2 Misamu 28 - La Sainte Bible en Langue Yipunu

Dibandu didurumu duAhaz

¹ Ahaz amaba na magumabeji mabilima ava amabandila uruma na amarumanga yigumi na bilima bisiamunu o Jerusalem. Asamavaganga amamalasa Fumu ubeji nana taji andi David amavayila.

² Amaduka bifu bibakaga baIsrael; amavaga nesi bitumba bimuyitsa uBaal.

³ Amanyensa bima bimbunga jiboti o yibususu yiHinnon na amanyensa baana bandi bababaala; amadukanga nsoruru tsibisi malongu ama Fumu amabingila baIsrael.

⁴ Amavagula pagu tsiunyensa na bima bimbunga jiboti va mbura tsiduyitsu tsibansambi bangana na va julu tsimikongu na mu tsi tsimiri.

⁵ Fumu Nsambi andi amamuwakisa ombu kaga jiSyrie; baSyrie bamamubetsa na bamabakotisa bapuela o buviga abu bamababeyila o Damas. Amawakusu ombu kaga jiIsrael agumamubetsa tindi umubetsa.

⁶ Peca muana dibaala uRemalia amaboka kama na magumabeji matosini tsibagora bamangolu baJuda mu yilumbu yimosi mu mbari bamabusa Fumu Nsambi bataji bogu.

⁷ Zikri mutoyitsi uEfraim amaboka Masseya muana dibaala ukaga na Elcana agumabatindi mbatsi jikaga.

⁸ BaIsrael bamavaga kama beji tsitosini tsibaana bataji bogu baJuda baviga na bagetu na baana bababaala na babagetu na bamabakinda bima bipuela abi bamabeyila o Samarie.

⁹ Avana vamaba mubiyitsi uFumu diina diandi Oded. Amayebengusana bagora abamaruyila o Samarie na amabatsingula rie: Fumu Nsambi bataji benu amanyoyila baJuda kabu; amabawakisa ombu genu na dumababoka munongu mbokulu ajimanyoyisa nesi Fumu.

¹⁰ Va julu vana duitasi uvaga baJuda na bisi Jerusalem baviga benu! Tumba jenu dugaa na mbela va gusu Nsambi enu?

¹¹ Guluatianu, gabusanu baJuda aba dumabonga baviga; Fumu ana tindi kabu nenu.

¹² Bamosi va gari basefu baEfraim: Azaria muana dibaala uYohanan na Berekia muana dibaala uMechillemot na Yehizquia muana dibaala uChalloum na Amassa muana dibaala uHadlai bamatoyisa abamaruyila o divita.

¹³ Bamabatsingula rie: Duyabega baviga beni gunu; duketunamusu mbela va gusu Fumu va julu masumu metu na mbela tsiotsu tsisusu. Jetu tuna mbela jikala na kabu Fumu jivu va julu miuru mibaIsrael.

¹⁴ Bagora bamasila baviga na abi bamakinda va gusu basefu na va gusu dibuli diotsu.

¹⁵ Babaala aba miina mogu mabanotalu bamabonga baviga; bamabonga abimakindu uduisa abamaba na mapenyi, bamabavega biduaru na bapondu na bamabalisa nonuisa, bamabagotsa matsi na bamamatisa botsu abamatogulu mu baburu na bamababega o Jericho musiengi uMambari ombu baana bataji bogu. Mbana bamayenagabuga oSamarie.

Ahaz uvonda evondi duwamusu dubaAssyrie

¹⁶ Vana temu eni kaga Ahaz amasindiyila batu uyevonda duwamusu ombu bakaga baAssyrie.

¹⁷ BaEdom bamamueyebelisa baJuda na bamayenababega baviga.

¹⁸ BaPhilistin bamayebasa o misiengi mikumu na amivu o tandu Juda; bamabonga Bet-Chemech na Ayalon na Guederot va mosi na Soko na Timna na Guimzo na misiengi amimabambana na mionyi.

¹⁹ Fumu amasundusa bufumu buJuda mu diambu diAhaz kaga jiIsrael agumabivisanga baJuda abamavaga masumu va gusu Fumu.

²⁰ Teglath-Phalasar kaga jiAssyrie amayetoga nandi tumba asamamuwamusa.

²¹ Ahaz amakinda Ndagu Nsambi na ndagu kaga na mandagu mabasefu.

²² Diuleba kaga Ahaz amagulungu munyongu amamuekaluga mumbini va gusu Fumu.

²³ Amavagulila bansambi baDamas pagu tsiunyensa; banomubetsa amavosa rie: Bansambi bakaga Syrie bebawamusi kabogu nyubavagulila pagu tsiunyensa wandi yiri bokwamusa. Tumba adina dimaba dibandu didubungu duandi na dubaIsrael botsu.

²⁴ Ahaz amagukiga bisalulu biyingitsi biNdagu Nsambi na amatatabula bionyi. Amadibiga makotulu maMbura Nsambi, amavaga binyensulu bipagu yiari na yiari biJerusalem.

²⁵ Amavaga mbura tsiduyitsu tsibansambi bangana o kadi musiengi o Juda atsi bamavagulila bima bimbunga jiboti.

²⁶ Misamu misusu minrasonugu mu dibuku dibakaga baJuda na dibaIsrael.

²⁷ Ahaz amafu na bamamutsiga o musiengi uJerusalem mu mbari basamamutsiyila va bangila babakaga baIsrael. Ezekias muana andi udibaala amaruma va yivinga yiandi.