2 Misamu 23 - La Sainte Bible en Langue Yipunu

Joas amabiatsu kaga

¹ Yilima yimusambuali muvagulitsi upagu Yoyada amadila mangolu na amavangana pangini na muana dibaala uYeroam na Ismael muana dibaala uYohanan na Azaria muana dibaala uObed na Masseya muana dibaala uAdaya na Elichafat muana dibaala uZikri

² Bamayenalinganga o misiengi miotsu miJuda na bamanengila bisi Levi botsu na basefu bamikuta miIsrael; botsu bamawenda o Jerusalem.

³ Dibuli diotsu bamabenguna o Ndagu Nsambi uvangana pangini mu diambu dikaga. Yoyada amabatsingula rie: Tuyalibana Joas muana dibaala ukaga! Arumanga nana Fumu amatabulila mu diambu dibategula baDavid.

⁴ Guluanu adi duvaga: ava bavagulitsi bapagu na bisi Levi bokotila o yisalu yilumbu yitsona dikabu dimosi bokelisanga makotulu maNdagu Nsambi;

⁵ dikabu adimubeji bokelisanga ndagu kaga na dikabu adimurieru bokelisanga dikotulu diYibuga. Batu botsu boba va dulombili duNdagu Nsambi.

⁶ Ne mutu mosi ayakota o Ndagu Nsambi yika bavagulitsi bapagu na bisi Levi abavu mu yisalu; jogu bokotanga mu mbari bana musuga, basusu bayakota mu diambu dimugaga uFumu.

⁷ Bisi Levi basusu bogaga kaga yiari na yiari, mutu mutu yitogulu va dikaka; dubambana na kaga ava okotilanga. Mutu uotsu aguweliga ukota o Ndagu aboku.

⁸ Bisi Levi na baJuda botsu bamadugusu maruma motsu ama Yoyada muvagulitsi upagu amabaruma. Mutu mutu amabonga batu bandi, diwendi rie: abamakotanga o yisalu va mosi nesi upalanga mu yilumbu yitsona; yivunda yibavagulitsi bapagu asamavengutsa ne dikabu dimosi.

⁹ Yoyada amavega yivunda yibakama makongu na bangubu abimaba bikaga David, abimakelusungu o Ndagu Nsambi.

¹⁰ Amaruma batu botsu utandama, mutu mutu na yitogulu yiandi va dikaka, ubandila o yiari yimabaala yiNdagu Nsambi nesi va gusu kana ndagu nesi va yinyensulu yipagu te no yiari yimagetu bamaba kunsama ugaga kaga.

¹¹ Mbana bamapalisa Joas na bamamuduisa dugaba na bamamuwakisa dibuku dimigaga. Yoyada na baana bandi bababaala bamamutsatsa matsi umubiatsa kaga; vana vana batu bamagamuga rie: Abi kaga!

¹² Athalie anogulu nduku batu abamawendanga mbangu noyenayitsanga kaga, jaʼ wandi amaduka batu o Ndagu Nsambi.

¹³ Amalaba kaga jigona diteli va gusu batu nana yifu yiogu yimabila; bisi bulongu buotsu bamalaba nsangu na bamasiganga mimbanda na bawimbitsi bamaba na bisigu uwimbilila nyimbu tsiduyitsu. Athalie amapasa biduaru biandi na amagamuga rie; Fundu jimatungu! Fundu jimatungu!

¹⁴ Yoyada muvagulitsi upagu asamaronda yiri bomuboka o Ndagu Nsambi. Kabogu amaruma bivunda bikama tsibagora rie: Mupalisianu va gusu kana na bokanganu mutu uotsu agumuduka.

¹⁵ Bamamuviosa muna nsila bakabala te no ndagu kaga: aguna amabokulu.

¹⁶ Yoyada amavangana pangini na Fumu na kaga na batu rie: Tuba batu baFumu.

¹⁷ Kabogu yinombu bamakota o ndagu Baal na bamajipansa; bamapansa tindi upansa binyensulu bipagu na bitumba na bamabokisa Mattan muvagulitsi upagu uBaal va gusu yinyensulu yipagu.

¹⁸ Yoyada amawakisa bisalulu biNdagu Nsambi ombu bavagulitsi bapagu abamaba bisi Levi. David amabagaba mabuli usala o Ndagu Nsambi uvagulilanga Fumu pagu tsiunyensa nana dimasonugulu mu migaga miMoise; bamasalanga na nsangu na nyimbu nana bamarumunu na David.

¹⁹ Amasunsa bakelisi va makotulu maNdagu Nsambi ugandisa bango muinsi ukota.

²⁰ Amagukiga basefu bakama tsibagora na batu abamayitsu abamaba na diufi dimangolu va mosi na batu botsu basusu na bamakotisa kaga o ndagu andi. Bamamukotisa o ndagu andi va dikotulu digusu kana mbana bamamutsanisa va yitsiga yibufumu,

²¹ yinombu yiotsu bamasangila tindi usangila. Musiengi uotsu umaba sui yiotsu ayi bamabokisila Athalie.