2 Misamu 11 - La Sainte Bible en Langue Yipunu

¹ Roboam amatola o Jerusalem, amabengusana na yifumba yiJuda na yifumba yiBenjamin: kama na magumidunana matosini tsisbagora uyetoyisa baIsrael basusu ubagabusa o tsi durumu duRoboam.

² Tumba Fumu amatsingula Chemaya mubiyitsi rie:

³ Tsingula Roboam muana dibaala uSalomon aguvu kaga jibaJuda botsu na baBenjamin rie:

⁴ Fumu jandi rie: Duyawenda na duyatoga divita na baana bataji benu baIsrael! Mutu mutu agabuyi o ndagu andi mu mbari diambu diedidi dimaruyila ombu gami! Jogu bamadedila mbembu Fumu, kabogu bamayenagabuga nana Fumu amavosila.

Roboam uwarisa ewarisi musiengi

⁵ Roboam amatsana o Jerusalem na amamuerungisa misiengi miemimi o Juda:

⁶ Bethleem na Etam na Tecoa

⁷ na Bet-Sour na Soko na Adoullam

⁸ na Gat na Marecha na Zif

⁹ na Adoraim na Lakich na Azeca

¹⁰ na Sora na Ayalon na Hebron. Misiengi miemina mikanda mimaba mibaJuda na mibaBenjamin.

¹¹ Amawarisa misiengi mieni; amatsanisa bivunda muna na amasuega biguji bipuela na matsi na malamu mu musiengi musiengi.

¹² Van julu vana amasunsa bangubu na makongu o misiengi mieni; musiengi musiengi umawarusu. Amarumanga baJuda na baBenjamin.

Bavagulitsi bapagu na bisi Levi ufubana befubini na Roboam

¹³ Bavagulitsi bapagu na bisi Levi abamaba o Israel jiotsu bamasila mbura tsiogu uyefubana na Roboam.

¹⁴ Bisi Levi bamasila manungi mogu na mandagu mogu, bamayenawenda o Jerusalem o yiari yiJuda mu mbari Jeroboam na baana bandi bababaala bamabagubitsa usala bisalu bibuvagulitsi bupagu.

¹⁵ Jeroboam jaʼ beni amabiatsa bavagulitsi bapagu babansambi bangana abamayitsu o mbura tsiduyitsu, diwendi rie: bibagunu bibalumi babinsabi na bibaana babangombi.

¹⁶ BaIsrael bamosi abamaba na nsala jineni uyitsa Nsambi Israel bamaduka bisi Levi o Jerusalem uyevagulila Fumu Nsambi bataji bogu pagu.

¹⁷ Te na bilima birieru bamawarisa bufumu buJuda na bamawarisa kaga Roboam muana dibaala uSalomon; va temu eni jiotsu bamadukanga bifu biDavid na biSalomon.

Mukuta uRoboam

¹⁸ Roboam amawela Mahalat muana mugetu uYerimot muana uDavid na Abihail muana mugetu uEliab mutegula uJesse.

¹⁹ Mahalat amamuburila baana barieru bababaala: Youch na Chemaria na Zaham.

²⁰ Va julu vana amawela Maaka muana mugetu uAbichalom; jandi amamuburila baana barieru bababaala: Abia na Attai na Ziza na Chelomit.

²¹ Roboam amarondanga Maaka muana mugetu uAbichalom uviolila bagatsi bandi botsu nesi uviolila maronda mandi; amawela yigumi na yinana yibagetu na magumasiamunu mamaronda; amabura magumabeji na yinana yibaana bababaala na magumasiamunu mabaana babagetu.

²² Roboam amavaga Abia muana dibaala uMaaka sefu jibaana bataji bandi; amaronda yiri oba kaga va yivinga yiandi.

²³ Amadivaga na buketi, amalepansa baana bandi botsu bababaala o biari biotsu biJuda na biBenjamin o misiengi mikandu; amabarombila biguji bipuela na bagetu bapuela bapuela.