2 Misamu 18 - La Sainte Bible en Langue Yipunu

Josaphat ufubana efubini na Achab kagajiIsrael

¹ Josaphat amadila busina buneni na digoba wandi na amatunga mutsiga umawela na Achab.

² Mua bilima binovioga amawenda ombu Achag o Samarie; Achab amabokisa bindombu bipuela na bangombi udila Josaphat na batu bandi, amamuwivula ufubana nandi uyetumuna bisi Ramot o Galaad.

³ Achab kaga jiIsrael amawivula Josaphat kaga jiJuda rie: Guirondi uwenda nami o Ramot o Galaad? Josaphat amamuwaka rie: Jetu nagu na batu betu tuwenda nagu ubatumuna.

Babiyitsi ubiga bebiyi ndungulu

⁴ Mbana Josaphat amavosa na kaga jiIsrael rie: Kokolu tsaigu lewivula Fumu.

⁵ Kaga jiIsrael amagukiga kama jina tsibabiyitsi, na amabawivula rie: Nyuwenda uyetumuna bisi Ramot o Galaad vo nyiyawenda? Bamawaka rie: Wendanga Nsambi oguwakisa musiengi eni.

⁶ Mbana Josaphat amawivula rie: Avava vesaa mubiyitsi ususu uFumu agu turungula umuewivula?

⁷ Kaga jiIsrael amawaka Josaphat rie: Vakivu dibaala dimosi, orungula utuwivulila Fumu; tumba nyimuvini mu mbari agembiyili ne mbigulu jimosi jiboti, ebiyingi yika mbigulu tsibi. Diina diandi Michee muana dibaala uImla. Josaphat amavosa rie: Guyavosa nana.

⁸ Mbana kaga jiIsrael amanengila muvangu na amamuruma rie: Lensa noyenengila Michee muana dibaala uImla.

⁹ Kaga jiIsrael na Josaphat kaga jiJuda bamaduara biduaru biogu bibukaga na mutu mutu amatsana va yitsiga yiandi yibufumu va dikotulu diSamarie; avana babiyitsi botsu bamabiyila.

¹⁰ Sidequia muana dibaala uKenaana amalevaga masiyi mabudilu mbana amavosa rie: Fumu jandi rie: Na masiyi memama gudimbila bisi Syrie te na gubabunga.

¹¹ Babiyitsi botsu bamawarisa mbigulu tsieni rie: Wenda o Ramot o Galaad! Gulunga na Fumu oguwakisa musiengi eni.

Mubiyitsi Michee ubiga ebiyi mbetsulu

¹² Yilumbi ayimayenengila Michee amamutsingula rie: Gulu babiyitsi bavu kingu mosi; bamabiyila kaga mbigulu tsiboti kabogu mbigulu tsiagu tsibi kingu mosi na tsiogu! Gukabiga ndungulu.

¹³ Michee amawaka rie: Fumu jaʼ beni ejabi. Nyubiga ama Nsambi ami onsingula.

¹⁴ Ava amatolila ombu kaga, kaga amamuwivula rie: Michee tuwenda uyetumuna bisi Ramot o Galaad vo tuyawenda? Amamuwagula rie: Wendanga gulunga! Fumu oguwakisa musiengi eni.

¹⁵ Kaga amamuwivula rie: Kumbu kweʼ nyugulevisa pesi na diina diFumu yiri adi guivosi dibi dingensa?

¹⁶ Michee amawaka rie: Nyilabi baIsrael botsu upansiga bepansiyi o mikongu nderi bindombu abigaa na mubungulitsi; Fumu amavosa rie: Batu beni bagaa na fumu mutu mutu agabuyi na duvotsu o ndagu andi.

¹⁷ Kaga jiIsrael amawivula Josaphat rie: Ngaalegutsingula? Agembiyili mbigulu tsiboti, embiyili yika mbigulu tsibi.

¹⁸ Michee amavosa rie: Kabogu legulu mbembu Fumu? Nyimalaba Fumu atsana va yitsiga yiandi yibufumu na bisi julu botsu bamaba diteli bebeli nandi va mabaala mandi na va magetu mandi.

¹⁹ Mbana Fumu amawivula rie: Anyi odunsa Achab kaga jiIsrael yiri owenda o Ramot o Galaad yiri oyeboku guna? Umosi amawagulu kingu mosi na ususu kingu jisusu.

²⁰ Yinyunyi yimabambana na Fumu na yimavosa rie: Menu nyumudunsa. Fumu amamuwivula rie: Ayi?

²¹ Yimawagula rie: Nyuwenda na nyuba yinyunyi yimfurulu mu miunu mibabiyitsi bandi botsu. Fumu amayevosa rie: Nyiina, gurungula umudunsa. Wenda yevaga nana gutsivosila.

²² Kabogu Michee amabuela rie: Fumu amavega yinyunyi yimfurulu ombu babiyitsi bagu botsu, diuleba Fumu amatabula diambu ugulasamaguga.

²³ Vana vana Sidequia muana dibaala uKenaana amabambana na Michee na amamudimba va dibanga nomuwivula rie: Je Yinyunyi yiNsambi evosi bunagu, agevosi nami?

²⁴ Michee amawaka rie: Gulaba, yilumbu ayi gusuemina o gari ndagu.

²⁵ Kaga jiIsrael amamuruma rie: Bonga Michee, gukamubega ombu Amon yivunda yimusiengi nombu Yoach muana dibaala ukaga.

²⁶ Gukavosa rie: Kaga jandi rie: Kotisanu dibaala diedidi o tsugu na dukamuvegaanga mua pesu mapa na mua pesu mamba te na nyugabuga na duvotsu.

²⁷ Michee amavosa rie: Pa gugabuga na duvotsu, kabogu Fumu agaavosa nami. Amabuela rie: Jenu batu botsu duigulu?

Kaga Achab amaboku o divita

²⁸ Kaga jiIsrael na Josaphat kaga jiJuda bamawenda o Ramot o Galaad.

²⁹ Kaga jiIsrael amatsingula Josaphat rie: Ndeʼ guduara biduaru bibukaga na menu nyuduara bisusu abi bagonjabila mbana nyuwenda o utoga.

³⁰ Kabogu kaga jiSyrie amavega diruma ombu bivunda bimakalu rie: Duyatumuna nesi ngebi nesi yivunda, tumba tumunanu kaga jiIsrael.

³¹ Kabogu ava bivunda bibabeyitsi bamakalu bamalabila Josaphat bamavosa rie: Ngensa aguna aji kaga jiIsrael. Bamabambana nandi umutumuna tumba Josaphat amagamuga na Fumu amamuwamusa na Nsambi amabakakasana nandi.

³² Mbana bivunda bibabeyitsi bamakalu bamalaba yiri aguna tsiri kaga jiIsrael, kabogu bamakakana nandi.

³³ Mbana gora mosi jiSyrie amatinda dubansa duandi matitinda na amadunamusu kaga jiIsrael va dinami dingubu. Kaga amaruma agumabeganga dikalu diandi rie: Geluga na palisi o divita mu mbari nyimatsungugu.

³⁴ Tumba divita dimaranga tindi uranga muna yilumbu yieni. Kaga amasikugu na dikalu diandi va nsungisini na dibadi diSyrie te na tsisiga. Amafu ava wisi etsimini.