2 Misamu 25 - La Sainte Bible en Langue Yipunu

Durumu duAmassia

¹ Amassia amaba na magumabeji na bilima biranu ava amabandila uruma na amarumanga magumabeji na yifu yibilima o Jerusalem. Diina dinguji andi Yoaddan agumaba muisi Jerusalem.

² Amavaga amamalasa Fumu ubueji tumba amaba na mabeʼ mabeji.

³ Bufumu buandi bunowara amabokisa bivimda abimaboka taji andi agumba kaga.

⁴ Tumba asamabokisa baana bogu bababaala mu mbari amadedila adimasonugulu mu migaga, diwendi rie: mu dibuku diMoise agu Fumu amavega dimma diedidi rie: bayabokisa bataji mu diambu dibaana na bayabokisa baana mu diambu dibataji; tumba mutu mutu abokusu na dibi diandi.

⁵ Amassia amabengusana babaala baJuda na amabagukiga muna mikuta mibataji bogu; basefu babatosini na basefu babakama baJuda jiotsu na baBenjamin; amabasansama ubanda na abamaba na magumabeji mabilima ne uviolila, vamaba kama yirieru tsitosini tsiabamasolu abamaba bawelimina uvera notinda dikongu nosalisa ngubu.

⁶ Amafuta tona yirieru tsilora jivema udila kama tosini tsibagora baIsrael abamajaba utoga divita.

⁷ Mubiyitsi amamurasuna novosa rie: Aa kaga bagora baIsrael bayawenda nagu mu mbari Fumu agaa na baEfraim.

⁸ Pa bowenda nagu ne pa gumanina mangolu magu motsu o divita, Nsambi agoguwaka kalala mu mbari Nsambi buandi elungisi vo ebetsi.

⁹ Amassia amawivula mubiyitsi rie: Yika tsie na lora jivema atsi nyimakefutila? Mubiyitsi amawaka rie: Fumu orungula uguvega ne uviolila tsionyi.

¹⁰ Mbana Amassia amaganina bagora abamaruyila o Efraim yiri bayenagabuga o yiari yiogu.

¹¹ Amassia amadila mangolu uwendisa bagora bandi. Amawenda o yibususu yimusayi agu amayebokisila yigumi yitosini tsibagora baEdom.

¹² BaJuda bamagaanga yigumi yitosini tsibaviga aba bamabega o julu dimanyi; aguna bamababuayilanga o tsi, botsu bamagesumuga.

¹³ Tumba bagora aba Amassia amagandisa uwenda o divita bamabasa misiengi miotsu miJuda ubandila o Samarie te no Bet-Horon, bamayeboka tosini yirieru tsibatu na bamakinda bima bipuela bipuela.

Amassia amabetsu na Joas kaga jiIsrael

¹⁴ Amassia anobetsa baEdom amayenagabuga na amabonga bansambi bogu na amabavaga bansambi bandi; amabayitsa na amabavagulila bima bimbunga jiboti.

¹⁵ Mbana Fumu amanyoyila Amassia kabu na amamutindila mubiyitsi agumamuwivula rie: Dibandu yi gumabongila bansambi abasamarungula uwaka batu bogu kalala ombu gagu?

¹⁶ Uvosa mbe akivosa, Amassia amamu-wivula rie: Je tumagusola mulongitsi ukaga? Kebana! Mubiyitsi amagusuga ava amavosila rie: Nyijabi yiri Nsambi amatabula diambu ugubunga mu mbari gumavaga dionyi na gugegulu dilongi diami.

¹⁷ Mbana Amassia amatinda bilumbi ombu Joas muana dibaala uJoachaz agumaba mutegula uJehu kaga jiIsrael. Bimayemutsingula rie: Ruga tuyitoga!

¹⁸ Joas amaruma mutu uyetsingula Amassia rie: Dusiendi duLiban dumatinda yilumbi uyetsingula musedera uLiban rie: Wetsa muana agu umugetu na muana ami udibaala! Tumba bibulu bibukanyi bimavioga na bimatsiarila dusiendi.

¹⁹ Joas amabuela rie: Ndeʼ gumabokisa baEdom na gumakematisa. Laba nsangu na bundumba buagu na tsananga o ndagu agu. Dibandu yi gubanda divita adiurombisa dubungu duagu na dubaJuda wandi?

²⁰ Tumba Amassia asamagulu; Nsambi amatabula diambu ubawakisa ombu bavinitsi mu mbari bamaronda bansambi baEdom,

²¹ Joas kaga jiIsrael amawenda; bamayelabana na Amassia o Bet-Chemech o bulongu buJuda.

²² BaIsrael bamabetsa baJuda, mutu mutu amarina o ndagu andi.

²³ Joas, kaga jiIsrael amabonga Amassia muana dibaala uJoas mutegula uAhazia o buviga. Amamubega o Jerusalem na amayebivisa yivaga kama beji tsimetera, ubandila va dikotulu diEfraim te no dikotulu diyitungu.

²⁴ Amabonga lora na lora jivema na bisanga abimaba o Ndagu Nsambi ombu Obed Edom na abimaba mu bilundulu bindagu kaga; amabonga na batuga wandi mbana amayenagabuga o Samarie.

Disukusulu didurumu duAmassia

²⁵ Joas anofu Amassia kaga jiJuda amamuetsinga yigumi na bilima biranu.

²⁶ Misamu misusu miAmassia mimasonugu mu dibuku dibakaga baJuda na dibaIsrael.

²⁷ Amassia anoliyila Fumu nsima bamamutungila fundu o Jerusalem kabogu amarina o Lakich agu bamayemubokisila.

²⁸ Bamamunangula mu bakabala na bamayemutsiga va mugula bataji bandi o musiengi uJuda.