2 Misamu 16 - La Sainte Bible en Langue Yipunu

Asa utoga etoyi divita na Bacha, kaga jiIsrael

¹ Yilima yimagumarieru na bisiamunu bidurumu duAsa, Bacha kaga jiIsrael amawenda uyetoga na baJuda; amakanda Rama ugubitsa bagora baAsa kaga jiJuda upalanga nokotanga.

² Asa amapalisa lora jivema na lora mu bisuegulu biNdagu Nsambi na bindagu kaga na amatsitinda ombu Ben-Hadad kaga jiSyrie agumatsaninanga o Damas.

³ Amatinda bulumbi rie: Jetu nagu tuvangana pangini nana jimalebila va gari taji ami na taji agu. Laba nyigutindili mulendu ulora jivema na lora. Wenda yibunsa pangini agu na Bacha kaga jiIsrael.

⁴ Ben-Hadad amagulu kaga Asa; amasindiga bivunda bibagora bandi uyetoyisa misiengi miIsrael na amabelisa Yon na Dan na Abel-Maim na yiari yiotsu yiNeftali agu bisuegulu bimabila.

⁵ Ava Bacha amadigululu amadunda yisalu ukanda musiengi uRama.

⁶ Kaga Asa amanengila baJuda botsu tsiri uvengutsa mutu na jogu bamabeganga mamanyi na tsimbi abi Bacha amasalisa ukanda Rama; Kaga Asa amabisalisa ukanda Gueba na Mispa.

Asa ukotisa ekotisi mubiyitsi Hanani otsugu

⁷ Avana temu eni Hanani mubiyitsi amarasuna Asa kaga jiJuda na amamutsingula rie: Mu mbari gumaronda uwamusu na kaga jiSyrie, Fumu Nsambi agu asamaguwamusa kabogu bagora baSyrie bamagurina.

⁸ Je baEthiopie na baLibye basamaba dibuli dineni dibagora na makalu na babeyitsi babakabala bapuela bapuela? Ne nana Fumu amabawakisa ombu gagu mu mbari gumakevega ombu gandi.

⁹ Dingensa Fumu egengili biari biotsu uwarisa jogu abamakevega ombu gandi. Buduka gumavaga, ubanda namunyi gutoganga mavita.

¹⁰ Asa amanyoyila mubiyitsi tindi kabu kabogu amamukotisa o tsugu mu mbari amaba na kabu nandi. Vana temu eni wandi Asa amalasa batu bamosi maguga.

Disukusulu didurumu duAsa

¹¹ Misamu misusu miAsa mimasonugu mu dibuku dibakaga baJuda.

¹² Yilima yimagumarieru na yifu bidurumu duandi Asa amabela makulu; asamasambila Fumu tumba amayewivula banganga.

¹³ Asa amafu, amafuila va yilima yimagumana na yimosi bidurumu duandi.

¹⁴ Bamamutsiga o ngila aji amaketimisila o musiengi uDavid. Bamamusiliga va tangi aji bamanyensa bima bimbunga jiboti na miyombu abimakunsu na buketi bumuvayitsi umiyombu; bamanyensa bipuela umuyitsa.