2 Misamu 29 - La Sainte Bible en Langue Yipunu

Durumu duEzekias Duliomusu duNdagu Nsambi

¹ Ezekias amabanda uruma ava amabila magumabeji na bilima biranu na amarumanga magumabeji na yifu yibilima o Jerusalem. Diina dinguji andi Abi muana mugetu uZacharie.

² Amavaganga amamalasanga Fumu ubueji dedi mosi nana taji andi David amavayilanga.

³ Yilima yitega yidurumu duandi mu tsungi jitega amadibulila maguyi maNdagu Nsambi na amamalonda.

⁴ Amanengila bavagulitsi bapagu na bisi Levi aba amabengusana o yiari ayi wisi epalili

⁵ mbana amabatsingula rie: Bategula baLevi kululuatianu! Keliomisanu na liomisanu Ndagu Nsambi jibataji benu na palisanu biotsu abivu muinsi muna o gusu kana.

⁶ Bataji betu bamavaga masumu ava bamavayila amasamalasa Fumu Nsambi etu ubueji, bamamubusa! Basamamuekipa Mbura Nsambi na bamamuliyila nsima.

⁷ Bamabindiga maguyi maNdagu Nsambi na bamasingisa balambi utsima na basamamuevagulila Nsambi Israel nesi bima bimbunga jiboti nesi pagu tsiunyensa o Mbura Nsambi.

⁸ La dibandu kabu Fumu jimalabinina ombu bisi Juda na bisi Jerusalem; amabasingisa ulaba maguga nesi dubungu nesi mudesu nana jenu beni duilabilili namunyi.

⁹ La dibandu bataji betu bamabokulu na majenga na baana betu bababaala na babagetu na bagetu betu bavu o buviga.

¹⁰ Kabogu nyina ditasa umuevangana pangini na Fumu Nsambi Israel yiri kabu andi jineni jiusaguga.

¹¹ Baana bami tsie dundanu umubusa mu mbari dumasolu nandi; dumuyitsanga na dumuvagulilanga bima bimbunga jiboti umulasanga ubueji.

¹² Bisi Levi abamarelama ababa: Mahat muana dibaala uAmassai na Joel muana dibaala uAzaria mu mukuta uQuehat; Quich muana dibaala uAbdi na Azaria muana dibaala uYehallelel mu mukuta uMerari; Yoa muana dibaala uZimma na Eden muana dibaala uYoa mu mukuta uGuerchon;

¹³ Chimri na Yeiel mu mukuta uElissafan; Zacharie na Mattania mu mukuta uAssaf;

¹⁴ Yehiel na Chimei mu mukuta uHeman; Chemaya na Ouziel mu mukuta uYedoutoun.

¹⁵ Bamabengusana bisi bifumba biogu na bamakeliomisa jogu botsu. Mbana nana kaga amabarumina dedi mosi na duganu duFumu bamawenda uyeliomisa Ndagu Nsambi.

¹⁶ Bavagulitsi bapagu bamakota o gari Ndagu Nsambi ujiliomisa; bamapalisa muinsi uotsu agu bamarasu-na o yibuku ayineni na bamagusunsa va piasu jiNdagu Nsambi. Avana bisi Levi bamagubolila nogubega o tsomu dimbu o yibususu yiCedron.

¹⁷ Bamabanda duliomusu dueni yilumbu yitega yitsungi jitega; yilumbu yimunana yitsungi eni bamatola te no piasu jiNdagu Nsambi. Bamamana yinana yibilumbu uliomisila Ndagu Nsambi; yilumbu yiyigumi na bisiamunu mu tsungi jitega bamamanina bisalu biotsu.

¹⁸ Mbana bisi Levi bamawenda ombu kaga Ezekias na bamavosa rie: Tumamana uliomisa Ndagu jiotsu jiNsambi na yinyensulu yipagu na tavula jimapa mapagu na bisalulu biotsu bibionyi.

¹⁹ Bisalulu biotsu biyingitsi abi kaga Ahaz amasabula ava amaruminanga na dummu duandi dubi, tumabiliomisa na tumabisunsa va gusu yinyensulu yipagu.

