2 Misamu 15 - La Sainte Bible en Langue Yipunu

Asa unengila enengili batu ugabuga ombu Nsambi

¹ Mbana yinyunyi yiNsambi amagaanga Azaria muana dibaala uOded

² agumarasuna Asa nomutsingula rie: Kululuanu Asa na baJuda na baBenjamin! Fumu avu nenu pa jenu duvu nandi; pa duimugengili olabana nenu; tumba pa duimubusi jaʼ wandi odubusa.

³ Yitsingu yineni baIsrael bamayitsanga bansambi bangana na basamaba na bavagulitsi bapagu ubalonsa na basamakipa migaga.

⁴ Tumba banolaba maguga bamagabuga ombu Fumu Nsambi Israel; bamamugengila na amalabana nogu.

⁵ Va temu eni abamawendanga nogabuganga basamaba na mirima misunda mu mbari vamabanganga kimbu tsineni o bulongu buotsu.

⁶ Bisi bulongu bamabetsa bisi bulongu bususu na bisi musiengi bamabetsa bisi musiengi ususu; Nsambi amabasingisa ulaba maguga mamunongu na munongu.

⁷ Kabogu waranu na duyadeda. Dusaku mu diambu dibisalu bienu.

⁸ Asa anogulu mbigulu tsimubiyitsi Oded amawarusu na amatsiemusa nsoruru tsibulongu buotsu buJuda na buBenjamin no misiengi ami amapatula o mukongu uEfraim. Amarungulila yinyensulu yipagu yiFumu ayimaba va gusu Ndagu Nsambi.

⁹ BaEfraim na baManasse na baSimeon bamafubana na Asa mu mbari bamalaba yiri Fumu Nsambi avu nandi. Amabanengila o yibenguna va mosi na baJuda na baBenjamin.

¹⁰ Bamabenguna o Jerusalem mu tsungi jimurieru jiyilima yiyigumi na biranu bidurumu duAsa.

¹¹ Muna yilumbu yieni bamavagulila Fumu pagu mu biotsu abimakindu: yisambuali yikama tsibangombi na yisambuali yitosini tsibindombu.

¹² Bamavangana pangini uduka Fumu Nsambi bataji bogu na mirima miogu miotsu na matasa mogu motsu.

¹³ Mutu uotsu agugoduka Fumu Nsambi Israel aboku nesi ngebi nesi yivunda nesi dibaala nesi mugetu.

¹⁴ Bamagana kaka va gusu Fumu na migamu minsangu na nsiyitsi tsimimbanda na bandundu.

¹⁵ BaJuda botsu bamalaba tindi nsangu na kaka eni mu mbari jimaganu na murima mosi. Botsu bamalaba ubueji uduka Fumu agumalabana nogu na amabavega yivumu o biari biotsu.

¹⁶ Kaga Asa amapatula nguji andi Maaka bukaga mu mbari amavayila Astarte kosi. Asa amapansa kosi andi aji amanyensa va disimu diCedron.

¹⁷ Asamatsiemusa mbura tsiduytsu tsibaIsrael diuleba amakevega ombu Fumu yitsingu yiandi yiotsu.

¹⁸ Amabega bima bilora na bilora jivema na bisusu o Ndagu Nsambi abi jogu na taji andi bamawakisa Fumu.

¹⁹ Vasamamueba divita te na yilima yimagumarieru na biranu bidurumu duAsa.