulongu buEfraim no buManasse te no buZabulon tumba batu bamayenabarekanga nobadesanga.

¹¹ Ne nana babaala bamosi bayifumba yiAsser na yiManasse na yiZabulon bamasinga mbela na bamawenda o Jerusalem.

¹² Mbe ka baJuda, bamaba na kingu mosi udugusu diruma dikaga na basefu bandi mu mbari Fumu amaba nogu.

Ezekias ukunsa ekunsi feta Paque

¹³ Batu bapuela bapuela bamagukama o Jerusalem uyeji feta jimapa magambu na dufunusu mu tsungi ajimubeji. Yimabanganga tindi yibenguna yineni.

¹⁴ Bamabanda utsiemusa binyensulu bipagu abimaba o musiengi va mosi na binyensulu bima bimbunga jiboti na bamabibuaga o yibususu yiCedron.

¹⁵ Mbana bamatabula yindombu yiPaque muru mu yilumbu yiyigumi na bina bitsungi jimubeji. Bavagulitsi bapagu na bisi Levi banogaangu na yisonyi bamakeliomisa yiri borungula uvagula pagu tsiunyensa o Ndagu Nsambi.

¹⁶ Bamakipa yika mbura tsiogu nana bamalonsulu na migaga miMoise agumaba musalitsi uNsambi: bisi Levi bamawakisa malungu mabibulu bipagu ombu bavagulitsi bapagu abamamapuga yiari na yiari biyinyensulu yipagu.

¹⁷ O yibenguna umaba batu bapuela abasamakeliomisa, kabogu bisi Levi bamatabula bibulu miuru va yivinga yibatu abamaba na muinsi va gusu Fumu.

¹⁸ Mu mbari batu bapuela, sinsa viri yifumba yiEfraim na yiManasse na yiIssakar na yiZabulon basamakipa adimasonugu: basamakeliomisa ne nana bamaji Paque. Tumba Ezekias amabasambilila rie:

¹⁹ Kokolu tsiagu Fumu, ndeʼ aguvu muboti, tanda botsu abamakevega ujaba duganu duagu diuleba basamakipa duliomusu duogu!

²⁰ Fumu amagulu dusambu duEzekias na amatanda batu beni.

²¹ Yisambuali yibilumbu baIsrael abamaba o Jerusalem bamajanganga feta jimapa magambu na dufunusu na nsangu jineni; yilumbu na yilumbu bisi Levi na bavagulitsi bapagu bamayitsanga Fumu na bisigu abimasigulu umuyitsa.

²² Ezekias amakakisa bisi Levi botsu abamaba na dujabu duneni duyisalu yiFumu. Mu yisambuali yibilumbu bamajanganga bibulu na bamavagulanga pagu tsikabusulu tsimaboti na bamayitsa Fumu Nsambi jibataji bogu.

²³ Mbana dibuli diotsu bamatabula diambu ubuesa yisambuali yibilumbu. Mu yisambuali yieni yibilumbu bamajanganga na nsangu.

²⁴ Ezekias kaga jiJuda amabavega tosini balumi babangombi na yisambuali yitosini tsibindombu; basefu bamabavega tosini balumi babangombi na yigumi yitosini tsibindombu. Va julu vana bavagulitsi bapagu bapuela bamakeliomisa.

²⁵ Dibuli diotsu diJuda na bavagulitsi bapagu na bisi Levi na benyi botsu abamaruyila o Israel abamayetsana o Juda bamasangilanga.

²⁶ Vamaba nsangu jineni o Jerusalem; ubandila va temu Salomon muana dibaala uDavid kaga jiIsrael vasakalabana diambu dimunongu eni o Jerusalem.

²⁷ Va disukusulu diyibenguna bavagulitsi bapagu abamaba bisi Levi bamagabila batu miula. Tsambu tsiogu tsimagulunu na Nsambi o mbura aji amatsanina o julu.