2 Misamu 27 - La Sainte Bible en Langue YipunuDurumu duYotam ( 2 Baka 15.32-38 ) 1 Yotam amaba na magumabeji na bilimabiranu ava amabandila uruma na amarumanga yigumi na bilima bisiamunu o Jerusalem. Diina dinguji andi Yeroucha agumaba muana mugetu uSadoc. 2 Amavaganga amamalasanga Fumu ubueji dedi mosi na taji andi Ozias yika asamakota Ndagu Nsambi. Ne nana batu bamamuekebivisa. 3 Yotam amarungisa dikotulu dineni diNdagu Nsambi na amamuerungisa yivaga yiOfel. 4 Amamuerungisa misiengi o mukongu uJuda na mandagu masakama mamunongu na munongu o musiru. 5 Amatoga divita na kaga jibaAmmon na amalunga. Muna yilima yieni baAmmon bamamufuta milendu; tona yirieru tsilora jivema na tona yirieru tsible na tona yirieru tsiorsa; yilima ayimubeji na ayimuriem bamamufuta dedi mosi. 6 Yotam amaba na tindi mangolu mu mbari amawendanga sungingi va gusu Fumu Nsambi andi. 7 Misamu misusu mi Yotam na mavita mandi motsu na motsu ama amavaga mamasonugu mu dibuku dibakaga baIsrael na dibaJuda. 8 Amaba na magumabeji na bilima biranu ava amabandila uruma na amarumanga yigumi na bilima bisiamunu o Jerusalem. 9 Yotam anofu bamamutsiga o musiengi uDavid. Ahaz muana andi udibaala amaruma va yivinga yiandi. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon