2 Misamu 17 - La Sainte Bible en Langue Yipunu

Durumu duJosaphat Usigama uandi va gusu Fumu

¹ Josaphat muana andi udibaala amaruma va yivinga yiandi, bufumu buandi bumawarusu o Israel.

² Amasunsa mabuli mabagora o misiengi miotsu mikandu miJuda na amatsanisa bivunda o bulongu buJuda no misiengi miEfraim amimapatulu na taji andi Asa.

³ Fumu amaba na Josaphat mu mbari amadukanga bifu bitega bitaji andi David na asamaduka Baal.

⁴ Amawamusu na Nsambi taji andi na amakipanga maruma mandi, asamagukulila baIsrael.

⁵ Fumu amawarisa bufumu buJosaphat BaJuda botsu bamayemuveganga milendu; amabanganga na busina na digoba.

⁶ Amaba na murima ujaba dugandu duFumu va julu vana amatsiemusa mbura tsiduyitsu na bakosi o Juda.

⁷ Yilima yimurieru bidurumu duandi amaruma basefu bandi Ben-Hail na Obadia na Zacharie na Netaneel na Mikaya uyelonsa o misiengi miJuda.

⁸ Amatinda bisi Levi ababa nogu: Chemaya na Netania na Zebadia na Assael na Chemiramot na Yonatan na Adonia na Tobia na Tob-Adonia va mosi na bavagulitsi bapagu babeji: Elichama na Yoram.

⁹ Bamayenalonsanga o Juda, dibuku dimigaga miFumu dimaba nogu. Bamatsiengila o misiengi miotsu miJuda uyenalonsanga batu.

Mangolu maJosaphat

¹⁰ Goma Fumu jimagaanga bisi malongu motsu amamaba yiari na yiari, ne mutu mosi asamaweliga utoga divita na Josaphat.

¹¹ BaPhilistin bamaveyila Josaphat milendu na lepu jilora jivema; baArab wandi bamamubeyila biruitsi: yisambuali yitosini na yisambuali yikama tsibalumi babindombu dedi mosi na balumi babinsabi.

¹² Digoba diJosaphat dimaroga tindi uroga. Amarungisa misiengi mikandu miusueyila biguji o Juda jiotsu.

¹³ Amakotisa biguji bipuela o misiengi miJudana amakelisa bagora bamangolu nandi o Jerusalem.

¹⁴ Muna mandagu mabataji bivunda bibatosini abibi: mu ndagu Juda Adna amaba yivunda yikama yirieru tsitosini tsibagora;

¹⁵ va mugula andi Yohanan na kama beji na magumidunana matosini tsibagora;

¹⁶ na va mugula andi Amassia muana dibaala uZikri agumakevega na tondini ombu Fumu o tsi durumu duandi vamaba kama beji tsitosini tsibagora.

¹⁷ Mu ndagu Benjamin Eliada amaba gora jimangolu, o tsi durumu duandi vamaba kama beji tsitosini abamaba na bapita na bangubu;

¹⁸ va mugula andi Yozabad, o tsi durumu duandi vamaba kama na magumidunana matosini tsibagora abamaba bakunsama utoga divita.

¹⁹ Abana bamaba bagora abamasalilanga kaga o Jerusalem. Va julu vana basusu bamaba o misiengi mikandu miJuda.