Ezekias unengila enengili batu ugabuga ombu Fumu

²⁰ Kaga Ezekias amarelama kedi jineni amagukiga basefu bamisiengi mbana bamawenda va mosi o Ndagu Nsambi.

²¹ Bamavagula yisambuali yibalumi babangombi na yisambuali yibalumi babinsabi abimaba pagu jiutsindula dibumi dibufumu buandi na diMbura Nsambi na diJuda. Kaga amaruma bavagulitsi bapagu abamaba bategula baAaron ubivagula va yinyensulu yipagu yiFumu.

²² Bavagulitsi bapagu bamatabula bangombi miuru; bamabonga malungu; bamamatsatsa yinyensulu yipagu. Bamatabula balumi babindombu miuru na baana babindombu wandi; mbana bavagulitsi bapagu bamapuga malungu meni yiari na yiari biyinyensulu yipagu.

²³ Va julu vana bamabega balumi babinsabi bapagu jiutsindula dibumi va gusu kaga na va gusu dibuli abamabisakiga miogu.

²⁴ Bavagulitsi bapagu bamabitabula miuru na bamapuga malungu mabionyi va yinyensulu yipagu utsindula dibumi dibaIsrael botsu. Diwendi rie: kaga amaruma uvagulila Fumu pagu jiuynyensa na jiutsindula dibumi dibaIsrael botsu.

²⁵ Kaga amakotisa bisi Levi o dulombili duNdagu Nsambi usiga bambumbu na bangomfi na basambi nana Fumu amarumina kala ubongila va temu jiDavid na jibabiyitsi Gad na Natan abamadila musuga uFumu.

²⁶ Bisi Levi bamaba na bisigu biDavid na bavagulitsi bapagu bamaba na mimbanda.

²⁷ Ezekias amaruma uvagula pagu tsiunyensa va yinyensulu yipagu va temu aji bamabandila uvagula pagu tsiunyensa va yinyensulu yipagu bamawimbilanga duimbu duFumu na mufi mamimbanda na mabisigu biDavid kaga jiIsrael.

²⁸ Dibuli diotsu bamagudama na bawimbitsi bamawimbila duimbu na bamasiga mimbanda te na pagu tsiunyensa tsimasiegalana.

²⁹ Banomana uvagula pagu tsiunyensa kaga na botsu abamaba nandi bamakutama va gusu Fumu.

³⁰ Mbana kaga Ezekias na basefu bamaruma bisi Levi ukakisa Fumu na nyimbu tsiDavid na tsimubiyitsi Assaf. Kabogu bisi Levi bamawimbila na nsangu mbana bamagudama va tsi umuyitsa.

³¹ Mbana Ezekias amavosa na batu rie: Dumakevega ombu Fumu, bambananu, beganu pagu na vagulanu pagu tsikabusulu tsimaboti o Ndagu Nsambi. Dibuli bamabega pagu na bamavagula pagu tsikabusulu tsimaboti na botsu abamaba na mangolu bamavagula pagu tsiunyensa.

³² Dutalu dupagu tsiunyensa atsi dibuli bamavagulila Fumu dumaba: magumidusambuali mabangombi na kama balumi babindombu na kama beji tsibaana babindombu;

³³ na kama yisiamunu tsibangombi na tosini yiriem tsibindombu na binsabi bipagu tsisusu.

³⁴ Tumba bavagulitsi bapagu bamaba mua dutalu dugeyi na basamarungula usasa pagu tsiotsu tsiunyensa; la dibandu bisi Levi abamaba baana babataji bogu bamabawamusila te na yisalu yiotsu yimasuka te na bavagulitsi bapagu basusu bamakeliomisa. Diwendi rie: bisi Levi bamakevega na murima uotsu ukeliomisa uviolila bavagulitsi bapagu basusu.

³⁵ Va julu pagu tsiunyensa vamaba matsi mapagu tsikabusulu tsimaboti na bamaba pagu tsiunu usobana na pagu tsiunyensa. Anana bamamuebandila ukota o Ndagu Nsambi usala yisalu yiandi.

³⁶ Ezekias na batu botsu bamasangila motsu ama Nsambi amabavayila; mamalabana mbangu mbangu.