2 Misamu 26 - La Sainte Bible en Langue Yipunu

Durumu du Ozias

¹ BaJuda botsu bamasola Ozias agumaba na yigumi na bilima bisiamunu na bamamubiatsa kaga va yivinga yitaji andi Amassia.

² Taji andi kaga anofu Ozias amamuerungisa Elath na amagukotisa o tsi dunimu duJuda.

³ Ozias amaba na yigumi na bilima bisiamunu ava amabandila uruma na amarumanga magumaranu nabilima bibeji o Jerusalem. Diina dinguji andi Yekolia muisi Jerusalem.

⁴ Amavaganga amamalasanga Fumu ubueji dedi mosi na taji andi Amassia.

Usigama uOzias uikaluyi bumbini

⁵ Ozias amakevega uromba Nsambi va yitsingu yiotsu yiZacharie agumamulonsa uduma Nsambi; yitsingu yiotsu ayi amarombilanga Fumu, Nsambi amamufunisanga.

⁶ Amatoga divita na baPhilistinna amapansa bivaga biGat na bivaga biYabne na biAsdod na amamuerungisa misiengi o yiari yiAsdod nombu baPhilistin.

⁷ Nsambi amamuwamusa ombu baPhilistin nombu baArab abamatsaninanga o Gour-Baal nombu baMeounie.

⁸ BaAmmon bamaveganga Ozias milendu. Diduma diOzias dimanyavanga te no mandilu maEgypte mu mbari amaba na tindi mangolu.

⁹ Ozias amamuerungisa mandagu masakama o Jerusalem o yiari yidikotulu diyitungu na dikotulu diyibususu na amamawarisa.

¹⁰ Amamuerungisa mandagu masakama o kumu na amatimisa biduna bimamba bipuela mu mbari amaba na migamba mipuela mipuela o bibisusu no kumu na bafutsitsi na bakelisi bamfuga tsirayisan o mikongu no Karmel mu mbari amarondanga bisalu bieni.

¹¹ Ozias amaba na dibuli dibagora abama-wendanga yinombu o divita, bamagabu mu makabu ava bamasansumunu na musonitsi Yeiel na yivunda yibisalu Masseya abamaba o tsi durumu duHanania yivunda yibagora.

¹² Dutalu duotsu dubasefu bamikuta abamaba bangogaga dumaba tosini beji na kama yisiamunu.

¹³ Bamarumanga kama yirieru na yisambuali yitosini na kama yiranu tsibagora abamaba bakunsama utoga divita na bavinitsi bakaga.

¹⁴ Ozias amarombila bagora botsu bangubu na makongu na bisiemba na bikutu bimandilu na bapita na bilandandaji.

¹⁵ Amaruma batu badiela uvaga basina o Jerusalem abamasunsu o mandagu masakama na mu bitungu; na bonyi bamatindilanga mbansa na mamanyi maneni. Diduma diandi dimanyava vala; Nsambi amamuwamusa tindi uwamusa na amadila mangolu maneni.

¹⁶ Tumba anodila mangolu amakematisa te na amabungana. Amavayila Fumu Nsambi andi dibi; amakota o ndagu Fumu uvagula bima bimbunga jiboti va yinyensulu.

¹⁷ Anobivagulila Azaria yivunda yibavagulitsi bapagu amakota na magumidunana mabavagulitsi bapagu baFumu.

¹⁸ Na bukidi buogu bamatsingula kaga Ozias rie: Kaga, gugaa na musuga uvagulila Fumu bima bimbunga jiboti! Yika bavagulitsi bapagu bavu na musuga eni, diwendi rie: baana bababaala baAaron abamabiatsu ubivagulanga! Pala o Mbura Nsambi, dibi guivayi! Fumu Nsambi agogaru dionyi.

¹⁹ Ozias amanyoga tindi kabu na amaba na yisunsulu yimuji va dikaka; anonyoyila bavagulitsi bapagu nyambi jimasundila ubunga yinsi yiandi va misu mabavagulitsi bapagu o gari Ndagu Nsambi va mugula yinyensulu yibima bimbunga jiboti.

²⁰ Azaria yivunda yibavagulitsi bapagu na bavagulitsi bapagu botsu banomugengila yisuisu bamalaba yiri amaba na nyambi va mbami. Bamasundila umupalisa na jaʼ beni amalensa nopala mu mbari bamajaba Fumu amamudimba.

Disukusulu didurumu duOzias

²¹ Kaga Ozias amaba yibedu yinyambi te na dufu duandi na amatsana o ndagu vala na batu mu mbari amapalusu o Ndagu Nsambi. Yotam muana andi udibaala amarumanga o ndagu kaga na amatabulilanga bisi bulongu bunsonsi.

²² Misamu misusti miOzias Esaie muana dibaala uAmots agumaba mubiyitsi amamisona.

²³ Ozias amafu; bamamutsiga va mbura jibangila babakaga tumba tsiri mu bangila bamukuta andi mu mbari bamavosa rie: Avu yibedu yinyambi. Yotam muana andi udibaala amaruma va yivingayiandi.