2 Misamu 12 - La Sainte Bible en Langue YipunuChichac, kaga jiEgypte utoyisa etoyisi Juda ( 1 Baka 14.25-28 ) 1 Bufumu buRoboam bunowara na anodila mangolu amaliyila migaga miFumu nsima na baIsrael botsu bamavaga dedi mosi nandi. 2 Mu yilima yimuranu bidurumu duRoboam baIsrael bamavaga masumu va gusu Fumu, Chichac kaga jiEgypte amayebatoyisa o Jerusalem. 3 Amaba na tosini na kama beji tsimakalu na magumasiamunu matosini tsibabeyitsi babakabala; amaruyila o Egypte na batu aba gugorungula utala: baLibye na baSoukie na bisi Ethiopie. 4 Amatoyisa misiengi mikandu miJuda na amatola nesi te no Jerusalem. 5 Mubiyitsi Chemaya amarasuna baRoboam na basefu baJuda abamaba o yibenguna o Jerusalem ombu Chichac na amabatsingula rie: Fumu jandi rie: Jenu dumambusa; meʼ wami nyidubusi na nyiduwakisi ombu Chichac. 6 Basefu baIsrael na kaga bamasinga mbela te na bamavosa rie: Fumu ana ndunga! 7 Yiotsu ayi Fumu amadilaba amatsingula Chemaya rie: Bamakevega mbela kabogu ngomuebaboka. Nyusundila ubawaka kalala, ngomuenyoyila Jerusalem kabu nosingisa Chichac ubunga musiengi egugu. 8 Yiotsu ayi boba o tsi durumu duChichac bojaba yeri divu diwelimina unsalila vo usalila bakaga bamalongu masusu. 9 Chichac kaga jiEgypte amawenda uyetoyisa Jerusalem. Amabonga busina buNdagu Nsambi na busina bundagu kaga. Amabonga ngubu tsiotsu tsilora atsi Salomon amavaga. 10 Kaga Roboam amavinsa ngubu tsisusu tsikunga na amatsivega ombu bivunda bibagora abamakelisanga ndagu kaga. 11 Temu tsiotsu atsi kaga amawendilanga o Ndagu Nsambi bagora bamabega ngubu tsiotsu; mbana bamatsigabusanga o ndagu bagora. 12 Roboam anokevega mbela kabu jiFumu jimasaguga na asamamuemuboka. Mbana vamamuelabana maboti o Juda. Disukusulu dibukaga buRoboam ( 1 Baka 14.21-24 , 29-31 ) 13 Roboam agu Naama muisi Ammon amaburila Salomon amarumanga o Jerusalem. Amaba na magumana na yilima yimosi ava amabandila umma o Jerusalem na amarumanga yigumi na yisambuali yibilima. Fumu amasola musiengi eni utsananga va gari batu bandi baIsrael. 14 Roboam amavaga dibi; asamakevega ujaba duganu duFumu. 15 Misamu misusu miRoboam mimasonugu mu Dibuku diMubiyitsi Chemaya na Mubiyitsi Iddo. Vamabanganga divita va gari Roboam na Jeroboam. 16 Roboam amafu na amatsigu o musiengi uDavid. Abia muana andi udibaala amaruma va yivinga yiandi. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon