2 Misamu 3 - La Sainte Bible en Langue Yipunu

Urunga berungi Ndagu Nsambi

¹ Salomon amabanda urungisa Ndagu Nsambi o Jerusalem va julu mukongu uMoria agu Fumu amalabinina na taji andi David. David amasola mbura va yisagulu yiOman muisi Jebes.

² Yilumbu yimubeji yitsungi jimubeji jiyilima yimuina bidurumu duandi amabanda urunga.

³ Guluanu nana Salomon amarungisila Ndagu Nsambi: usakama ujionyi umaba magumarieru mametera, uroga ujionyi yigumi yimetera.

⁴ Piasu ajimaba va gusu Ndagu Nsambi jimaba yigumi yimetera, jimaba dedi na uroga uNdagu na muranga ujionyi magumasiamunu mametera; Salomon amajikubiga tindi lora o gari.

⁵ Bamakubiga Ndagu jineni na tsimbi tsisipara na tindi lora wandi na amabaka bibagunu bimetu mamambari na bibapanga o gari.

⁶ Amanamiga mamanyi madufunu duneni wandi amamaba nana kembu; lora eni jimaruyila o Parvaim.

⁷ Bamakubiga Ndagu jiotsu lora nesi mikambu nesi bilemondi nesi tsiengi nesi biabutsu abimaba maguyi mabeʼ babeji na amabaka bibagunu bibiansa mu bibaga.

⁸ Bamarunga yibuku ayimanengulungu Mbura Ajivu Tindi Yingitsi; yimaba usakama uyigumi yimetera, dedi na uroga uNdagu Nsambi; uroga ujionyi umaba yigumi yimetera. Amajinamiga tindi lora, bamasalisa magumabeji matona tsilora mu yionyi.

⁹ Utsira ubatsongu balora abamasalusu umaba kama yiranu tsigarama. Bamakubiga lora wandi mu bibuku abijulu.

¹⁰ Amabakisa bibagunu bibeji bibiansa na bamabikubiga lora; bamabikotisa o gari Mbura Ajivu Tindi Yingitsi.

¹¹ Usakama umapapi mabibagunu bibiansa umaba yigumi yimetera, usakama udipapi aditega metera beji na yibuku, dimaduku yibaga yindagu; dipapi disusu usakama metera beji na yibuku na dimabengusana na dipapi diyiansa ayimubeji.

¹² Usakama udipapi diyiansa ayimubeji metera beji na yibuku, dimaduku na yibaga yindagu; dipapi disusu metera beji na yibuku, dimabengusana na dipapi diyiansa ayitega.

¹³ Mapapi meni mabibagunu bieni bibiansa manosimbulu mamaba na yigumi yimetera. Bimaba diteli na bimagengila o yiari yidikotulu yindagu.

¹⁴ Bamavaga dumbu dudumbulu na yinyuru ayivu va gari ubenga na dumbulu na ubenga na tsanda tsilina, amamasonugu bibagunu bibiansa.

Makutu makunga na yinyensulu yipagu

¹⁵ Amavaga makutu mabeji va gusuNdagu, usakama umonyi yigumi na yisambuali yimetera na yiviovi yimetera beji na yibuku va kodu tsimakutu meni.

¹⁶ Bamavaga bapanga dedi mosi nana bamaba o Mbura Nsambi na bamabavakiga muna kodu tsimakutu na bamavaga kama bibagunu bigeranada ami bamavakiga mu panga tsieni.

¹⁷ Bamareliga makutu va gusu Mbura Nsambi; dimosi o yiari yimabaala na disusu o yiari yimagetu; bamaluga adi yiari yimabaala Yakin, divindugulu rie: Nsambi esingi na adi yiari yimagetu Boaz divindugulu rie: Nsambi ana mangolu.