2 Misamu 1 - La Sainte Bible en Langue Yipunu

YILOMBI YISALOMON KAGA JI-ISRAEL

¹ Salomon muana dibaala uDavid amawara mu bufumu buandi; Fumu Nsambi andi amaba nandi na amamumatisa tindi umumatisa.

Salomon uvonda evondi Nsambi diela urumg

² Salomon amanengila baIsrael botsu: bivunda bibatosini na bibakama na bansonsi na basefu bamikuta mibataji bogu: diwendi rie: baneni baIsrael.

³ Salomon amawenda na dibuli diotsu o Mbura Nsambi ajimaba o Gabaon. Aguna umaba Ndagu Yibenguna aji Moise musalitsi Fumu amarungisila Nsambi o kumu.

⁴ David amayebonga yigara yipangini yiNsambi o Quiriat-Yearim uyigabusa o Jerusalem; amayisunsa va mbura ajimakunsu o ndagu tsanda.

⁵ Tumba amasunsa yinyensulu yipagu yikunga ayi Bessalel muana dibaala uOuri na mutegula uHour va gusu Ndagu Nsambi o Gabaon. Salomon na dibuli bamayebenguna na Fumu.

⁶ Avana va julu yinyensulu yipagu yikunga ayimaba va gusu Ndagu Yibenguna, Salomon amavagulila Fumu tosini jipagu tsiunyensa.

⁷ Ava mukolu uyilumbu ayi duki Nsambi amalabana na Salomon na amamuruma rie: Vonda ayi guirondi yiri nyuguvega.

⁸ Salomon amawaka Nsambi rie: Ndeʼ gumalasa taji ami David tindi maboti na ndeʼ gumapinsa va yivinga yiandi.

⁹ Namunyi Fumu Nsambi, pangini aji gumavangana na taji ami David jidugusu mu mbari gumapaga kaga jibatu bapuela bapuela abavu nderi difufundu!

¹⁰ Kabogu peyi diela na dujabu yiri nyujaba urumanga batu bebaba! Anyi orungula utabulila bunsonsi bubatu bagu abavu bapuela bapuela?

¹¹ Nsambi amatsingula Salomon rie: Mu mbari adina divu o murima agu na gugevondi nesi busina nesi bima nesi bundumba nesi dufu dubatu abeguvini vo nesi yitsingu yineni na guivondi diela na dujabu yiri gutabulila batu bami bunsonsi aba nyimaguveyila bufumu.

¹² La dibandu gumavegulu diela na dujabu. Va julu vana nyuguvega busina na bima na bundumba abu ne kaga mosi agumagurela asamadila na aboguduka ne umosi agobidila.

¹³ Salomon anogusuga o mbura jiduyitsu ajimaba o Gabaon agu Ndagu Yibenguna jimaba amagabuga o Jerusalem.

Mangolu na busina buSalomon

¹⁴ Salomon amagukiga makalu na bakabala; amaba na tosini na kama jina tsimakalu na yigumi na tosini beji tsibakabala aba amasunsa o misiengi ami amakelisilanga makalu mandi nesi o Jerusalem.

¹⁵ Kaga amafunisa lora jivema o Jerusalem nderi ubuayila mondi dedi mosi na misedera na misikomora.

¹⁶ Salomon amadililanga bakabala bandi o Egypte; yinombu yibatiyitsi bamuteti bakaga bamayebasumbilanga kaga.

¹⁷ Dikalu dimosi dimapalusu o Egypte na dufunu dukama yisiamunu tsimbonga na kabala jimosi kama na marumaranu mambongu. Batiyitsi bamuteti bamabega bawelimina usumbisa ombu bakaga baHitt na baSyrie.